1 Lɛjiŋ lɛlu, ndza ŋ’woo fiee si jɛ́ li kimbanchɛ ki bɛniiŋ lɛ ki nɔŋa liboo, ki dzɛŋgi le,

"N’yɔɔnchɛ ni nuuŋ li Nyɔ yisɛ-ɛŋ.

Ɛ yi yi suuti bɛniiŋ, ɛ yi yi kɛmi bunɔŋa bɛ buŋga.

2 Yi sondini bɛnsa bee yi biki chɛɛŋ bɛ dze yi tsaaŋ.

Yi lɔŋ yɛ ŋgɛ li ŋgi wu kinjikwiiŋ wɛɛ

tuu bifisi kikoo ki nshɛ-ɛ bɛ ntsɛ we wu kinjikwiiŋ.

Yi tuu yɛ nsooŋkibaa li kwɛɛŋ wulu-u

kii bɛniiŋ bee bɛ nimɛ-ɛ bɛ bɛ tuu bɛ woyɛ."

3 Be tuu be kaari be dzɛŋgi le,

"N’yɔɔnchɛ ni nuuŋ li Nyɔ-ɔ.

Njiŋ mɛ jiinyi li kitoŋ kini-i gii me ni me jiinyi mfi kwi nyimu nsiŋ."

4 Bɛkaaŋ bɛ mbaamfiɛɛ ntsɔ binɛɛ baa mɔɔ biee bi yoŋ bi binɛɛ biɛɛ tuu bi we fɛkwiiŋ bi nyɛɛ n’yɔɔnchɛ wu nyɔŋa li Nyɔ-ɔ yi shee li kabara-a. Bi tiiti le, "Fi nuuŋ lɛ. N’yɔɔnchɛ nuuŋ li Nyɔ-ɔ".

5 Jɛ yimi se tuu yi bo li kabara-a yi tiiti le,

"Beŋ bɛchu bɛ nuuŋ bɛniiŋ bɛ nimɛ-ɛ bɛ Nyɔ-ɔ,

nɛ yɔɔnchi yɛɛŋ Nyɔ yisɛŋ,

beŋ bɛchu bɛ chɛndi yi mɔɔ bɛ ntɛŋ bɛ ntɛŋ

mɔɔ bɛ nɔŋa bɛ nɔŋa, nɛ nyɛɛ yɛɛŋ n’yɔɔnchɛ li yi-i."

6 Nse ntuu ndza ŋ’woo fiee fimu si jɛ yi kimbanchɛ ki bɛniiŋ lɛ yi yeti si dzɔɔ yi beki li mbɛmɛ, yi kumini si dzaaŋ yi wami bɛ buŋga yi tiiti le,

"N’yɔɔnchɛ ni nuuŋ li Nyɔ-ɔ,

kifɛ Taa wusɛŋ wu Nyɔ

wu Kɛmi Buŋga Buchu sɛkɔɔ kituŋ.

7 Tɛ ni tɛ nɛki, tɛ wuki bujɔŋ, tɛ nyɛɛ n’yɔɔnchɛ li yi-i,

kifɛ mfi wu bugoo bu Ŋwanɛ Nshɔɔŋ lɛ bɛɛɔ kituŋ,

Kwɛɛtso nachɔɔ yi yee.

8 Bɛ nyɛ baa ndu kituŋ yi nuuŋ shiiŋgii yi

wuuti yi miɛŋini wu chuumɛ."

(Ndu yini nuuŋ kiŋge ki tsaaŋ ki bɛniiŋ bɛ nuuŋ bɛ Nyɔ-ɔ.)

9 Nchindaa wu Nyɔ wulu tuu tee li mi-i le, "Tsɛɛ fini le, ‘Kinɛɛtinɛ ki nɔŋa kɛɛ ki bɛniiŋ bɛ bɛ teeŋ li tsɔnɔ chi bugoo bu Ŋwanɛ Nshɔɔŋ lɛ.’" Tuu tee li mi-i le, "Tefɛ chini chɛɛ tefɛ chi Nyɔ-ɔ chɛɛŋ." 10 Nse ndza we li bikaa biee li le nyɛ n’yɔɔnchɛ wu nyɔŋa li wuu. Tuu tee li mi-i le, "Kiiŋ ɔ ni ɔ feti lɛ kɛ. Nnuuŋ nɛɛ tɛ wi wu nimɛ si wɛ mɔɔ bɛŋwaana bɛ lemi li fiee fi bɛ tiiti kii Jiso. Ɔ nyɛɛ n’yɔɔnchɛ wu nyɔŋa nuuŋ li Nyɔ-ɔ. Fiee fi bɛ tiiti kii Jiso fini* nuuŋ nɛɛ fi kibɛɛ fi bɛntomfɔŋ bɛ Nyɔ-ɔ tɛ̀ tiiti."

