1 Dughiar kamɨn Iesusɨn suren gumaziba iza kamaghɨn an azai, "Tina God Bizibagh Ativamin Dughiamɨn ziar ekiam iniam?"*(18:1) Matyun osiziribar aven, Iesusɨn mɨgɨrɨgɨar ruarir dɨbobonim 5 pla gami. Kar namba 4. Ezɨ abuananam ikiavɨra iti. Mɨgɨrɨgɨar 18:3-35ɨn aven itiba, da arazir Iesusɨn gɨn mangamin gumazamiziba deragh uari damuamibav gei.

2 Ezɨ Iesus borir mamɨn dia, ezɨ a izima a men tongɨn anesara. 3 Egha a kamaghɨn me mɨgei, "Kɨ guizbangɨra ia mɨgei, ia uari gɨragh borir dozir kabar mɨn otoghan kogh, egh ia God Bizibagh Ativamin Dughiamɨn aven ikian kogham. 4 Gumazir uabɨ dɨkabɨragha, egha borir dozir kamɨn mɨn itim, gumazir kam God Bizibagh Ativamin Dughiamɨn ziar ekiam ikiam.