1 Sɛbɛ ɲin farani lemɛniya mɔɔilu la dɛkuru mɔɔbakɔrɔ le la. N ye a lawala n badenmuso ma, Alla ka mɛn suwandi, a ni a denilu. Ai bɛɛ duman n yɛ, baa an bɛɛ ye taamanna ka bɛn Alla la tuɲa la ma. Kɔni n kelen tɛ. Mɛnilu ka tuɲa wo lɔn, ai duman woilu bɛɛ yɛ. 2 An ye ai kaninna ka a masɔrɔn Alla la tuɲa ye an ni ai bɛɛ jusu rɔ. A ri to an jusu rɔ kadawu.

3 An Fa Alla ni a Dencɛ Isa Ɲenematɔmɔnin di hina yiraka an na, ka kininkinin an ma, ka jususuma di an ma. Ii ri woilu bɛɛ kɛ an yɛ, andeilu mɛnilu ye taamanna ka bɛn Alla la tuɲa ma, ka i ɲɔɔn kanin.

4 N sɛwani kosɛbɛ, baa n ka i den doilu yen, ii ye taamanna ka bɛn Alla la tuɲa ma ikomin an Fa Alla ka a fɔ an yɛ ɲa mɛn ma. 5 Awa, n badenmuso, n ye i madiyala sisɛn ko an bɛɛ ye i ɲɔɔn kanin. N ye mɛn sɛbɛla ɲin di, jamarili kura tɛ wo ri, baa wo fɔni an yɛ kɛbi a damira waati. 6 Ka i ɲɔɔn kanin, wo tɛ foyi ri fɔɔ ka Alla la jamariliilu labato. Ai ka jamarili mɛn mɛn kɛbi a damira waati, wo le ɲin di: Ai ye kaninteya sila taama.

7 Mɔɔ lafilila ka siya dunuɲa rɔ sisɛn. Woilu le tɛ ii lɔla a la ko Isa Ɲenematɔmɔnin nara dunuɲa rɔ ka kɛ adamaden di. Mɔɔ su wo ye mɔɔ lafilila le ri, a ni Ɲenematɔmɔnin juu. 8 Wo le rɔ, ai ye a kɛ koɲuma, sa ai kana bɔnɔ ai la baara tɔnɔ rɔ fɔɔ ka wo baarayi dafanin sɔrɔn.

9 Mɔɔ mɛn tɛ tola Ɲenematɔmɔnin na karan kan fɔɔ ka a ta la a kan, Alla tɛ wo tii dafɛ. Kɔni mɔɔ mɛn toni Ɲenematɔmɔnin na karan kan, Fa Alla ni a Dencɛ fila bɛɛ ye wo tii dafɛ.

10 Ni mɔɔ do nara ai wara, mɛn na karan ni Ɲenematɔmɔnin ta tɛ kelen di, ai kana wo tii lajiya ai wara. Hali ka a fo, ai kana sɔn wo ma, 11 baa ni mɔɔ mɛn ka mɔɔ su wo fo, wo tii ra don mɔɔ wo la kɛwali juuilu rɔ.

12 Nba, kuma siyaman ye n fɛ ka a fɔ ai yɛ, kɔni n tɛ a fɛ ka wo bɛɛ kɛ sɛbɛli ri. A lɔɔ ye n na ka wa bɔ ai fɛ, ka kuma ai yɛ ɲa ni ɲa. Ni wo kɛra, an na sɛwa ri kɛ sɛwa dafanin di.

13 Nba, Alla ka i badenma muso mɛn fanan suwandi yan, wo denilu ye i fola.