1 Wo le rɔ, ikomin Ɲenematɔmɔnin da tɔrɔ a faribanku rɔ, ai fanan ye ai rabɛn wo hankili kelen na, ka a masɔrɔn mɛn da tɔrɔ faribanku rɔ, wo ni julumun da fara. 2 Wo tii tɛ a la siimaya kɛla adamadenilu la kunfan koilu rɔ butun fo Alla sawo. 3 Ka a masɔrɔn ai tɛrɛ ra mɛn lemɛniyabaliilu diyanan koilu kɛla waati taminnin dɔ, ka ai sɛɛbɛ don ko haramuninilu ni kunfan juuilu ni dɔlɔ min ni haramuya sumunilu ni dɔlɔ min sumunilu ni joo bato kɔsɔni ma. 4 Wo rɔ, a ye kɛla ii latɛrɛnna ko ri baa ai tɛ ai borila ii kɔfɛ butun hankilidɔɔya ko ba siyaman ɲinilu rɔ, ka ai lafɛya. 5 Kɔni ii ri ii dantɛ Alla yɛ ko wo rɔ, mɛn dabɛnni mɔɔ faaniilu ni niilamailu kiti ko la. 6 Wo le rɔ, Alla la kuma Kibaro Ɲuma ra lase hali mɔɔ faaniilu ma, kosa ni ii faribanku koilu wa ban makitila ikomin adamadenilu bɛɛ, ii ye to nii lakisi rɔ Alla fɛ ka bɛn Nii Sɛniman na ko ma.

7 Koilu bɛɛ laban da madon. Wo rɔ, ai ye a kɛ hankili la, ka ai jɛrɛ mira kosa ai ye se Alla matarala. 8 Wo bɛɛ rɔ, ai ye sɛɛbɛ don kaninteya ma ai ɲɔɔn yɛ, ka a masɔrɔn kaninteya le julumun siyaman banna.* 9 Ai ɲɔɔn jiya hali ai tɛ ai makasila. 10 Alla ka sɔlifen mɛn di ai kelen kelenna bɛɛ ma, ai ɲɔɔn dɛmɛn wo fanan na. Wo rɔ, ai ye kɛ le Alla la baaraden ɲumailu ri mɛnilu ye a hina suilu bɛɛ labaarala. 11 Ni mɛn ka kuma ta, wo ye kuma ikomin a ye Alla la kumailu le jɛrɛ fɔla. Ni mɔɔ do ye walila doilu yɛ, a ye wali ikomin Alla ye a sɔla fanka la ɲa mɛn ma, kosa gbiliya ye di Alla ma ko bɛɛ rɔ Isa Ɲenematɔmɔnin baraka rɔ. Gbiliya ni fanka ye di ale le ma habadan haan habadan. Amina.

12 N kaninteilu, tɔrɔ gbɛlɛnnin mɛn ye ai tɔrɔla, wo kana ai latɛrɛn, ikomin ko dahabali do ri ai bɔ. 13 Kɔni ni ai ni Ɲenematɔmɔnin tɔrɔra an ɲɔɔn fɛ, ai ye sɛwa wo rɔ, kosa a la gbiliya wa bɔ kɛnɛma tuma mɛn na, a ni aile ye sɛwa haan. 14 Ni ii ka ai nani Ɲenematɔmɔnin tɔɔ la ko rɔ, sɛwa ai yɛ wo rɔ, ka a masɔrɔn Alla la Nii Sɛniman gbiliyani ye tola ai rɔ. 15 Adon, aile do si kana tɔrɔ baa ai ra kɛ mɔɔ faala ri wala son, wala kojuu kɛla, wala nafi. 16 Kɔni ni ai tɔrɔra baa Isa la mɔɔ le ai ri, maloya tɛ wo rɔ, fɔɔ ai ye Alla gbiliya, baa a tɔɔ ra to ai kun na.

17 Ka a masɔrɔn kiti la waati ra se, a ye damirala Alla la jama le ma. Adon, ni a ye damirala ande le ma, mɛnilu ye ii banna Alla la kuma Kibaro Ɲuma mirala woilu le laban mɔɔilu ri? 18 «Ni mɔɔ telenni ri kisi dɔrɔn, Alla lɔnbaliilu ni kojuukɛlailu woilu ye tola di?»* 19 Wo rɔ, mɛnilu tɔrɔla Alla sawo rɔ, woilu ye ii jɛrɛ sɔnɔmɛilu to ii Danni Maari bolo mɛn telenni, ii ye to ko ɲuma kɛla.