1 Agus labhair an Tighearna ri Maois agus ri Aaron ann an tìr na h-Eiphit, ag ràdh.

2 Bidh am mìos seo dhuibh na thoiseach nam mìos: bidh e dhuibh na chiad mhìos na bliadhna.

3 Labhraibh-se ri coitheanal Israeil uile, ag ràdh, Air an deicheamh là den mhìos seo gabhaidh iad dhaibh fhèin gach duine uan, a rèir taigh an athraichean, uan airson taighe.

4 Agus ma bhios an teaghlach ro bheag airson uain, an sin gabhaidh esan agus a choimhearsnach as fhaisge da thaigh e, a rèir àireamh nan anaman; gach duine, a rèir a itheannaich, àirmhear leibh airson an uain.

5 Bidh ur n-uan gun ghaoid, fireann, bliadhna a dh’aois; as na caoraich no as na gobhair gabhaidh sibh e.

6 Agus gleidhidh sibh a-staigh e, gu ruig an ceathramh-là-deug den mhìos seo; agus marbhaidh co-chruinneachadh iomlan chloinn Israeil e anns an fheasgar.

7 Agus gabhaidh iad den fhuil, agus cuiridh iad i air an dà ursainn, agus air àrd-doras nan taighean, anns an ith iad e.

8 Agus ithidh iad an fheòil anns an oidhche sin fhèin ròiste le teine, agus aran neo-ghortaichte; maille ri luibhean searbha ithidh iad e.

9 Na ithibh a’ bheag dheth amh, no idir air a bhruitheadh ann an uisge, ach ròiste le teine: a cheann maille ra chasan, agus maille ra ghrealaich.

10 Agus chan fhàg sibh a’ bheag dheth gu madainn: agus na dh’fhàgar dheth gu madainn, loisgidh sibh le teine.

11 Agus mar seo ithidh sibh e; le ur leasraidh crioslaichte, ur brògan air ur casan, agus ur lorg nur làimh: agus ithidh sibh e le cabhaig; is i càisg an Tighearna a tha ann.

12 Oir thèid mise tro thìr na h-Eiphit air an oidhche seo, agus buailidh mi gach ciad-ghin ann an tìr na h-Eiphit, araon duine agus ainmhidh: agus an aghaidh diathan nan Eiphiteach uile cuiridh mi breitheanas an gnìomh; is mise an Tighearna.

13 Agus bidh an fhuil dhuibh mar chomharradh air na taighean anns a bheil sibh; agus nuair a chì mise an fhuil, thèid mi thairis oirbh, agus cha bhi a’ phlàigh oirbh a-chum ur milleadh nuair a bhuaileas mi tìr na h-Eiphit.

14 Agus bidh an là seo dhuibh mar chuimhneachan; agus gleidhidh sibh e na là-fèille don Tighearna air feadh ur ginealaichean; le òrdagh sìorraidh gleidhidh sibh e.

15 Seachd làithean ithidh sibh aran neo-ghortaichte; air a’ chiad là fhèin cuiridh sibh taois ghoirt a-mach as ur taighean; oir gach neach a dh’itheas aran gortaichte, on chiad là gus an seachdamh là, gearrar an t-anam sin as o Israel.

16 Agus air a’ chiad là bidh agaibh co-ghairm naomh, agus air an t-seachdamh là bidh agaibh co-ghairm naomh: obair sam bith cha dèanar orra, saor o na dh’ithear leis gach neach; sin a-mhàin nìthear leibh.

17 Agus cumaidh sibh fèill an arain neo-ghortaichte; oir air an là sin fhèin thug mise a-mach ur slòigh à tìr na h-Eiphit; uime sin coimheadaidh sibh an là seo nur ginealaichean, le òrdagh sìorraidh.

18 Anns a’ chiad mhìos, air a’ cheathramh-là-deug den mhìos anns an fheasgar, ithidh sibh aran neo-ghortaichte, gu ruig an ciad là ar fhichead den mhìos anns an fheasgar.

19 Rè seachd làithean chan fhaighear taois ghoirt nur taighean: oir ge bè neach a dh’itheas aran gortaichte, gearrar an t-anam sin fhèin as o choitheanal Israeil, co-dhiù as coigreach e, no neach a rugadh anns an tìr.

20 Nì air bith gortaichte chan ith sibh: nur n-àitean-còmhnaidh uile ithidh sibh aran neo-ghortaichte.

21 An sin ghairm Maois air seanairean Israeil uile, agus thubhairt e riu, Tàirngibh a-mach, agus gabhaibh dhuibh fhèin uan, a rèir ur teaghlaichean, agus marbhaibh a’ chàisg.

22 Agus gabhaidh sibh bad hiosoip, agus tumaidh sibh e anns an fhuil a tha anns an t-soitheach, agus beanaidh sibh don àrd-doras, agus don dà ursainn, leis an fhuil a tha anns an t-soitheach: agus cha tèid a h-aon agaibh a-mach air doras a thaighe gu ruig a’ mhadainn.

23 Agus thèid an Tighearna thairis a bhualadh nan Eiphiteach; agus nuair a chì e an fhuil air an àrd-doras, agus air an dà ursainn, thèid an Tighearna thairis air an doras, agus cha leig e leis a’ mhilltear teachd a-steach dur taighean gu ur bualadh.

