1 Wo le rɔ, nde Pɔli, Isa Ɲenematɔmɔnin na kasoden, aile siya gbɛrɛilu la ko rɔ. 2 N lani a la, ai ra a lamɛn Alla ka hina mɛn natɛɛ n ma kosa n ye ai dɛmɛn. 3 Alla ra a la gbundu ko lɔnnin lɛnkɛnɛmaya n yɛ, ikomin n ka a la ko do sɛbɛ ai ma ɲa mɛn ma. 4 Ai wa n na bataki karan, n ka hankili mɛn sɔrɔn Ɲenematɔmɔnin na gbundu ko rɔ, ai ri wo ɲayen. 5 Gbundu ko ɲin ma lɛnkɛnɛmaya fɔlɔ mɔɔilu yɛ, kɔni sisɛn Alla ra a lɛnkɛnɛmaya a la talibidenba sɛnimanilu ni keladen fisamante sɛnimanilu yɛ Nii Sɛniman baraka rɔ. 6 Wo gbundu ko le ɲin di ko siya gbɛrɛilu ni Judiyailu ri cɛ kelen sɔrɔn Isa la ko Kibaro Ɲuma baraka rɔ, ka kɛ jama kelen di ikomin faribanku kelen, ii fila bɛɛ ri lahidi ɲin sɔrɔn Ɲenematɔmɔnin Isa baraka rɔ.

7 Alla ra a fanka labaara, ka n sɔ a la hina rɔ, ka n kɛ a la Kibaro Ɲuma baarakɛla ri. 8 Hali n dɔɔman mɔɔ sɛnimanilu bɛɛ ko, adon Alla ra a la hina latɛɛ n ma, ko n ye Ɲenematɔmɔnin na ko Kibaro Ɲuma nɔɔrɔ banbali lase siya gbɛrɛilu ma. 9 N ye a yiraka gbundu ko ɲin ye lakanbalila ɲa mɛn ma. Kɛbi waati taminninilu rɔ, gbundu ɲin dokonni tɛrɛ Alla rɔ mɛn ka fen bɛɛ dan, 10 kosa sisɛn mansayailu ni setiiyailu mɛnilu ye sankolo rɔ, lemɛniya jama ye Alla la hankilimaya kɛɲa bɛɛ yiraka woilu la. 11 Wo bɛɛ kɛni a la habadan ko latɛɛnin de ri, a ra mɛn nakanbali an Maari Isa Ɲenematɔmɔnin baraka rɔ. 12 Ale rɔ a ni lemɛniya a ma an di an madon Alla la sɔnɔya ni jusulatɛɛ rɔ. 13 Wo le rɔ, n ye ai madiyala, ai kana jiitɛɛ n na tɔrɔyailu la ko rɔ aile yɛ ka a masɔrɔn ai la gbiliya le woilu ri.

14 Wo le ka a kɛ, n ka n ɲɔnkin n Fa kɔrɔ 15 denbaya bɛɛ tɔɔ farani mɛn na mɛnilu ye sankolo ni duukolo kan. 16 N ye ai matarala ko ai ye sɔn ai la gbiliya nɔɔrɔ rɔ, ka ai sɛɛbɛ don fanka la ai la mɔɔya koilu rɔ a la Nii Sɛniman baraka rɔ, 17 kosa Ɲenematɔmɔnin ye to ai jusu rɔ lemɛniya baraka rɔ. N ye Alla matarala ai yɛ, ai ye sabati, ka gbɔngbɔn kaninteya rɔ ikomin lulu 18 kosa ai ni jama sɛniman bɛɛ ye fanka sɔrɔn ka Ɲenematɔmɔnin na kaninteya bonya ni a gbiliya ni a lɔdiya ni a jii famun, 19 ka a la kaninteya lɔn mɛn taminni lɔnnin bɛɛ la, kosa ai ye dafa Alla la ko dafanin bɛɛ rɔ.

20 Nba, Alla mɛn ye ko bɛɛ kɛla an yɛ ka fara a fanka la mɛn ye baarala an dɔ, an wa mɛn maɲininka hali an di se an mirila mɛn ma, hali ka tamin an miriyailu la pon, 21 gbiliya ye di wo ma lemɛniya jama rɔ, a ni Isa Ɲenematɔmɔnin dɔ, waati bɛɛ habadan haan habadan. Amina!