1 Ɛ mi wu te kikoo wu kintaashɛ ki bɛniiŋ bɛ kimbeenchɛ-ɛ. Ntsɛkɔɔ kiŋwaati kini li wɛ kwɛɛŋ wu Nyɔ tsaa mɔɔ li bɔɔŋ bo. Ŋkɔŋgisɔɔ beŋ li chɛɛŋ li. Ɛ nɛɛ mi kwaa wu kɔŋgisi beŋ kɛ. Bɛniiŋ bɛchu bɛ kii chɛɛŋ kɔŋgisi baa tɛ beŋ. 2 Tɛ kɔŋgisi baa beŋ kii chɛɛŋ wu nuuŋ li bee li, wu gii nɛɛ wu ba wu ni wu nuuŋ nɛɛ li bee li mfi kwi. 3 Nyɔ Baa wusɛŋ bɛ Jiso Krai wu Ŋwani gii be doonchɛ shéŋ yibe yi dzeeŋ bɛ nshiiŋ mɔɔ mbɛɛŋgii li bee li si tɛɛbeŋ nuuŋ li chɛɛŋ li bɛ li kiŋkɔŋgisɛ-ɛ.

4 Nɛkɔɔ ŋge si mi ŋɛŋgɛ tɛ si bɔɔŋ bo bamu biki chɛɛŋ nɛɛ si Baa wusɛŋ tɛ̀ tee le tɛ ni tɛ feti. 5 Li dɛɛni, ni bɔɔŋ, nlɛkɔɔ wɛ bu lɛkɛ ntiiti le tɛ ni tɛ kɔŋgisi wi bee wi, fini nuuŋ yɛ nchi wumu wu fwɛŋ wu ntsɛki li wɛ-ɛ kɛ. Ɛ nɛɛ nchi wu tɛ tɛ̀ kɛmɛ kituŋ mɛɛŋ fɛmbɛɛchɛ-ɛ. 6 Fiiŋ fiee fi nuuŋ Kiŋkɔŋgisɛ, le tɛ ni tɛ biki nchi we. Nchi wulu nuuŋ wuni wu nɛ tɛ̀ saa nɛ woo mɛɛŋ fɛmbɛɛchɛ-ɛ le tɛ ni tɛ tsiiŋ li kiŋkɔŋgisɛ-ɛ.

7 Bɛniiŋ bɛ binsɛɛ lɛ ŋge bo baa be gɛɛŋ li nshɛ yini-i kituŋ, be nuuŋ yɛ bɛniiŋ bɛ ti beenchi le Jiso Krai tɛ̀ bɛ laaŋkwiiŋ si wiwoŋ kɛ. Baa bɛniiŋ nuuŋ bɛ wi wu binsɛɛ lɛ wu nuuŋ tɛ wi wu mbani wu Krai. 8 Nɛ dzeti yɛɛŋ mfi bɛ yih yinɛ le kiiŋ nɛ ni dza nɛ lɛɛ fiee fi nɛ niŋ kituŋ kɛ. Nɛ gwenini yɛɛŋ nuuŋ le nɛ naa nɛ kɛmɛ kinsomfu kinɛ kichu. 9 Wi kwikwi wu njiindi giiŋgi limfwe nlemɛ li ntiifɛ wu Krai nsiŋ, wɛɛ wi mɛɛŋ yɛ kɛmi Nyɔ li yi yee li kɛ. Wi wu lemi mfi kwi li ntiifɛ wu Krai, kɛmɔɔ Nyɔ Baa wusɛŋ mɔɔ Ŋwaŋ li yi ye-e li. 10 Ɛ wi bɛ lɛ be-eŋ bɛ ŋwaani wuni ntiifɛ nsiŋ, kiiŋ nɛ ni fi wu li benɛ yih, kɛ le nɛ yɛsi mɔɔ wu kɛ. 11 Ɛ wi yɛsi wu, kɛ wu taashɔɔ bɛ wu li nimɛ chee chi bifi-i kituŋ.

12 Ŋkɛmɔɔ nɛɛ biee ŋge le ntsɛɛ li be-eŋ, se nuuŋ le nuuŋ ntɛ̀ ntsɛɛ lɛ kiŋwaati-i lɛnti kɛ. Ŋiŋgɔɔ le ŋgii naa mbɛ ŋɛŋ beŋ tɛɛbeŋ se ni tɛ yeti wi ŋiŋgi wi li lii, ke se bujɔŋ bu tɛɛbeŋ ni bu nuuŋ ɛ bu yisɛ kituŋ. 13 Dzɛmi ya yi Nyɔ tsaa, yɛɛshi yɛɛ wɛ.