1 Uime sin tha sinne, mar cho-obraichean leis-san, a’ guidhe oirbh, gun sibh a ghabhail gràs Dhè gu dìomhain:

2 (Oir tha e ag ràdh, Ann an àm taitneach dh’èisd mi riut, agus ann an là slàinte rinn mi còmhnadh leat: feuch, a-nis an t-àm taitneach; feuch, a-nis là na slàinte.)

3 Gun a bhith a’ toirt adhbhar oilbheim air bith ann an aon nì, a-chum nach faigheadh a’ mhinistrealachd mì-chliù:

4 Ach anns gach nì gar dearbhadh fhèin mar mhinistearan Dhè, ann am mòr-fhoighidinn, ann an àmhgharan, ann an uireasbhaidh, ann an teanntachdan,

5 Ann am buillean, ann am prìosanan, ann an luasgadh o àite gu h-àite, ann an saothair, ann am faire, ann an trasgadh;

6 Ann am fìorghlaine, ann an eòlas, ann am fad-fhulangas, ann an coibhneas, anns an Spiorad Naomh, ann an gràdh gun cheilg,

7 Ann am facal na fìrinn, ann an cumhachd Dhè, le airm na fìreantachd air an làimh dheis agus chlì.

8 Tre urram agus eas-urram, tre mhì-chliù agus dheagh-chliù: mar mhealltairean, gidheadh fìrinneach;

9 Mar dhream nach aithnichear, gidheadh air a bheil deagh aithne; mar dhream a tha a’ faghail a’ bhàis, gidheadh feuch, tha sinn beò; mar dhream a tha air an smachdachadh, agus gun a bhith air am marbhadh;

10 Mar dhream a tha brònach, gidheadh a-ghnàth a’ dèanamh gàirdeachais; mar dhaoine bochda, gidheadh a tha a’ dèanamh mòran saoibhir; mar dhaoine aig nach eil nì sam bith, gidheadh a’ sealbhachadh nan uile nithean.

11 Tha ar beul-ne fosgailte dhuibhse, O Chorintianacha, tha ar cridhe air a dhèanamh farsaing.

12 Chan eil sibh ann an cumhangachd annainne, ach tha sibh ann an cumhangachd nur n-innibh fhèin.

13 A-nis mar ath-dhìoladh anns an nì sin fhèin (tha mi a’ labhairt mar rim chloinn), bithibh-se farsaing mar an ceudna.

14 Na cuing-cheanglar gu neo-chothromach sibh maille ri mì-chreidmhich: oir ciod e caidreamh na fìreantachd ri neo-fhìreantachd? Agus ciod e comann an t-solais ris an dorchadas?

15 Agus ciod an rèite a tha aig Crìosd ri Belial? No ciod i cuid a’ chreidmhich, maille ri ana-creidmheach?

16 Agus ciod a’ cho-rèite a tha aig teampall Dhè ri iodhalan? Oir is sibhse teampall an Dè bheò; a rèir mar a thubhairt Dia, Gabhaidh mise còmhnaidh annta, agus gluaisidh mi nam measg; agus bidh mise am Dhia acasan, agus bidh iadsan nan sluagh agamsa.

17 Uime sin thigibh a-mach as am meadhon, agus dealaichibh riu, tha an Tighearna ag ràdh, agus na beanaibh ris an nì neòghlan; agus gabhaidh mise am ionnsaigh sibh,

18 Agus bidh mi am Athair dhuibh, agus bidh sibhse nur mic agus nur nigheanan dhòmhsa, tha an Tighearna uile-chumhachdach ag ràdh.