1 Wo rɔ, ikomin ai ni Mɔɔ Ɲenematɔmɔnin da wuli saya rɔ, ai ye harijeene koilu ɲinin, Ɲenematɔmɔnin siini Alla bolokinin ma yɔrɔ mɛn dɔ. 2 Ai ye ai miri harijeene koilu ma, ai kana ai miri dunuɲa koilu ma. 3 Ka a masɔrɔn ai ra sa, ai la dunuɲaratɛɛ dokonni Mɔɔ Ɲenematɔmɔnin dɔ Alla fɛ. 4 Mɔɔ Ɲenematɔmɔnin wa bɔ kɛnɛma, ale mɛn ye ai la dunuɲaratɛɛ ri, ai fanan di bɔ a tɔrɔfɛ a la gbiliya rɔ.

5 Wo le rɔ, dunuɲa kojuu mɛnilu ye ai rɔ, ai ye woilu faa ai jusu rɔ: kaninkɛ, kɔsɔ koilu, kunfan juuilu, diyanan kojuuilu, a ni nata, mɛn kɛni joo bato ri. 6 Sɔn su ɲinilu ye Alla la duɲa lanala kuma mirabaliilu ma. 7 Ai fanan jɛrɛ tɛrɛ taamanna wo ɲa le ma ai tɛrɛ ai la dunuɲaratɛɛ kɛla a rɔ.

8 Kɔni sisɛn, ai ye wo koilu bɛɛ boloka: duɲa, jusumaya, juuya, mɔɔ tɔɔtiɲanni, a ni kuma juu mɛn ye bɔla ai da rɔ. 9 Ai kana wuya fɔ ai ɲɔɔn yɛ ka a masɔrɔn ai ra ai cɛɲa kɔrɔman bila a ni a kɛwaliilu. 10 Ai ra cɛɲa kura damira mɛn ye tola rabɛnna Alla lɔn dɔ, haan a ye kɛ a danɲa munuɲa ri. 11 Wo danni kura rɔ, Kirɛkikailu ni Judiyailu, kanberenilu ni faanintakɛbaliilu, londanilu ni ɲamakabaliilu, jɔnilu ni hɔrɔilu, Ɲenematɔmɔnin ye fen bɛɛ le ri bɛɛ yɛ, fanka ye a la ko bɛɛ rɔ.

12 Wo le rɔ, baa Alla ra ai ɲenematɔmɔn, ka ai kɛ a diyanan jama sɛniman di, ai ye kininkinin ni ɲumaya ni fanmajii ni jusu ɲumaya ni sabari ta. 13 Ai ye diɲɛ ai ɲɔɔn yɛ, ka ai ɲɔɔn makoto, ni do ka ko kɛ a duɲɔɔ la. Ai ye ai ɲɔɔn makoto ikomin Maari Alla ra ai makoto ɲa mɛn ma. 14 Ai ye kaninteya la woilu kan, mɛn ye ii bɛɛ dafala. 15 Mɔɔ Ɲenematɔmɔnin na jususuma ye sabati ai jusu rɔ. Baa Alla ka ai kili wo le fɛ, ka ai kɛ faribanku kelen di. Ai ye kɛ waliɲuma lɔnna ri. 16 Mɔɔ Ɲenematɔmɔnin na kuma ye to ai bɛɛ jusu rɔ, a diya bɛɛ rɔ, ka ai ɲɔɔn karan, ka ai ɲɔɔn nali lɔnnin bɛɛ la, a ni Yaburi kumailu ni kalamanilu ni Alla tando kalaman sɛnimanilu la, ka baraka bila Alla yɛ ai jusu rɔ. 17 Ai ye mɛn bɛɛ kɛla wala ka a fɔ, ai ye wo bɛɛ kɛ Maari Isa tɔɔ rɔ, ai ye baraka bila Fa Alla yɛ a baraka rɔ.

18 Musoilu, ai ye kolo ai cɛɛilu ma ikomin a bɛnnin musoilu ma ɲa mɛn ma Maari ɲakɔrɔ.

19 Cɛɛilu, ai ye ai musoilu kanin, ai kana juuya ii la.

20 Denilu, ai ye ai sɔrɔnbailu la kumakan mira ko bɛɛ rɔ, ka a masɔrɔn wo le duman Maari yɛ.

21 Den failu, ai kana ai denilu lamɔnɛ kosa ii kana tunnagboya.

22 Jɔnilu, ai ye ai tiilu kumakan mira ko bɛɛ rɔ mɛnilu ye ai kun na dunuɲa rɔ. Ai kana baara ii ɲakɔrɔ gbansan, kosa ai ye diya ii yɛ, kɔni ai ye baara jusu ɲuma la Maari gbiliya ko rɔ. 23 Ai wa kɛ ko ko kɛla, ai ye a kɛ ai jusu bɛɛ rɔ ikomin ai ye a kɛla Maari yɛ ɲa mɛn ma kɔni mɔɔilu tɛ. 24 Baa ai ka a lɔn, ko ai ri ai sara sɔrɔn Maari bolo, a ka cɛ mɛn namara a la jama yɛ. Ai tii le Mɔɔ Ɲenematɔmɔnin di ai ka kan ka baara mɛn yɛ. 25 Mɛn wa baara telenbaliya rɔ, a ri telenbaliya sara sɔrɔn, baa Alla tɛ mɔɔilu lafisayala ii ɲɔɔn ko.