Rut Naomin igiavotarim bate
13 Ezɨ Boas Rut inigha an iti. Ezɨ Ikiavɨra Itir God deragha Rut gamizɨ, a navim asegha otarim bate. 14 Ezɨ amiziba kamaghɨn Naomi mɨgei, "E Ikiavɨra Itir Godɨn ziam fe! A igavatarim nɨ ganɨngi. Eghtɨ igavatarir kam, a nɨn ikɨzimɨn aven akurvazir gumazimɨn ikɨ, egh nɨn gan deraghvɨra nɨ damuam. A Israelɨn adarazir aven ziar ekiam iniam. 15 Nɨn asamim bar nɨ gifongezɨ, nɨ uaghan bar a gifonge. Nɨn asamim bar nɨ gifongezɨ moghɨn, nɨn otarir 7pla nɨ gifueghan kogham. Kamaghɨn amizɨ otarir kam, a nɨn akurvagh mangɨ nɨ ghurighamin dughiam a nɨn ganam."
16 Ezɨ Naomi otarim gifuegha uan apozim gatɨgha deravɨrama a gami. 17 Ezɨ nguibar kamɨn amiziba ghaze, "Naomi datɨrɨghɨn otarim iti."
Egha me borim ziam, "Obet," a gatɨ. Ezɨ gɨn Obet Jesin afeziamɨn oto, ezɨ Jesi Devitɨn afeziamɨn oto.
Atrivim Devitɨn inazir afeziaba
18 Kar Peresɨn adarazir ghua Devitɨn tu, men ziabar kara: Peres a Hesronɨn afeziam. 19 Ezɨ Hesron a Ramɨn afeziam, ezɨ Ram a Aminadapɨn afeziam. 20 Ezɨ Aminadap a Nasonɨn afeziam, ezɨ Nason a Salmonɨn afeziam. 21 Ezɨ Salmon a Boasɨn afeziam, ezɨ Boas a Obetɨn afeziam. 22 Ezɨ Obet a Jesin afeziam, ezɨ Jesin a Devitɨn afeziam.