Mateus 9

Iesus gumazir damazir okavɨrɨzir pumuning, ko gumazir mɨgeir puvatɨzir mam, me gamizɨ, me ua dera

27 Ezɨ Iesus danganir kam ategha zuima, gumazir damazir okavɨrɨzir pumuning an gɨn iza kamaghɨn an dei, "Nɨ Devitɨn Otarim, nɨ gan apangkufigh."*(9:27) Judaba ghaze, Gumazir God ua Gumazamiziba Iniasa Mɨsevezim, Atrivim Devitɨn ikɨzimɨn otivam. Gumazir damazir okavɨrɨzir kamning nɨghnɨzir gavgavim Iesus ikia ghaze, Israelba gumazir kamra mɨzuai. Kamaghɨn aning dia ghaze, "Devitɨn Otarim." 28 A ghua dɨpenimɨn aven ghuzɨma, gumazir kamning a bagha izima, a kamaghɨn aningɨn azai. "Gua bizir kɨ damuamin kam, gua nɨghnɨzir gavgavim an iti, o puvatɨ?" Ezɨ aning ghaze, "Are, Ekiam ga nɨghnɨzir gavgavim an iti." 29 Ezɨ Iesus uan dafarim isa aningɨn damazimning gatɨgha kamaghɨn mɨgei, "Gua nɨghnɨzir gavgavim iti. Kamaghɨn, gua ua gan." 30 Ezɨ aningɨn damaziba kuiaghrezɨ, aning ua gari. Ezɨ Iesus aningɨn anogorogha aningɨn mɨgɨa ghaze, "Gua tong bizir gua batozir kam tavɨn mɨkɨman markɨ." 31 Puvatɨ. Aning ghua Iesus amizir arazir aghuir kamɨn gun bar distrighɨn kamɨn itir gumazamizibav keme.