1 Agus an dèidh nan nithean sin, chunnaic mi ceithir aingil nan seasamh air ceithir oisinnean na talmhainn, a’ cumail ceithir ghaothan na talmhainn, a-chum nach sèideadh a’ ghaoth air an talamh, no air an fhairge, no air craoibh sam bith.

2 Agus chunnaic mi aingeal eile ag èirigh on àird an ear, aig an robh seula an Dè bheò: agus ghlaodh e le guth mòr ris na ceithir aingil, don tugadh cumhachd cron a dhèanamh air an talamh agus air an fhairge,

3 Ag ràdh, Na dèanaibh dochann air an talamh, no air an fhairge, no air na craobhan, gus an cuir sinn seula air seirbhisich ar Dè air clàir an aodainn.

4 Agus chuala mi àireamh na dream a sheulaicheadh: ceud agus dà-fhichead agus ceithir mìle, a sheulaicheadh de uile threubhan chloinn Israeil.

5 De threubh Iùdah sheulaicheadh dà-mhìle-dheug. De threubh Reubein sheulaicheadh dà-mhìle-dheug. De threubh Ghad sheulaicheadh dà-mhìle-dheug.

6 De threubh Aseir sheulaicheadh dà-mhìle-dheug. De threubh Nephtalim sheulaicheadh dà-mhìle-dheug. De threubh Mhanaseis sheulaicheadh dà-mhìle-dheug.

7 De threubh Shimeoin sheulaicheadh dà-mhìle-dheug. De threubh Lèbhi sheulaicheadh dà-mhìle-dheug. De threubh Isachair sheulaicheadh dà-mhìle-dheug.

8 De threubh Shabuloin sheulaicheadh dà-mhìle-dheug. De threubh Iòseiph sheulaicheadh dà-mhìle-dheug. De threubh Bheniàmin sheulaicheadh dà-mhìle-dheug.

9 An dèidh seo dh’amhairc mi, agus, feuch, sluagh mòr nach robh neach sam bith comasach air àireamh, de na h-uile chinnich, agus threubhan, agus shlòigh, agus theangaidhean, nan seasamh an làthair na rìgh-chathrach, agus an làthair an Uain, air an sgeadachadh le trusganan fada geala, agus pailm aca nan làmhan;

10 Agus ghlaodh iad le guth àrd, ag ràdh, Slàinte dar Dia-ne a tha na shuidhe air an rìgh-chathair, agus don Uan.

11 Agus sheas na h-aingil uile timcheall na rìgh-chathrach, agus nan seanairean, agus nan ceithir beò-chreutairean, agus thuit iad air an aghaidh an làthair na rìgh-chathrach, agus rinn iad adhradh do Dhia,

12 Ag ràdh, Amen: Moladh, agus glòir, agus gliocas, agus buidheachas, agus urram, agus cumhachd, agus neart gu robh dar Dia-ne gu saoghal nan saoghal. Amen.

13 Agus fhreagair aon de na seanairean, ag ràdh rium, Cò iad sin a tha air an sgeadachadh le trusganan fada geala? Agus cia as a thàinig iad?

14 Agus thubhairt mi ris, A Thighearna, tha fhios agadsa. Agus thubhairt e rium, Is iad seo iadsan a thàinig à àmhghar mòr; agus nigh iad an trusgain, agus rinn iad geal iad ann am fuil an Uain.

15 Uime sin tha iad an làthair rìgh-chathair Dhè, agus a’ dèanamh adhraidh dha a là agus a dh’oidhche na theampall: agus gabhaidh an Tì a tha na shuidhe air an rìgh-chathair còmhnaidh nam measg.

16 Cha bhi acras orra tuilleadh, no tart nas mò; cha mhò a bhuaileas a’ ghrian orra, no teas air bith.

17 Oir beathaichidh an t-Uan a tha am meadhon na rìgh-chathrach iad, agus treòraichidh e iad gu beò-thobraichean uisge: agus tiormaichidh Dia gach deur on sùilean.