Ecsodus 17

1 Agus dh’imich coitheanal chloinn Israeil uile o fhàsach Shin a rèir an turasan, mar a dh’àithn an Tighearna, agus champaich iad ann an Rephidim; agus cha robh uisge ann don t-sluagh ri òl.

2 Uime sin rinn an sluagh connsachadh ri Maois, agus thubhairt iad, Thoir dhuinn uisge a-chum is gun òl sinn. Agus thubhairt Maois riu, Carson a tha sibh a’ connsachadh riumsa? Carson a bhrosnaicheas sibh an Tighearna?

3 Agus mhiannaich an sluagh uisge ann an sin; agus rinn an sluagh gearan an aghaidh Mhaois, agus thubhairt iad, Carson seo a thug thu a-nìos sinn as an Eiphit, a-chum sinn fhèin a mharbhadh, agus ar clann, agus ar sprèidh le tart?

4 Agus dh’èigh Maois ris an Tighearna, ag ràdh, Ciod a nì mi ris an t-sluagh seo? Is beag nach eil iad gam chlachadh.

5 Agus thubhairt an Tighearna ri Maois, Imich ron t-sluagh, agus thoir leat cuid de sheanairean Israeil; agus do shlat leis an do bhuail thu an abhainn gabh ad làimh, agus bi ag imeachd:

6 Feuch, seasaidh mise romhad an sin, air a’ charraig ann an Hòreb, agus buailidh tusa a’ charraig, agus thig uisge a-mach aisde, a-chum gun òl an sluagh. Agus rinn Maois mar sin ann an sealladh seanairean Israeil.

7 Agus thug e mar ainm air an àite Masah agus Meribah, airson connsachadh chloinn Israeil, agus do bhrìgh gun do bhrosnaich iad an Tighearna, ag ràdh, A bheil an Tighearna nar measg, no nach eil?

8 An sin thàinig Amalec, agus chog e ri Israel ann an Rephidim.

9 Agus thubhairt Maois ri Iosua, Tagh a-mach dhuinn daoine, agus falbh a-mach, cog ri Amalec: a-màireach seasaidh mise air mullach an t-slèibh, agus slat Dhè am làimh.

10 Agus rinn Iosua mar a thubhairt Maois ris, agus chog e ri Amalec. Agus chaidh Maois, Aaron, agus Hur, suas gu mullach an t-slèibh.

11 Agus nuair a thog Maois suas a làmh, an sin bhuadhaich Israel, agus nuair a leag e sìos a làmh, bhuadhaich Amalec.

12 Ach bha làmhan Mhaois trom, agus ghabh iad clach, agus chuir iad foidhe i, agus shuidh e oirre: agus chùm Aaron agus Hur suas a làmhan, fear dhiubh air aon taobh, agus fear air an taobh eile: agus bha a làmhan seasmhach gu laighe na grèine.

13 Agus chlaoidh Iosua Amalec agus a dhaoine le faobhar a’ chlaidheimh.

14 Agus thubhairt an Tighearna ri Maois, Sgrìobh seo mar chuimhneachan ann an leabhar, agus aithris e ann an cluasan Iosua; oir dubhaidh mise as gu tur cuimhne Amaleic o bhith fo nèamh.

15 Agus thog Maois altair, agus thug e Iehòbhah-Nisi mar ainm oirre;

16 Oir thubhairt e, Do bhrìgh gun do mhionnaich an Tighearna gum bi cogadh aig an Tighearna ri Amalec o linn gu linn.