Êxodo 40

1 Agus labhair an Tighearna ri Maois, ag ràdh,

2 Air a’ chiad là den chiad mhìos cuiridh tu suas pàillean bùth a’ choitheanail.

3 Agus cuiridh tu ann àirc na Fianais, agus falaichidh tu an àirc leis an roinn-bhrat.

4 Agus bheir thu a-steach am bòrd, agus cuiridh tu an òrdagh na nithean a tha gu bhith air an cur an òrdagh air; agus bheir thu a-steach an coinnleir, agus lasaidh tu a lòchrain.

5 Agus suidhichidh tu an altair òir a tha a-chum na tùise fa chomhair àirc na Fianais, agus cuiridh tu brat an dorais ris a’ phàillean.

6 Agus suidhichidh tu altair na h-ìobairt-loisgte fa chomhair doras pàillean bùth a’ choitheanail.

7 Agus suidhichidh tu an soitheach-ionnlaid eadar bùth a’ choitheanail agus an altair, agus cuiridh tu uisge ann.

8 Agus cuiridh tu suas a’ chùirt mun cuairt, agus crochaidh tu suas am brat aig geata na cùirte.

9 Agus gabhaidh tu an ola-ungaidh, agus ungaidh tu am pàillean, agus gach nì a tha ann, agus naomhaichidh tu e, agus a shoithichean uile: agus bidh e naomh.

10 Agus ungaidh tu altair na h-ìobairt-loisgte, agus a soithichean uile: agus bidh an altair ro-naomh.

11 Agus ungaidh tu an soitheach-ionnlaid agus a chas, agus naomhaichidh tu e.

12 Agus bheir thu Aaron agus a mhic gu doras bùth a’ choitheanail, agus ionnlaididh tu iad le uisge.

13 Agus cuiridh tu air Aaron an t-aodach naomh, agus ungaidh tu e, agus naomhaichidh tu e; agus frithealaidh e dhòmhsa ann an dreuchd an t-sagairt.

14 Agus bheir thu leat a mhic, agus cuiridh tu còtaichean orra,

15 Agus ungaidh tu iad, mar a dh’ung thu an athair, agus frithealaidh iad dhòmhsa ann an dreuchd an t-sagairt; oir bidh gu deimhinn an ungadh-san dhaibh a-chum sagartachd shìorraidh air feadh an ginealaichean.

16 Agus rinn Maois a rèir gach nì a dh’àithn an Tighearna dha: mar sin rinn e.

17 Agus b’ann anns a’ chiad mhìos, anns an dara bliadhna, air a’ chiad là den mhìos, a chuireadh suas am pàillean.

18 Agus chuir Maois suas am pàillean agus dhaingnich e a bhuinn, agus chuir e suas a bhùird, agus chuir e a-steach a chroinn, agus thog e suas a phuist.

19 Agus sgaoil e a-mach am bùth os cionn a phàillein, agus chuir e còmhdach a’ bhùtha air os a chionn; mar a’ dh’àithn an Tighearna do Mhaois.

20 Agus ghabh e agus chuir e an Fhianais anns an àirc, agus chuir e na bataichean air an àirc, agus chuir e a’ chathair-thròcair air an àirc os a cionn.

21 Agus thug e an àirc a-steach don phàillean, agus chuir e suas brat a’ chòmhdaich, agus chòmhdaich e àirc na Fianais, mar a dh’àithn an Tighearna do Mhaois.

22 Agus chuir e am bòrd ann am bùth a’ choitheanail air taobh a’ phàillein mu thuath, an taobh a-muigh den roinn-bhrat.

23 Agus chuir e an t-aran ann an òrdagh air, ann an làthair an Tighearna, mar a dh’àithn an Tighearna do Mhaois.

24 Agus chuir e an coinnleir ann am bùth a’ choitheanail, thall fa chomhair a’ bhùird, air taobh a’ phàillein ris an àird a deas.

25 Agus las e na lòchrain ann an làthair an Tighearna, mar a dh’àithn an Tighearna do Mhaois.

26 Agus chuir e an altair òir ann am bùth a’ choitheanail, air beulaibh an roinn-bhrait,

27 Agus loisg e tùis chùbhraidh oirre, mar a dh’àithn an Tighearna do Mhaois.

28 Agus chuir e suas am brat aig doras a’ phàillein.

29 Agus chuir e altair na h-ìobairt-loisgte làimh ri doras pàillean bùth a’ choitheanail, agus thug e suas oirre an ìobairt-loisgte, agus an tabhartas-bìdh, mar a dh’àithn an Tighearna do Mhaois.

30 Agus chuir e an soitheach-ionnlaid eadar bùth a’ choitheanail agus an altair, agus chuir e uisge ann, a dh’ionnlad leis.

31 Agus dh’ionnlaid Maois, agus Aaron, agus a mhic, an làmhan agus an casan aige.

32 Nuair a bha iad gu dol a-steach do bhùth a’ choitheanail, agus gu teachd am fagas don altair, dh’ionnlaid iad iad fhèin, mar a dh’àithn an Tighearna do Mhaois.

33 Agus chuir e suas a’ chùirt timcheall a’ phàillein agus na h-altarach, agus chuir e suas brat geata na cùirte: mar sin chrìochnaich Maois an obair.

34 An sin chòmhdaich neul bùth a’ choitheanail, agus lìon glòir an Tighearna am pàillean.

35 Agus cha b’urrainn Maois dol a-steach do bhùth a’ choitheanail, a chionn gun do ghabh an neul còmhnaidh air, agus gun do lìon glòir an Tighearna am pàillean.

36 Agus nuair a dh’èirich an neul suas o mhullach a’ phàillein, chaidh clann Israeil air an aghaidh nan uile thurasan:

37 Ach mura d’èirich an neul suas, an sin cha do thriall iad gus an là anns an d’èirich e suas.

38 Oir bha neul an Tighearna air a’ phàillean anns an là, agus bha teine air anns an oidhche, ann an sealladh taigh Israeil uile, air feadh an uile thurasan.