25 "Eghtɨ ian gumazitam bar biziba puvatɨgh, dagɨaba bagh gumazir igharazim ateghtɨ, an an nguazim givezeghtɨ, an anabar gumazim an akuragh a givesɨ pura ikɨ, egh nguazir kam uam a givezegh uam a danɨngigh.25:25 Hibrun arazim, gumazitam osɨmtɨzim batogham, eghtɨ an anabatam an ganɨva egh akurvaghamin ingangarim iti. Bizir bar ekiar namakar kam damuamim, an osɨmtɨzim itir gumazimɨn nguazim givezam, eghtɨ nguazir kam an adarazir nguazimra. Nɨ Rut 3:9-13 ko 4:1-6, ko Jeremaia 32:6-12ɨn gan. Asaian Akɨnafarimɨn akar isɨn zuir mam ghaze, God a gumazir gumazamizibar ganɨva egh men akurvaghamin ingangarim itim. Nɨ uaghan, Aisaia 41:14 ko 43:14 ko 44:6 ko 44:24 ko 54:5 ko 60:16ɨn gan.
47 "Eghtɨ ikɨzir igharazibar gumazamizir ian tongɨn itibar tav, dagɨaba bar izɨvagham, eghtɨ ia Israelia, ian tav onganarazibagh amir gumazimɨn mɨn otoghɨva, a ikɨzir igharazimɨn gumazir kam ateghtɨ an a givezeghtɨ, an an ingangarir gumazir kɨnimɨn mɨn ikiam, o gumazir kamɨn tavɨn ingangarir gumazimɨn mɨn otogham. 48 Israelian gumazir kam kamaghɨn damigham, eghtɨ ia uam a givezeghtɨ, kamaghɨn deragham. An aveghbuatam, 49 o an afeziar dozim, o namakatam o anabatam, uam a givezeghtɨ deragham. Eghtɨ a uabɨ dagɨataba inigh, uabɨ uabɨ givezegh, egh ingangarir kurar kam atakigh.