11 Ndza ŋɛŋ si kiboo gwiyɛ, kikuŋ kimu ki nɛŋgi lemi. Wi wu tɛ̀ nuuŋ lɛ ki-i lɛwe bɛ tɛ̀ teenyi wu le Wi wu Lemi li Jɛ ye-e bɛ le Wi wu Chɛɛŋ, ti sondini bɛnsa bee tundi mɔɔ dziŋ yi tsaaŋ. 12 Lii yee tɛ̀ nuuŋ si nimi chi wi-i, bifɔ bi bumfɔŋ nuuŋ wu li fa ŋge. Tɛ̀ gii kɛmi bukooŋ ɛ bɛ tsɛɛ li wuu bwiŋ bu wi wumu kii yɛ kɛ fuki wu nsiŋ. 13 Tɛ̀ gii nuuŋ ɛ wu chuumɛ ndu yi njeeŋ li bwiŋ ɛ bɛ lii li ŋgɔ-ɔŋ. Bukooŋ bu bɛ tɛ̀ teenyi wu lu nuuŋ le Jɛ yi Nyɔ-ɔ. 14 Bɛniiŋ bɛ dzi-iŋ bɛ liboo biki wu lɛjiŋ lɛ bikuŋ bi ncherere-e ɛ be liishɛ ndú yi miɛɛfii yi wuuti yi nɛŋgi ncherere. 15 Nyɔ yi dziŋ yi keeti tɛ̀ buti lɛ wuu wa yi gii nuuŋ le yaa bitoŋ lu tuu ni sɛki bi bɛ buŋga bu nɔŋa. Gii buu sheŋ yi Nyɔ yi Kɛmi Buŋga Buchu doonchɛ li bɛniiŋ li. Sheŋ yi Nyɔ yini nuuŋ yi fuuti ŋge nɛɛ si kisɔ ki bɛ ti seendi muntaaŋ le mbiiŋ buti. 16 Li kikoŋ kee li bɛ li yeeŋ yee li ɛ bɛ tsɛɛ bukooŋ bwee le, "Mfɔŋ wu bɛmfɔŋ, bɛ le Taa wu bɛtaa."

17 Ntuu ndza ŋɛŋ nchindaa wu Nyɔ wumu lemi li jobɛ-ɛ. Tɛ̀ lemi lɛ dzɛŋgi li muniiŋ munchu mu jiindi liwe tiiti le, "Bɛ yɛɛŋ nɛ baanchɛ fɛ tsɔnɔ chi nɔŋa chi Nyɔ fɛ chini-i. 18 Nɛ gii nɛ ji gooŋ yi bɛmfɔŋ bɛ yi bɛte bikoo bi bɛniiŋ bɛ dzi-iŋ mɔɔ bɛniiŋ bɛ kɛmi buŋga mɔɔ yi bikuŋ bɛ yi bɛniiŋ bɛ beeŋ lɛ bi-i, mɔɔ yi bɛniiŋ bɛchu bɛ nuuŋ bɛmfa mɔɔ bɛ nuuŋ yɛ bɛmfa kɛ mɔɔ bɛniiŋ bɛ ntɛŋ bɛ ntɛŋ bɛ bɛ nɔŋa bɛ nɔŋa." 19 Nse ŋɛŋ nyaŋ yi bɛndi yi bɛ bɛmfɔŋ bɛ nshɛ-ɛ mɔɔ bɛniiŋ bɛ bee bɛ dzi-iŋ ɛ be banchɛ le be toŋ dziŋ bɛ wi wu tɛ̀ shee lɛ kiku-uŋ mɔɔ bɛniiŋ bee bɛ dzi-iŋ. 20 Dziŋ bɛchi, yi kɔɔ nyaŋ yi bɛndi yi yɛ bɛ wi wu tɛ̀ yɛŋgi le nuuŋ ntomfɔŋ wu Nyɔ. Wi wuni nuuŋ wu ti shiiŋ shiiti nyaŋ yilu limfwe, feti bintɛ wa bi biee lɛ. Biee bini nuuŋ bi yi tɛ̀ yɛŋgi bɛniiŋ bɛ kɛmi ŋkiki wu nyaŋ yi koofiyi li be bwiŋ, mɔɔ bɛ nyɛɛ n’yɔɔnchɛ wu nyɔŋa li kee ki nuuŋ mfisɛ yi nyaŋ yi bɛndi yi yilu. Tɛ̀ lɔŋ be bɛ bɛfɛ bani be mɛɛŋ bɛyoŋ lɛ libɛ chi wi bɛ muŋkaŋ duti le-e. 21 Wu wu tɛ̀ shee lɛ kikuŋ kɛɛ lɛwe wachɛ kiŋkɛ ki bɛniiŋ lɛ kɛɛ bɛ nyɔ yi dziŋ yi tɛ̀ buti lɛ wuu wa, muniiŋ munchu ji li taŋ wu mfi kimumkpaŋ gooŋ yi bɛniiŋ bɛlu mu ŋɛɛndi.