LUK 8

Iesus aremezir guivir mam gamizɨma a ua dɨkafi Egha amizir an korotiamɨn suirazim gamizɨma a ua dera

40 Egha Iesus uamategha Galilin dɨpamɨn vongɨn izezɨma gumazamiziba a izɨ me bativasa me a bagha oragha a mɨzua iti. 41,42 Ezɨma gumazir mam, an ziam Jairus, a God ko mɨgeir dɨpenimɨn gumazir dapanim. An guivir vamɨra an azenir 12 plan boroghɨra ghugha, aremeghasava ami. Kamaghɨn a iza Iesusɨn dagaribar apengan irɨ. Egha uan dɨpenimɨn mangasa Iesus gakaghori. Ezɨ Iesus ghuavɨra itima maburan avɨrim bar anekuvagha anedughadusi.*(8:42) An guivir vamɨra, a 12 plan azenibar boroghɨra ghu, kamaghɨn amizɨ e ghaze, an azenir 12 plan boroghɨra ghu. 43 Ezɨma amizir 12 plan azenimɨn ghuzim batir arɨmariam itir mam, gumazitam a damightɨma a deraghan kogham. Ezɨ a men tongɨn zui. 44 Egha a Iesusɨn gɨn izava an korotiar avɨzimɨn suira, egha zuamɨra an ghuzir arɨmariam dutugha ghu. 45 Ezɨ Iesus azara, "Tina nan suira?" Ezɨ me bar uarir tiragha Pita ghaze, "Gumazir Ekiam, gumazamiziba bar nɨ akuvagha nɨ adughadusi." 46 Ezɨ Iesus ghaze, "Kɨ kamaghɨn fo, gumazim nan suirazɨma gavgavim na ategha azenan ghu."

47 Ezɨma amizim uabɨra uabɨn gara fo, a modoghan kogham. Eghava atiatim sara iza Iesusɨn dagaribar apengan irɨ. Egha a gumaziba ko amizibar damazibar mɨgɨa ghaze, nan arɨmariam gɨvaghasa, kɨ Iesusɨn korotiamɨn suira, ezɨ nan arɨmariam zuamɨra gɨfa. 48 Ezɨ Iesus a mɨgɨa ghaze, "Nan guivim, nɨ nɨghnɨzir gavgavim nɨ gamizɨma nɨ dera. Navir amɨrɨzimɨn mangɨ."

49 Egha Iesus mɨgɨavɨra itima, gumazir mam God ko mɨgeir dɨpenimɨn garir gumazir dapanim, Jairusɨn dɨpenimɨn ikegha, Jairus bagha izi. Egha a Jairus mɨgei, "Nɨn guivim areme. Eghtɨ nɨ tisa ua ingangarim a danɨngan markɨ." 50 Ezɨ Iesus kamaghɨn oregha, Jairus mɨgɨa ghaze, "Nɨ atiatingan markɨ. Pura nɨghnɨzir gavgavim ikɨ eghtɨma nɨn guivim ua deragham." 51 Eghava a Jairusɨn dɨpenimɨn otogha, egha a ua tavɨn amamangatɨghtɨma an an gɨn aven mangan an aghua, kerara a ko aven mangam, Pita, Jon, ko Jems koma guivimɨn amebam koma afeziam. 52 Dughiar kam gumazamiziba bar uan evaribav mɨsogha azia iti. Ezɨ Iesus me mɨgɨa ghaze, "Azir akam atakigh. Guivim aremezɨ puvatɨ. An akui." 53 Me fo, guivim aremezɨ, kamaghɨn me an ingaravati. 54 Ezɨ Iesus guivimɨn dafarimɨn suiragha egha mɨgɨa ghaze, "Nan borim, nɨ dɨkafigh!" 55 Ezɨma an duam uamategha izezɨma a zuamɨra dɨkavigha tu. Ezɨma Iesus me mɨgɨa ghaze, "Ia daghetam a danɨngigh." 56 Ezɨ an amebam koma afeziam bar aguaghfa. Ezɨma a kamaghɨn mɨgɨa aning abɨra, bizir otozir kam gua gumazitam mɨkɨman markɨ.