1 Nde Pɔli mɛn kɛni Isa Ɲenematɔmɔnin na talibidenba ri Alla sawo rɔ, nde le ɲin sɛbɛla jama sɛniman ma Ɛfɛsi so kɔndɔ, lemɛniya mɔɔ mɛnilu ye Isa Ɲenematɔmɔnin dɔ. 2 An Fa Alla ni an Maari Isa Ɲenematɔmɔnin ye sɔli ni jususuma di ai ma.

3 An ye baraka bila an Maari Isa Ɲenematɔmɔnin Fa Alla yɛ mɛn ye nii duwawu bɛɛ latɛɛla an ma sankolo rɔ a la Mɔɔ Ɲenematɔmɔnin dɔ. 4 Yani dunuɲa ye dan waati mɛn na, Alla tun da an suwandi Ɲenematɔmɔnin dɔ kosa an ye sɛninya, ka to fɛɛtaɲa rɔ a ɲakɔrɔ. 5 Alla tɛrɛ ra a latɛɛ a la kaninteya rɔ ko a ri an nabɔ a rɔ a denilu ri Isa Ɲenematɔmɔnin baraka rɔ ikomin a duman a yɛ a jɛrɛ sawo rɔ ɲa mɛn ma. 6 Wo kɛra Alla la gbiliya hina ba tando kun di a sɔnda ka mɛn di an ma a diyanan Dencɛ fɛ.

7 Ka a masɔrɔn an da kunka Isa jeli fɛ,* ka an julumunilu kafari, ka fara a la hina ba la, 8 Alla ra mɛn nabɔn an ma sɔnɔya rɔ a la hankilimaya ni a la lɔnnin bɛɛ rɔ. 9 A ra a sawo gbundu ko lɛnkɛnɛmaya an yɛ, ka fara a diyanan ko la mɛn natɛɛra Isa baraka rɔ 10 kosa a ye wo lakanbali a waati wa se. Wo sawo le ten ko a ye fen bɛɛ ladɛn, mɛnilu ye sankolo ni duukolo kan, ka Ɲenematɔmɔnin to woilu bɛɛ kun na.

11 An suwandinin fanan ka kɛ Alla ta ri Ɲenematɔmɔnin baraka rɔ, ikomin Alla tɛrɛ ra a latɛɛ an ma ɲa mɛn ma, Alla mɛn ye ko bɛɛ lakanbalila a jɛrɛ la latɛɛ ni a sawo rɔ. 12 Wo kɛnin de kosa andeilu mɛnilu fɔlɔ ra an jii la Ɲenematɔmɔnin dɔ, kosa an ye kɛ Alla la gbiliya tando kun di.

13 Aile fanan da to Ɲenematɔmɔnin dɔ, baa ai ra tuɲa kuma lamɛn, ai lakisi ko Kibaro Ɲuma, ai lara Ɲenematɔmɔnin na tuma mɛn na, Alla ka a la tɔɔmasere la ai kan, tɔɔmasere wo ye Nii Sɛniman de ri a ka ai lahidi mɛn na. 14 Nii Sɛniman kɛnin de ikomin Alla ka fen fɔlɔ mɛn don an bolo tɔɔmasere ri kosa an ye a lɔn ko an di wa cɛ sɔrɔn Alla la jama wa kunka waati mɛn na, ka Alla tando a la gbiliya rɔ.

15 Wo le rɔ, kɛbi n ka ai la lemɛniya ko lamɛn Maari Isa ma a ni ai la kaninteya jama sɛniman bɛɛ yɛ, 16 n ye baraka bilala Alla yɛ ai la ko rɔ waati bɛɛ, n wa kɛ Alla matarala ai yɛ. 17 N ye Fa Alla, gbiliya tii, matarala ai yɛ, an Maari Isa Ɲenematɔmɔnin na Alla kosa a ye a la Nii Sɛniman najii ai ma mɛn ye hankilimaya dila, ka koilu lɛnkɛnɛmaya kosa ai la Alla lɔn ye makafu. 18 N ye Alla matarala ai yɛ kosa ai ye koilu ɲayen ai jusu rɔ, ka gbɛ, kosa a ka ai kili jii mɛn ma, ai ye wo lɔn, a ka a cɛ nɔɔrɔ gbiliyanin mɛn to a la jama sɛniman yɛ, 19 a ni a fanka fisamantɛ andeilu lemɛniya mɔɔilu yɛ. Wo kɛni a fanka jɛrɛ le ri a ka mɛn nabaara a fanka ba rɔ 20 a ka Ɲenematɔmɔnin nawuli saya rɔ, ka a lasii a bolokinin ma sankolo rɔ. 21 A ka a to mansayailu ni setiiyailu ni fankamailu ni kuntiiyailu bɛɛ kun na pon, a ni tɔɔ mɛnilu bɛɛ ri se fɔla dunuɲa ɲin dɔ a ni waati natɔilu rɔ. 22 Alla ra fen bɛɛ to Ɲenematɔmɔnin sen kɔrɔ, ka a kɛ fen bɛɛ kun di lemɛniya jama kun na. 23 Lemɛniya jama kɛni de ikomin Ɲenematɔmɔnin faribanku, mɛn nakanbalinin ko bɛɛ rɔ, Ɲenematɔmɔnin mɛn ye ko bɛɛ lakanbalila ɲa bɛɛ ma.