24 Agus gleidhidh sibh an nì seo mar òrdagh dhuibh fhèin agus dur mic gu sìorraidh.

25 Agus tàrlaidh, nuair a thèid sibh a-steach don fhearann a bheir an Tighearna dhuibh, a rèir mar a gheall e, gun glèidh sibh an t-seirbhis seo.

26 Agus tàrlaidh, nuair a their ur clann ribh, Ciod as ciall dhuibh leis an t-seirbhis seo?

27 Gun abair sibh, Seo ìobairt càisg an Tighearna, a chaidh thairis air taighean chloinn Israeil anns an Eiphit, nuair a bhuail e na h-Eiphitich, agus a shaor e ar taighean-ne. Agus chrom an sluagh iad fhèin, agus rinn iad adhradh.

28 Agus dh’fhalbh clann Israeil, agus rinn iad mar seo; mar a dh’àithn an Tighearna do Mhaois agus do Aaron, mar sin rinn iad.

29 Agus air meadhon na h-oidhche sin fhèin bhuail an Tighearna gach ciad-ghin ann an tìr na h-Eiphit, o chiad-ghin Phàraoh a shuidh air a rìgh-chathair, gu ciad-ghin a’ chiomaich a bha ann an sloc a’ phrìosain; agus gach ciad-ghin ainmhidh.

30 Agus dh’èirich Phàraoh anns an oidhche, e fhèin agus a sheirbhisich uile, agus na h-Eiphitich uile; agus bha èigheach mhòr anns an Eiphit: oir cha robh taigh anns nach robh neach marbh.

31 Agus ghairm e air Maois agus air Aaron anns an oidhche, agus thubhairt e, Eiribh, rachaibh a-mach à meadhon mo shluaigh, araon sibhse agus clann Israeil: agus rachaibh, dèanaibh seirbhis don Tighearna, mar a thubhairt sibh.

32 Thugaibh leibh mar an ceudna ur treudan, agus ur buar, mar a thubhairt sibh, agus imichibh: agus beannaichibh mise mar an ceudna.

33 Agus thug na h-Eiphitich dian-sparradh don t-sluagh, a-chum gun cuireadh iad le cabhaig a-mach as an tìr iad; oir thubhairt iad, Is daoine marbha sinn gu lèir.

34 Agus ghabh an sluagh an taois mun do ghortaicheadh i, an amaran-fuinidh ceangailte nan aodach air an guaillean.

35 Agus rinn clann Israeil a rèir facal Mhaois: agus dh’iarr iad o na h-Eiphitich seudan airgid, agus seudan òir, agus aodach.

36 Agus thug an Tighearna deagh-ghean don t-sluagh ann an sùilean nan Eiphiteach, agus thug iad an coingheall dhaibh: agus chreach iad na h-Eiphitich.

37 Agus dh’imich clann Israeil o Rameses gu Sucot, mu thimcheall sia ceud mìle fear dan cois, a thuilleadh air cloinn.

38 Agus mar an ceudna chaidh iomadaidh de shluagh eile suas maille riu, agus treudan, agus buar, ro-mhòran sprèidhe.

39 Agus dh’fhuin iad den taois a thugadh a-mach as an Eiphit breacagan neo-ghortaichte, oir cha do ghortaicheadh i; do bhrìgh gun d’fhuadaicheadh iad a-mach as an Eiphit, agus nach b’urrainn iad fuireach, agus mar an ceudna nach do dheasaich iad biadh dhaibh fhèin.

40 A-nis b’i aimsir cuairt chloinn Israeil, a bha iad a chòmhnaidh anns an Eiphit, ceithir cheud agus deich-bliadhna-fichead.

41 Agus aig ceann nan ceithir cheud agus nan deich-bliadhna-fichead, air an là sin fhèin chaidh slòigh an Tighearna uile a-mach à tìr na h-Eiphit.

42 Is oidhche seo gu bhith air a coimhead gu h-àraidh don Tighearna, airson an toirt-san a-mach à tìr na h-Eiphit: seo an oidhche sin gu bhith air a coimhead don Tighearna le cloinn Israeil uile nan ginealaichean.

43 Agus thubhairt an Tighearna ri Maois agus ri Aaron, Seo òrdagh na càisge: Chan ith coigreach sam bith dhith.

44 Agus gach seirbhiseach duine, a cheannaicheadh le airgead, nuair a thimcheall-ghearras tu e, an sin ithidh e dhith.

45 Chan ith coigreach no seirbhiseach tuarasdail dhith.

46 Ann an aon taigh ithear i: cha ghiùlain thu a’ bheag den fheòil a-mach as an taigh; cha mhò a bhriseas sibh cnàimh dhith.

47 Nì coitheanal Israeil uile sin.

48 Agus nuair a bhios coigreach air chuairt maille riut, agus a chumas e a’ chàisg don Tighearna, timcheall-ghearrar gach fireannach aige, agus an sin thigeadh e am fagas ga cumail, agus bidh e mar neach a rugadh anns an tìr: ach chan ith neach sam bith neo-thimcheall-gheàrrte dhith.

49 Bidh an t-aon lagh aigesan a rugadh anns an tìr, agus aig a’ choigreach a tha air chuairt nur measg.

50 Mar seo rinn clann Israeil uile; mar a dh’àithn an Tighearna do Mhaois agus do Aaron, mar sin rinn iad.

51 Agus, air an là sin fhèin, thug an Tighearna a-mach clann Israeil à tìr na h-Eiphit, a rèir an slògh.