1 Nan borim, nɨ nan akam baragh,

egh deraghvɨram nan akar gavgaviba isɨ uan navim datɨgh. Nan akar kaba bar pɨn ko.

2 Egh nɨghnɨzir aghuim anɨdir akaba baragh.

Egh nɨ fofozir aghuim inisɨ pamten ingar.

3 Egh nɨ nɨghnɨzir aghuim ko fofozir aghuim bagh azangsɨghtɨ aning nɨ bagh izam,

mati nɨ uabɨn akurvaghasa gumazir mamɨn dei.

4 Egh nɨ nɨghnɨzir aghuim bativsɨ pamtemɨn ingar, mati gumazim silvan nguazimɨn aven itim a buri,

egha mati gumazim bizir aghuir mongeziba, a da buri.

5 Egh nɨ bizir kabar amuva, egh nɨ Ikiavɨra Itir Godɨn apengan ikia an atiatir arazim bar a gɨfoghɨva,

egh nɨ bar deraghvɨra God gɨfogham.

6 ✝ 2:6 1 Atriviba 3:9; 3:12; Jems 1:5 Guizbangɨra, Ikiavɨra Itir God uabɨ nɨghnɨzir aghuim e ganɨdi.

Egha a fofozim ko deragha nɨghnɨzir arazimɨn mɨngarim.

7 Egha a gumazamizir arazir aghuibar gɨn zuiba, nɨghnɨzir aghuiba me ganɨdi.

Gumazamizir deraghavɨram aruiba, a bar deraghavɨra men garima me osɨmtɨziba puvatɨ.

8 ✝ 2:8 1 Samuel 2:9; Onger Akaba 66:9 God gumazamizibar gari, me gumazamizir igharaziba deragha arazir magh gariba me gami, ezɨ a deravɨra men gara men akura.

Egha gumazamizir an tuavimɨn gɨn zuiba, a deravɨra me geghufi.

9 Nan borim, nɨ nan akam bareghɨva, egh nɨghnɨzir aghuimɨn gɨn mangɨva, egh tuavir aghuir nɨ mangamim a gɨfogham.

Egh nɨ arazir aghuim gɨfoghɨva, egh uaghan arazir magh garimɨn gumazamizibar amuamin arazim gɨfogham.

10 Egh nɨ nɨghnɨzir aghuir avɨriba iniva,

nɨ uan fofozim bagh bar akuegham.

11 Nɨ deragh tuaviba tuisɨghamin arazim gɨfoghɨva egh tuavir aghuimɨn gɨn mangam.

Eghtɨ arazir kam, deravɨra nɨn ganam, mati nɨ dɨvazimɨn aven deravɨra iti. Eghtɨ fofozir aghuim nɨ geghuvam.

12 Eghtɨ nɨghnɨzir aghuim nɨn akurvaghtɨ,

nɨ gumazir arazir kurabagh amiba ko akar kurabav geibar gɨn mangan kogham.

13 Gumazir kaba tuavir aghuim ategha

tuavir mɨtatemɨn zui.

14 Egha me arazir kurabar amuasa bar akonge.

Egha arazir me amizir kam, me a bagha bar ifonge.

15 Gumazir kaba ifarava,

men araziba bar ikufi.

16 Eghtɨ gumazir igharazimɨn amuim nɨ ko dakusɨ apezeperir akabar nɨ mɨkɨmam,

eghtɨ nɨghnɨzir aghuim nɨn akuraghtɨ nɨ an akam baraghan kogham.

17 Kamagh garir amizim, fomɨra uan igiamra pamɨn ike, egha datɨrɨghɨn a gɨn amadagha anetaki.

A fomɨra Godɨn damazimɨn dɨkɨrɨzir akam datɨrɨghɨn a bakɨnɨghnɨki.

18 Nɨ amizir kamɨn gɨn an dɨpenimɨn ghua,

kar nɨ ovever tuavimɨn zui.

19 Gumazir a bagha zuiba, me ua izir puvatɨ.

Me ikɨrɨmɨrir aghuim bagha zuir tuavim ataki, egh ua izeghan kogham.

20 Kamaghɨn amizɨ, nɨ nɨghnɨzir aghuim ikɨva,

egh nɨ gumazir aghuibar tuavimɨn mangɨ, egh arazir aghuibar gɨn mangɨ.

21 ✝ 2:21 Onger Akaba 37:29 Eghtɨ gumazir aghuiba en nguazimɨn ikiam.

Eghtɨ arazir kuraba puvatɨzir gumaziba kagh ikɨ mamaghɨra ikiam.

22 Eghtɨ gumazim uan azenimɨn ogheba asi moghɨn,

God gumazir arazir kurabagh amiba asigh me batuegham.