1 N ye lemɛniya jama mɔɔbailu fanan madiyala ai tɛma ka a masɔrɔn n fanan kɛni jama mɔɔba do le ri ikomin iile, a ni Ɲenematɔmɔnin na tɔrɔya sereya do. Gbiliya mɛn natɔ bɔla kɛnɛma, n fanan di wo do sɔrɔn. 2 Ai ye ai janto Alla la kolofen kuru rɔ, a ka mɛn karifa ai la. Ai diyagboyanin kana ii mafɛnɛ le, kɔni niilifen ɲuma ye Alla sawo rɔ. Ai kana a kɛ malobaliya koilu tɔnɔ sɔrɔn ma kɔni fo ai sɛbɛ. 3 Mɛnilu karifani ai la, ai kana nɔya kɛ woilu la ikomin kuntiilu, kɔni ai ye a kɛ misali ri kuru yɛ. 4 Kolofen Gbɛngbɛnna Kuntii wa bɔ kɛnɛma waati mɛn na, ai ri mansaya tɔɔmasere fula sɔrɔn gbiliya rɔ mɛn tɛ tiɲanna muumɛ.

5 Kanberenilu, ai fanan ye kolo mɔɔbailu ma. Ai bɛɛ ye ai fanmajii ii yɛ ikomin faanin wa kɛ ai ɲɔɔn kan. Ka a masɔrɔn, «Alla ye a jɛrɛ wulila wasolailu kanma, kɔni a ye sɔli donna jɛrɛ majiilailu la.»* 6 Ai ye ai majii Alla fanka kɔrɔ, kosa a ye ai mayɛlɛ a diyanan waati rɔ. 7 Ai ye ai hamin koilu bɛɛ to a ma, ka a masɔrɔn a ri a janto le ai ko.

8 Ai ye ai jɛrɛ mira, ka a kɛ ai hankilila, ka a masɔrɔn ai juu Ibulusa ye taamanna ikomin yara mɛn ye wurundula. A ye mɔɔilu ɲininna a ye mɛnilu dɔɔnna. 9 Ai ye ai ban a rɔ, ka to lemɛniya rɔ gben. Ai ye a lɔn ko wo tɔrɔ suilu ye ai badenmailu fanan kan dunuɲa yɔrɔ bɛɛ rɔ. 10 Ai wa tɔrɔ waati do rɔ, Alla hina bɛɛ tii mɛn ka ai kili habadan gbiliya rɔ Ɲenematɔmɔnin dɔ, wo jɛrɛ ri ai lawuli, ka fanka di ai ma, ka ai kologbɛlɛnya, ai ma yɛrɛyɛrɛ. 11 Fanka ye to ale le la habadan! Amina.

12 Silasi, n ye mɛn jatela badenma kɔnɔrɔdi ri, wo le ka n dɛmɛn bataki kundunyanin ɲin sɛbɛla ai ma, kosa n ye ai lalemɛniya, ka sereya bɔ ai yɛ, ko Alla la sɔlini tuɲa le ɲin di, ai ye mɛn dɔ gben! 13 Lemɛniya jama mɛn ye Babilɔni so kɔndɔ,* Alla ka mɛnilu suwandi ikomin ai le, woilu ye ai tuwala. N dencɛ Marika fanan ye ai tuwala. 14 Ai ye ai ɲɔɔn tuwa badenmaya sunbuli rɔ.

Alla ye jususuma di ai bɛɛ ma ai le mɛnilu ye Ɲenematɔmɔnin dɔ.