1 Aile fanan, ai faanin de tɛrɛ a ri ai hakɛilu ni ai julumunilu la ko rɔ, 2 ai tɛrɛ ye taamanna mɛnilu rɔ ai tɛrɛ ye dunuɲa ɲin koilu rɔ waati mɛn na, a ni duu ni sankolo tɛmala jenailu kuntii, wo nii juu mɛn ye baarala Alla masɔsɔ mɔɔilu rɔ ten. 3 A damira, an fanan bɛɛ tɛrɛ ye an na dunuɲaratɛɛ kɛla le ikomin woilu, an bilanin tɛrɛ an faribanku sawo le kɔfɛ, an tɛrɛ ye an faribanku ni an miriyani natailu kɛla. Wo rɔ, ka fara an kɛɲa la, Alla la mɔnɛ le latɛɛnin tɛrɛ an ma ikomin toilu bɛɛ.

4 Kɔni Alla la kininkinin ka bon, a ra an kanin kaninteya ba rɔ. 5 Andeilu mɛnilu faani tɛrɛ an hakɛilu la ko rɔ, Alla ra an nii bila an dɔ Ɲenematɔmɔnin fɛ. Ai kisini Alla la hina le fɛ. 6 Alla ra andeilu ni Isa lawuli an ɲɔɔn fɛ saya rɔ, ka an sii an ɲɔɔn fɛ sankolo rɔ, 7 kosa a ye a la sɔli ba fisamantɛ yiraka waati natɔilu rɔ a la ɲumaya rɔ a ka mɛn yiraka an na Isa Ɲenematɔmɔnin baraka rɔ. 8 Ka a masɔrɔn ai kisinin Alla la hina le fɛ lemɛniya baraka rɔ. Wo farani tɛ ai le la, Alla la sɔlifen de wo ri. 9 Ai la karan tɔnɔ tɛ a ri, wo rɔ mɔɔ si ti se a jɛrɛ matɔɔla. 10 Alla baara nɔ le an di. A ra an dan Isa Ɲenematɔmɔnin baraka rɔ, kosa an ye baara ɲumailu kɛ, Alla tɛrɛ ra mɛnilu rabɛn an ɲɛrɔ, kosa an ye taama woilu kan.

11 Aile mɛnilu sɔrɔnni siya doilu tɛma, Judiyailu ka mɛnilu jate kojiikɛbaliilu ri faribanku fɛ mɔɔilu bolo la, n ye a labila ai la ai tɛrɛ ye ɲa mɛn ma a damira: 12 Ai tɛrɛ tɛ Ɲenematɔmɔnin dɔ wo waati rɔ. Ai tɛrɛ ma kan ka Isirayɛli cɛ sɔrɔn, Alla la jama. Londanilu le tɛrɛ ai ri. Teriya lahidi si tɛrɛ tɛ ai ni Alla tɛma. Jii si tɛrɛ tɛ ai ma, Alla tɛrɛ tɛ ai rɔ dunuɲa rɔ. 13 Kɔni sisɛn Isa Ɲenematɔmɔnin dɔ, aile mɛnilu mataani tɛrɛ ten, sisɛn ai ra madon a la Ɲenematɔmɔnin jeli fɛ. 14 Ale le ka bɛn nadon an bɛɛ tɛma. A ra Judiyailu ni siya gbɛrɛilu kɛ jama kelen di, a faribanku di kosɔn, ka wo dan tiɲan mɛn tɛrɛ ra an datala ɲangboya rɔ. 15 Ale le ka sariya ban a ni a la jamariilu ni tɔnilu, ka wo jama filailu bɛɛ kɛ mɔɔ kura kelen di a jɛrɛ rɔ, ka jususuma lana ii tɛma, 16 ka jama fila wo ni Alla tɛmala rabɛn a la saya rɔ ka faa gbɔngbɔn jiri kan, ii bɛnda ii ɲɔɔn ma ikomin faribanku kelen. Wo rɔ, Ɲenematɔmɔnin ka ii la ɲangboya tiɲan. 17 Isa nara, ka jususuma Kibaro Ɲuma lase ai ma, mɛnilu mataani tɛrɛ Alla la a ni Judiya mɛnilu madonni tɛrɛ a la. 18 Isa le sila lakala andeilu jama fila bɛɛ yɛ, ka wa Fa Alla ɲakɔrɔ Nii Sɛniman kelen baraka rɔ.

19 Wo le rɔ, aile mɛnilu tɛrɛ tɛ Alla la jama rɔ, londan tɛ ai ri butun. Ai ra kɛ duurenilu ri jama sɛniman dɔ. Ai ra don Alla la denbaya rɔ. 20 Ai ra kɛ ikomin bon mɛn ju siini kabailu la. Wo kabailu kɛni talibidenbailu ni kelalaselailu le ri. Isa Ɲenematɔmɔnin jɛrɛ le bon tonkon kaba bɛrɛ ri. 21 Bon yɔrɔ bɛɛ tuunnin ii ɲɔɔn na, ka yɛlɛ ale baraka rɔ, ka kɛ Alla batobonba sɛniman di Maari yɛ. 22 A ye ai ni doilu tuunna ai ɲɔɔn na ale baraka rɔ, ka kɛ ikomin bon Alla ye a siila mɛn kɔndɔ a la Nii Sɛniman dɔ.