1 Kɔni wuya kelalaselailu tɛrɛ ye jama tɛma waati taminin. Wuya karanmɔɔilu fanan di yen ai tɛma. Ii ri wuya karanilu ladon ai tɛma gbundu rɔ mɛnilu ri mɔɔilu halaki haan ka ii ban ii Tii rɔ mɛn da ii kunka. Woilu ye halaki le kilila ii jɛrɛ ma jonna! 2 Mɔɔ siyaman di bila ii la ko haramuninniilu kɔfɛ, ka tuɲa sila lafɛya. 3 Karanmɔɔ ɲinilu ri ai labaara majuuwaya rɔ ii la kuma rabɛniilu fɛ ii la wasabaliya rɔ. Kɔni ii kiti ko ra damira bi tɛ wo ri, ii halaki ko tɛ mɛnna butun.

4 Mɛlɛka mɛnilu ka julumun kɛ waati taminin dɔ, Alla tɛ woilu latankala, kɔni a ka ii lafili jahanama rɔ, ka ii bila jɔlɔkɔ la dibi rɔ ii kiti lon ɲɛrɔ. 5 Mɔɔ fɔlɔilu dunuɲa rɔ, a ma woilu fanan natanka, a ka ji bɔni ba lana Alla lɔnbaliilu ma, kɔni a ka mɔɔ wɔrɔnwula le dɔrɔn nakisi a ni Nuhan mɛn tɛrɛ ye telenbaya la ko kawandili bɔla.* 6 Alla ka Sɔdɔmu ni Kɔmɔri soilu fanan halaki le ta la, ka ii kɛ buuri ri. A ka ii kɛ misali ri Alla lafililailu yɛ, ko mɛn natɔ kɛ diya ii yɛ.* 7 Alla ka Luti mɔɔ telenni fanan kunka le, mɛn jusu tɔrɔra wo sariyalɔnbaliilu ko haramuninilu la ko rɔ. 8 Baa wo mɔɔ telenni tɛrɛ siini ii tɛma, a sɔnɔmɛ telenni tora tɔrɔla lon lon ii la kojuuilu la ko rɔ, a tɛrɛ ye mɛnilu yenna, ka ii lamɛn. 9 Wo koilu le bɛɛ ye a yirakala ko Maari ka a lɔn a ri mɔɔ kunka tɔrɔya rɔ ɲa mɛn ma mɛn telennin, ka telenbaliilu mara ɲakankatan ɲɛrɔ kiti la lon kɔrɔ, 10 katarabi wo mɔɔilu ma, mɛnilu bilanin ko kɔsɔniilu kɔfɛ, ii faribanku diyanan koilu, ka murunti fanka bɛɛ kɔrɔ.

Wuya karanmɔɔ ɲinilu wakalinin, ii wasonin. Ii tɛ silanna gbiliya tiilu lafɛya la. 11 Hali mɛlɛka mɛnilu fanka ni sɛɛbɛ ka bon wuya karanmɔɔ ɲinilu ri, woilu tɛ wo suilu lafɛyala kiti rɔ Maari ɲakɔrɔ. 12 Kɔni mɔɔ ɲinilu ye koilu lafɛyala ii ma mɛnilu lɔn, ka kɛ ikomin sobo hankilidɔɔ mira ta mɛnilu ye halakila. Wo mɔɔilu halakila ikomin soboilu, 13 ii la telenbaliya bɛɛ ri sara ii la. A duman ii yɛ, ii ye wasa ii diyanan ko kɔrɔnilu bɛɛ la tele rɔ. Ii wa kɛ dɔɔnnin kɛla ai tɔrɔfɛ, maloya ni kunnajii le a ri, ka sɛwa ii diyanan koilu la. 14 Ii ye kaninkɛ ɲininna ii ɲa la. Ii tɛ wasala julumun dɔ muumɛ! Ii ye fankatanilu masɔmɔnna. Ii jusu dorinnin wasabalidaya koilu le la. Dankadenilu le ii ri. 15 Ii ra sila telenni bila, ka bila Beyɔri dencɛ Balami la sila kɔfɛ fili rɔ mɛn kaninna telenbaliya sara la. 16 Kɔni a ka mafɔli sɔrɔn a la ko masɔsɔ rɔ. A la fali mɛn ti se kumala, wo ka a mɔɔ kan nabɔ le, ka keladen fisamante lasa a la hankilidɔɔya rɔ.*

17 Wuya karanmɔɔ ɲinilu kɛni le ikomin tenke denka janin, ikomin fɔɲɔ ba ye duru mɛn tuntunna san ma, dibi ba le lamarani ii ɲɛrɔ. 18 Ii ye waso kuma fuuilu fɔla, ka mɔɔilu lakunfan faribanku diyanan ko haramunninilu la, mɛnilu gbansan ye ii sɔrɔnna mɔɔ filiniilu la. 19 Ii ye mɔɔilu lahidila hɔrɔya la, adon, ii le jɛrɛ ye kɔsɔ koilu jɔnya rɔ. Ka a masɔrɔn foyi wa se mɔɔ la, a ri kɛ wo jɔn di. 20 Ni ii ra matanka dunuɲa kɔsɔ koilu ma an Maari ni an Nakisila Isa Ɲenematɔmɔnin lɔn ko rɔ, ka ii sɔn fanan wo koilu ye se ii la, ii la ban tun di juuya ka tamin ii la fɔlɔ la. 21 Baa a tun ka fisa wo tiilu kana telenbaya sila lɔn, sani ii ye a lɔn ka ii kɔnkɔ don jamari sɛniman na ii ka mɛn sɔrɔn. 22 Mɛn kɛni ii la, wo ra sanda ɲinilu tuɲa yiraka ko, «Wulu ye a kɔsɛla a baji ma le,»* a ni «I wa kɔsɛ mako dɔrɔn, a ri wa a makurukuru bɔɔ rɔ.»