3 ويَسُوعْ كَانْ يَعْرِفْ الِّي الآبْ عْطَاهْ سُلْطَة عْلَى كُلْ شَيْ، وإِنُّو جَاء مِنْ عَنْدْ اللَّهْ وبِشْ يِرْجَعْ لِلَّهْ. 4 وَلَّا قَامْ عَالعْشَاء، ونَحَّى بَرْنُوسُو، وخْذَا مَنْشْفَة واتْحَزِّمْ بِيهَا، 5 وصَبْ مَاء فِي بَانُو، وبْدَا يَغْسِلْ فِي سَاقِينْ التْلَامْذَة ويْنَشِّفْ فِيهُمْ بِالمَنْشْفَة المِتْحَزِّمْ بِيهَا.
12 وبَعْدْمَا غْسَلِّلْهُمْ سَاقِيهُمْ، لْبِسْ بَرْنُوسُو ورْجَعْ لِبْلَاصْتُو، وقَالِلْهُمْ: «يَاخِي فَاهْمِينْ الِّي عْمَلْتْهُولْكُمْ؟ 13 إِنْتُومَا تْنَادِيوْلِي يَا مُعَلِّمْ ويَا سِيدِي، وعَنْدْكُمْ الحَقْ عْلَى خَاطِرْنِي آنَا مُعَلِّمْ وسَيِّدْ. 14 إِذَا كَانْ آنَا المُعَلِّمْ والسَيِّدْ غْسَلْتِلْكُمْ سَاقِيكُمْ، مَالَا إِنْتُومَا زَادَا يِلْزِمْكُمْ تَغْسْلُوا سَاقِينْ بْعَضْكُمْ. 15 وهَانِي كُنْتِلْكُمْ مِثَالْ بَاشْ اتَّبْعُوهْ، وتَعْمْلُوا إِنْتُومَا زَادَا كِيمَا عْمَلْتِلْكُمْ. 16 الحَقْ الحَقْ نْقُولِلْكُمْ: العَبْدْ مُشْ أَعْظِمْ مِنْ سِيدُو، ولَا المَرْسُولْ أَعْظِمْ مِلِّي بَعْثُو. 17 مَادَامْكُمْ عْرَفْتُوا هَاذَا، صَحَّة لِيكُمْ كَانْ اطَّبْقُوهْ.