1 Nɨghnɨzir aghuim, amizimɨn mɨn, uan dɨpenimɨn ingari.

Egha a gavgavim dɨpenim danɨngɨva egh anesɨngasa, 7plan guarir akɨnibar dɨghoribagh amigha da kuni.

2 Egha an asɨzim mɨsuegha dagheba isai, egha wain sara vereverezɨ, a isɨngi.

Egha a dagher dakozim akɨrigha gɨfa.

3 Egha uan ingangarir amiziba amangizɨ

me ghua nguibamɨn tongɨn danganir mɨghsɨamɨn tuivighav ikia kamaghɨn dɨa mɨgei,

4 "Ia gumazir nɨghnɨzir aghuiba puvatɨziba ko gumazir onganiba,

ia nɨghnɨzir aghuimɨn dɨpenimɨn izɨ.

5 Nɨghnɨzir aghuim ia mɨgɨa ghaze,

Ia izɨ nan daghebar amɨva, egh wainɨn dɨpar kɨ ia bagha veregha gɨvazimra amɨ.

6 Ia uan arazir onganiba atakigh, egh izɨ ikɨrɨmɨrir aghuim ini.

Egh ia nɨghnɨzir aghuimɨn tuavimɨn mangɨ."

7 Nɨ gumazir uabɨ fa dɨbovir akabav geim akɨram, an akar kuram nɨ ikaragham.

Eghtɨ nɨ gumazir kuram akɨram, a nɨ mɨsuegh nɨn mɨkarzim gasɨghasigham.

8 Kamaghɨn, nɨ akaba batozir gumazim akɨran markɨ. A bar nɨn aghuagh nɨn apanim damuvɨra ikiam.

Eghtɨ nɨ gumazir nɨghnɨzir aghuim itim akɨrightɨ, a nɨ gifuegham.

9 Nɨ gumazir nɨghnɨzir aghuim itim, akam a danɨngam, eghtɨ nɨghnɨzir aghuiba a gizɨv mangɨvɨra ikiam.

Egh nɨ gumazir aghuimɨn sure damutɨ, an fofozim ekɨv mangɨvɨra ikiam.

10 ✝Nɨ nɨghnɨzir aghuim inisɨ, nɨ faragh Ikiavɨra Itir Godɨn atiating an apengan ikɨ. God a bar deragha arazir kuratam an itir puvatɨ.

Nɨ fofozir aghuim inisɨ, nɨ faragh deraghvɨram a gɨfogh.

11 Nɨghnɨzir aghuim nɨ damutɨ nɨ dughiar ruarimɨn nguazimɨn ikɨva,

nɨ azenir avɨribar ikiam.

12 Nɨ nɨghnɨzir aghuim inigh, egh nɨ uabɨn akurvagham.

Egh nɨ uabɨ fɨ dɨbovir akabav kɨmɨva, egh nɨ uabɨra uabɨ gasɨghasigham.

13 Ezɨ arazir onganim mati amizir mam pura ifaghata tintinibar tiarim akari.

Egha arazir aghuim gɨfozir puvatɨ.

14 Ezɨ an dɨpenim nguibamɨn tongɨra danganir pɨn itimɨn iti.

Ezɨ a tiar akamɨn boroghɨn aperaghav iti.

15 Egha gumazamizibar gari, me uan ingangariba bagha zui,

ezɨ a uabɨn bighan izasa men dei. A kamaghɨn mɨgei,

16 "Ia gumazir nɨghnɨzir aghuiba puvatɨziba ko gumazir onganiba,

ia nan dɨpenimɨn aven izɨ!

17 Dɨpar nɨ okemeghamim, a bar isɨngigham.

Eghtɨ dagher nɨ modogh damamim, a uaghan bar isɨngigham."

18 Ezɨ gumazir an akam baraziba, me fozir puvatɨ, an dɨpenim mati oveaghuezibar dɨpenim.

Me fozir puvatɨ, gumazir a bagha ghueziba, me datɨrɨghɨn Gumazamizir Oveaghuezibar Nguibamɨn iti.