2 Coríntios 8

1 A-nis, a bhràithrean, tha sinn a’ toirt fios dhuibh air gràs Dhè, a thugadh do eaglaisean Mhacedònia:

2 Eadhon gu robh, ann am mòr-dhearbhadh àmhghair, pailteas an aoibhneis, agus doimhne am bochdainn, ro-phailt a-chum saoibhreas am fialaidheachd.

3 Oir tha mi a’ toirt fianais gu robh iad uapa fhèin toileach a rèir an comais, seadh, thar an comas:

4 A’ guidhe oirnne gu dùrachdach, gun gabhamaid an tìodhlac, agus co-roinn an fhrithealaidh do na naoimh.

5 Agus chan ann mar a shaoil sinne, ach thug iad iad fhèin air tùs don Tighearna, agus na dhèidh sin dhuinne a rèir toil Dhè:

6 Air chor is gun do chuir sinn impidh air Tìtus, a rèir mar a thòisich e roimhe, mar sin gun crìochnaicheadh e annaibhse an gràs sin fhèin mar an ceudna.

7 Uime sin mar a tha sibh pailt anns gach uile nì, ann an creideamh, ann an ùr-labhradh, agus ann an eòlas, agus anns an uile dhìcheall, agus nur gràdh dhuinne, bithibh pailt anns a’ ghràs seo mar an ceudna.

8 Chan eil mi a’ labhairt seo mar àithne, ach a-thaobh dùrachd dhaoine eile, agus a dhearbhadh treibhdhireas ur gràidh-se.

9 Oir is aithne dhuibh gràs ar Tighearna Iosa Crìosd, ged a bha e saoibhir, gidheadh gun do rinneadh bochd e air ur son-se, a-chum gum biodh sibhse saoibhir tre a bhochdainn-san.

10 Agus anns an nì seo tha mi a’ toirt mo chomhairle: oir tha seo tairbheach dhuibhse, a thòisich roimhe, chan ann a-mhàin air dèanamh, ach air a bhith togarrach o chionn bliadhna.

11 A-nis air an adhbhar sin coileanaibh an gnìomh; ionnas mar a bha sibh ullamh a-chum na toile, mar sin gum bi sibh ullamh a-chum coileanaidh as na bheil agaibh.

12 Oir ma bhios air tùs inntinn thoileach ann, gabhar ris a rèir mar a tha aig neach, agus chan ann a rèir nan nithean nach eil aige.

13 Chan ann a-chum gum biodh socair aig daoine eile, agus àmhghar agaibhse.

14 Ach a-thaobh co-cheartais, a-chum anns an àm seo a-nis gum bi ur pailteas-se na choileasachadh air an uireasbhaidh-san, agus mar an ceudna a-chum gum bi am pailteas-san na choileasachadh air ur n-uireasbhaidh-se, air chor is gum bi co-cheartas eadaraibh;

15 A rèir mar a tha e sgrìobhte, An tì a thionail mòran, cha robh anabarr aige: agus an tì a thionail beagan, cha robh easbhaidh air.

16 Ach buidheachas do Dhia, a chuir an cùram dùrachdach sin fhèin dur taobh-se ann an cridhe Thìtuis.

17 Oir gu deimhinn ghabh e ris an impidh; ach air dha a bhith na bu togarraiche, chaidh e de a thoil fhèin dur n-ionnsaigh.

18 Agus chuir sinne maille ris am bràthair aig a bheil a chliù anns an t-soisgeul feadh nan eaglaisean uile:

19 (Agus chan e seo a-mhàin, ach thaghadh e leis na h-eaglaisean mar an ceudna mar chompanach-turais dhuinne, leis an tìodhlac seo a fhrithealadh leinn a-chum glòir an Tighearna sin fhèin, agus a-chum foillseachadh ur n-inntinn ullaimh-se.)

20 A’ seachnadh seo, gun tugadh neach air bith mì-chliù dhuinn a-thaobh a’ phailteis seo a fhrithealadh leinn:

21 Air dhuinn a bhith a’ solar nithean ciatach, chan ann a-mhàin am fianais an Tighearna, ach mar an ceudna am fianais dhaoine.

22 Agus chuir sinn maille riu ar bràthair, a dhearbh sinn gu minig dùrachdach ann am mòran nithean, ach a-nis nas ro-dhùrachdaiche, a-thaobh an ro-earbsa tha aige asaibh-se.

23 Ma dh’fhiosraichear nì sam bith mu Thìtus, is e mo chompanach-sa e, agus mo cho-obraiche dur taobh-se: no mu thimcheall nam bràithrean, is iad teachdairean nan eaglaisean, agus glòir Chrìosd.

24 Uime sin nochdaibh dhaibhsan, agus am fianais nan eaglaisean, dearbhadh ur gràidh-se, agus ar n-uaill-ne dur taobh.