Kɨ navim giragha, Ikiavɨra Itir God nan osɨmtɨziba agɨvasa, a mɨzuai
1-6 3:1-6 Akɨnafarir kamɨn danganir mabar Jerusalem uabɨ akam akuri. Ezɨ saptan kamɨn, puvatɨ. Gumazir akam akurir kam, a Israelian gumazim, ana osɨmtɨzir a bativiziba ko osɨmtɨzir Israelian igharaz darazi bativizibar gun mɨkɨmasa. Aio! Ikiavɨra Itir God nan anɨngaghegha fofozim na ganɨngi,
ezɨ kɨ bar osɨmtɨzir ekiam ateri.
A na gamima kɨ bar tuavir mɨtatemɨn zui.
Kɨ bar angazangaritam itir puvatɨgha puram arui.
A dughiabar zurara mɨzaziba nararam anɨdi.
A gumazir igharaziba kamaghɨn arazitamɨn me gamizir puvatɨ.
A na mɨsogha, nan aghariba apɨragharɨghizɨ,
nan inivafɨzim bar amɨragha gavgaviba puvatɨ.
An osɨmtɨzir igharagha gariba na ganɨngizɨ
da na okarigha mɨzazim na gasi mati kɨ kalabusɨn iti.
A na gamizɨ kɨ bar mɨtater ekiamɨn aven iti,
mati gumazamiziba fomɨra ariaghiregha iti.
7-9 Bar guizbangɨra, a bar na okarizɨ, kɨ azenim giran ibura.
Mati me senɨn osɨmtɨzibar na ikezɨ kɨ kalabuziamɨn iti.
Kɨ zurara uabɨn akurvaghasa Ekiamɨn dei.
Ezɨ a tong bar kuarim atɨgha nan dɨmdiam barazir puvatɨ.
Ezɨ kɨ mangasava amir danganiba, ana da pɨri.
Mati me dagɨar dafaba nan tuavim apɨri.