1 Aile musoilu, ai ye kolo ai cɛɛilu ma, kosa ni ii le doilu lani tɛ Alla la kuma la, ii ye kɛ lemɛniya mɔɔilu ri, ka fara ii musoilu tamanɲa la, hali kuma tɛ, 2 ii wa ai tamanɲa lakɔrɔsi waati mɛn na ai ye sɛninya ni gbiliya mɛn dɔ. 3 Ai la kenɲa kana fara ai masidi ɲa si la, ikomin ka ai kun dan, wala ka sanin don wala ka faanin dagbɛlɛnilu don, 4 kɔni ai jusu rɔ ko ye ɲumaya mɛn dokonni, a tɛ kɔrɔyala, a ye kɛ nii masumani ni nii sabarini le ri, Alla ri mɛn jate haan! 5 Wo le tɛrɛ kɛni a fɔlɔ muso sɛnimanilu lakeɲa fen di, mɛnilu jii lani tɛrɛ Alla rɔ. Ii koloni tɛrɛ ii la cɛɛilu ma 6 ikomin Iburahima la muso Saran tɛrɛ koloni a ma ɲa mɛn ma, a tɛrɛ ye a kilila le ko, «N tii.» Wo denmusoilu le ai ri, ni ai ka koɲuma kɛ, ai tɛ silanna foyi ɲɛrɔ.

7 Aile cɛɛilu fanan ye wo ɲa le ma, ai ye a kɛ hankili la ai ni ai muso wa kɛ ai la dunuɲaratɛɛ kɛla ai ɲɔɔn fɛ, ka ii gbiliya baa ii faribanku fanka ma se ai ta rɔ, baa ai ni woilu bɛɛ ri nii lakisi sɔlini sɔrɔn ai cɛyala. Wo rɔ, foyi tɛ ai la Alla matara lalɔ.

8 Nba, aile bɛɛ ye to hankili kelen dɔ, ka kininkinin, ka ai ɲɔɔn kanin badenmaya la, ka ɲumaya ai ɲɔɔn na, ka ai jɛrɛ majii. 9 Ai kana kojuu sara kojuu la, ka nanili sara nanili la, kɔni ai ye duwawu kɛ, ka a masɔrɔn Alla ka ai kili wo le ma kosa ai ye baraka sɔrɔn ai cɛɛya la. 10 Baa,

«Siimaya duman mɛn yɛ,

mɛn ye siimaya ɲuma fɛ,

wo tii ye a nɛn mira kuma juuilu ma,

ka a da mira wuya ma,

11 ka a kɔnkɔ don kojuu la,

ka koɲuma kɛ,

ka jususuma ɲinin,

ka bila a kɔfɛ.

12 Maari ɲa ye mɔɔ telenniilu la,

a tolo malɔni ii la matarali kan na.

Kɔni Maari kɔnkɔ donni kojuu kɛlailu la.»*

13 Ni koɲuma kunfan ye ai la, yon di se kojuu kɛla ai la? 14 Kɔni hali ni ai wa tɔrɔ ai la baara ɲumailu la ko rɔ, sɛwa le wo ri ai yɛ. Ii ye silanna mɛn ɲɛrɔ, ai kana silan wo ɲɛrɔ, ai kana kɔndafili. 15 Kɔni ai ye Ɲenematɔmɔnin gbiliya ai Maari ri ai jusu rɔ. Ai ye to rabɛnni ai kun mafɔ ko la ka bɛn ai jii ma, ii wa ai maɲininka waati mɛn na. 16 Kɔni ai ye a kɛ sabarini ni gbiliya rɔ. Ai ye to kɔnɔgbɛya rɔ waati bɛɛ kosa ai wa kɛ baara ɲumailu kɛla Ɲenematɔmɔnin na ko rɔ, mɔɔ mɛnilu ye ai mafɔla, woilu ye maloya ii la kumailu la. 17 Ka a masɔrɔn ni Alla sawo le, a ka fisa mɔɔ ye tɔrɔ koɲuma kɛ diya sani a ye tɔrɔ a juuman kɛ diya. 18 Baa Ɲenematɔmɔnin faara le an julumunilu la ko rɔ siɲa kelen haan habadan, ale mɔɔ telennin telenbaliilu yɛ, kosa a ye na ai ri Alla ma. Mɔɔilu ra a faa ten faribanku rɔ, kɔni Alla ka a lakɛndɛya, Nii Sɛniman na baraka le rɔ. 19 Wo Nii Sɛniman fɛ, a wara kawandi bɔ diya nii kasola mɔɔilu yɛ, 20 mɛnilu tɛrɛ ra murunti Alla ma a damira, Alla tɛrɛ ye makɔnɔla Nuhan na teleilu rɔ, a la diɲɛ rɔ, a tɛrɛ ye kulun nadanna waati mɛn na. Mɔɔ dɔndɔ le dɔrɔn kisira ji ta fan fɛla ma, wo kɔndɔ, mɔɔ seyin gbansan. 21 Wo ji kɛni sun ji rɔ misali le ri ai tubi kanma mɛn ye ai fanan nakisila sisɛn. A kɛni tɛ faribanku nɔɔni bɔ fen di, kɔni dakan ta Alla yɛ kɔnɔgbɛya rɔ. Wo sun ji rɔ le ai lakisila sisɛn Isa Ɲenematɔmɔnin nawuli fɛ mɛn bɔra saya rɔ, 22 mɛn wani harijeene, ka a sii Alla bolokinin ma mɛlɛkailu ni setiilu ni fankamailu bɛɛ kun na.