1 Ɛ mi wu te kikoo wu kintaashɛ-ɛ ki bɛniiŋ bɛ kimbeenchɛ-ɛ. Ntsɛkɔɔ kiŋwaati kini li wɛ Gayɔŋ wu sinɛŋ wu shéŋ. Ŋkɔŋgisɔɔ wɛ li chɛɛŋ li.

2 Sinɛŋ wu shéŋ, nlɛkɔɔ li Nyɔ-ɔ le biee bichu ni bi giiŋgi bujɔŋ lɛ kimbɛ ko-o, ɔ tɛɛmi li bwiŋ ya-a nɛɛ si ŋkii le ɔ tɛɛmɔɔ li fiana-a. 3 Ntɛ̀ ntuu ŋ’woo bujɔŋ ŋge si bɛŋwaanɛŋ bɛsɛŋ bamu tɛ̀ fɛsi fɛni be tee kii si ɔ lemɔɔ li chɛɛŋ li bɛ shéŋ ya chi. Fi se fiɛɛ nɛɛ chɛɛŋ le ɔ bikɔɔ chɛɛŋ. 4 Fiee fimu nuuŋ yɛ lu fi nuuŋ fi fɛ nse ni ŋ’wuki bujɔŋ yɛki le ni ŋ’wuki le bɔɔŋ bɛ beŋ biki baa chɛɛŋ kɛ.

5 Sinɛŋ wu shéŋ, nimɛ chi ɔ nindi li bɛŋwaanɛŋ bɛsɛŋ, teege li mfo-oŋ, baa ɔ ni ɔ nindi nɛɛ tsaaŋ lɛ. 6 Be tɛ̀ tee li kintaashɛ ki bɛniiŋ bɛ kimbeenchɛ-ɛ ki lani kii kiŋkɔŋgisɛ ko. Ɔ gwenini nɛɛ ɔ fii bɛniiŋ bɛlu lɛ dze yi Nyɔ wɛki-i li dɛndɛ wu bee. 7 Ɔ ni ɔ kii le be bo baa lɛkuuŋ nuuŋ kii bukooŋ bu Krai, be bichi yɛ le wi ni fii be wu nuuŋ yɛ bɛ Nyɔ kɛ. 8 Bɛdɛɛni, tɛ kɛmi le tɛ ni tɛ teendi bɛniiŋ bɛ beeyɛ, ke se tɛɛ be nuuŋ bɛniiŋ bɛ nindi li fiee fimumkpa-aŋ kii chɛɛŋ.

9 Ntɛ̀ ntsɛɛ fiee li kintaashɛ ki bɛniiŋ bɛ kimbeenchɛ-ɛ kinɛ, fi se nuuŋ le Diotefɛs wu kɔŋgisi le ni tuuti mbaaŋ, tɛ̀ mɛɛŋ ki woo kɛ li wi wu nuuŋ mi-i kɛ. 10 Bɛdɛɛni, ŋgii ke mi mbɛ, nshiiki fiee fi feti fini fɛkwiiŋ. Si deŋgi fiɛti kimfiɛ, tiiti jɛ́ yi bifi kii mi. Si feti lɛ, mɛɛŋɔ nɛɛ ki fukɛ kɛ bɛ fi kɛ. Fɛŋgi mfiɛ bɛŋwaanɛŋ bɛsɛŋ, loosi tɛ le kiiŋ bɛniiŋ bɛ wɛki le be ni be fii be, fi be kɛ. Fɛ be wɛki le be ni be fii be, se tuu kuŋgi be bu koŋu lɛ kintaashɛ ki bɛniiŋ bɛ kimbeenchɛ-ɛ lɛnti.

11 Sinɛŋ wu shéŋ, kiiŋ ɔ ni ɔ biki fiee fi bifi kɛ. Ɔ biki nuuŋ fiee fi dzeeŋ. Wi wu feti fiee fi dzeeŋ nuuŋ wi wu Nyɔ, wi wu feti fiee fi bifi nuuŋ wi wu mɛɛŋ ki kɛɛ kɛ Nyɔ kɛ.

12 Dɛmɛtrus wɛ fiee wi wu bɛniiŋ bɛchu tiiti biee bi dzeeŋ kii wu, kiŋge kee ki dzeeŋ se tiiti tɛ kii wu. Tɛ se tuu tɛ tiiti tɛ kii wu. Ɔ kii tɛ le fiee fi tɛ tiiti kii wu nuuŋ chɛɛŋ.

13 Mɛɛŋɔ ŋkɛmi biee ŋge le ntsɛɛ li wɛ-ɛ, se nuuŋ le ŋkɔŋgisi yɛ le ntsɛɛ tɛ bɛ fintiiŋ fi kiŋwaati kɛ. 14 Ŋiŋgɔɔ le shɛɔ niiŋ mbɛ ŋɛŋ wɛ, tɛ wɛ se ni tɛ yeti wi ŋiŋgi wi li lii.

15 Mbɛɛŋgii ni nuuŋ li wɛ-ɛ. Nsáŋ yi tɛɛwɛ yɛɛshi yɛɛ wɛ. Yɛsi mi li nsáŋ yi tɛɛwɛ chichi wi mumkpaŋ mumkpaŋ.