1 Nan borim, nɨ deraghvɨra kuarim atɨgh nan akam baragh.

Kɨ nɨghnɨzir aghuim ko fofozir aghuim nɨ danɨngasa.

2 Eghtɨ nɨ deragh tuaviba tuisɨghamin arazim gɨfoghɨva egh tuavir aghuimɨn gɨn mangam.

Eghtɨ nɨn mɨgɨrɨgɨaba mati gumazim fofozir aghuim ikia mɨgei.

3 Nɨ fogh, amizitam uan pam ategh, nɨ gakueghsɨ, a nɨ apezeperɨva akar avɨribar nɨ mɨkɨmɨva egh nɨ gekuigham.

Eghtɨ an akaba zuimɨn mɨn bar isɨngigham.

4 Eghtɨ nɨ an mɨgɨrɨgɨabar gɨn mangɨghɨva, gɨn an akabagh nɨghnɨghtɨ da bar nɨn ikuvigham.

Amizir kamɨn akaba mati nɨ marasinɨn mɨsozim ame. Egha a uaghan mati mɨdorozir sabamɨn mɨn nɨ ginifi.

5 Ezɨ amizir kamaghɨn amim, a nɨn akua Gumazamizir Oveaghuezibar Nguibamɨn zui. Kar ovever tuavimra.

6 A ikɨrɨmɨrir aghuimɨn zuir tuavimɨn mangasa nɨghnɨzir puvatɨ.

A kamaghɨn fozir puvatɨ, a tuavir kuramɨn ghua pura zui.

7 Nan boriba, deraghvɨra kuariba arighɨva nan akam baragh,

ia akar kam bakɨnɨghnɨghan markɨ.

8 Nɨ bar amizir kamaghɨn amimɨn saghon ikɨ.

Egh nɨ an dɨpenimɨn tiar akamɨn boroghɨn mangan markɨ.

9 Nɨ a bagh mangɨgh, egh uan ziar aghuim gasɨghasigham.

Eghtɨ an pam nɨn apangkuvighan kogham. A nɨ mɨsueghtɨ nɨ uan igiamram ovegham.

10 Bizir aghuir nɨ pamtem ingara iniziba,

da gumazir igharazibar dafaribar mangɨgham.

11 Eghtɨ arɨmariam nɨ inightɨ nɨ bar agharim guragham.

Egh nɨ ovengamin dughiam, nɨ dakozimɨn irɨghɨv ikɨ mɨzazim iniva arangam.

12 Egh nɨ kamaghɨn mɨkɨmam, "Kɨ bar ongani. Kɨ manmaghsua otuegha aghuzir akabar aghua.

Me na akɨrasa mɨgeir akaba, kɨ da baraghan aghua.

13 Gumaziba aghuzir akabar na mɨgei,

ezɨ kɨ men akaba barazir puvatɨ.

14 Kɨ datɨrɨghɨn bar moghɨra ikufi,

egha gumazamizibar damazibar aghumsɨki."

15 Kɨ ua nɨ mɨgei, nɨ gumazir igharazimɨn mozir dɨpam aneman markɨ.

Nɨ uan amuimra ko ikɨ, egh anarɨra ko daku, mati gumazim uan mozir dɨpamram api.

16 Nɨ amizir igharaziba ko dakutɨ, me boriba bateghtɨ, borir kaba gɨn nɨn akuraghan kogham.

Nɨn amuimra nɨ bagh boriba batɨ.

17 Nɨ amizir igharaziba ko dakutɨ, nɨn boriba nɨn akurvaghan kogham.

Me gumazir nɨ fozir puvatɨzibar akurvagham. Arazir kam ikufi, nɨn boribara, nɨ ko ikɨ.

18 God nɨn amuim deraghvɨram a damutɨ, a mati nɨn mozir dɨpam,

eghtɨ nɨ a bagh bar akuegham.

19 An ganganim bar derazɨ an araziba bar aghungi.

Egha a bar nɨ gifonge, kamaghɨn amizɨ nɨ zurara a gɨnɨghnɨghɨva, egh bar a gifongegh. Egh nɨ zurara an otemning bagh bar akongegh.

20 Nan borim, nɨ manmaghsua gumazir igharazimɨn amuim gɨnɨghnɨghvɨra ikia a gifuegha, an otemningɨn suighasa?

Arazir kam bar ikufi.

21 ✝ 5:21 Aghuzir Akaba 4:26; Jeremaia 16:17; Hosea 7:2; Hibru 4:13 Nɨ fogh, Ikiavɨra Itir God nɨ amir biziba a bar dar gari,

egha bar deraghavɨra nɨn arazibar gara dagh fo.

22 Gumazimɨn arazir kuram,

ivemɨn mɨrara an suira, egha mati benimɨn mɨn a ikiagharɨki.

23 Kamagh amir gumazim, a uan ifongiam dɨkabɨrir puvatɨgha arazir bar onganim gami,

eghtɨ an arazir kamning a mɨsueghtɨ an aremegham.