1 Ntɛ̀ dza ŋɛŋ kiŋwaati kimu lɛ kibɛnɛ ki kigɔŋɛ ki wi wu tɛ̀ shee li kabara wɛ-ɛ, ɛ bɛ tsɛɛ ki lɛnti bɛ lɛkuuŋ bɛ fiɛɛmɛ ki bu fiɛɛmɛ, bɛ laaŋ bintsii mfomɛnyaaŋ bɛ ŋwɛɛŋ. 2 Nse ndza ntuu ŋɛŋ nchindaa wu Nyɔ wumu wu tɛɛmi laŋini lɛwe ŋge biiti laa, "Ɛ noo wu kɔchɛ le gwiyɛ ŋwɛɛŋ mani, fanchɛ kiŋwaati kini le?" 3 Wi tɛ̀ mɛɛŋ ki nuuŋ kɛ lu liboo mɔɔ nuuŋ li nshɛ-ɛ mɔɔ nuuŋ likwiiŋ li nshɛ-ɛ, wu nuuŋ fanchɛ kiŋwaati kilu mɔɔ nuuŋ le bichɛ lɛ kiŋwaati kilu-u kɛ. 4 Nse nde kwe ŋge le wi tɛ mɛɛŋ ki nuuŋ kɛ lu wu kɔchɛ wu nuuŋ gwiyɛ kiŋwaati kilu mɔɔ nuuŋ le bichɛ lɛ ki-i lɛnti kɛ. 5 Wi wumu li kintutu ki bɛkaaŋ lɛ baa tee li mi-i le, "Kiiŋ ɔ ni de kɛ. Yikɛ ɔ woo, wi wu bɛ teenyi le Buri wu li kini ki Juda-a, bɛ tuu bɛ teenyi le Biɛchi yi saŋ lɛ kini ki Mfɔŋ Daafi-i tɛ̀ sɔ, ɛ wu wu gii gwiyɛ ŋwɛɛŋ mɛ mfomɛnyaaŋ maa fanchɛ kiŋwaati kilu."*

6 Nse ndza ŋɛŋ Ŋwanɛ Nshɔɔŋ lemi kintikinti lɛ kabara-a bɛ biee bi yoŋ bi binɛɛ biɛɛ mɔɔ bɛkaaŋ bɛ bɛniiŋ lɛ baa, se nuuŋ kɛɛ bɛ sɛɛ. Tɛ̀ gii kɛmi bitooŋ mfomɛnyaaŋ bɛ lii mfomɛnyaaŋ. Lii yilu nuuŋ fiana yi Nyɔ yi mfomɛnyaaŋ yi wu toŋ yi le yi bo yi gɛɛŋ li kikoo ki nshɛ-ɛ kichu. 7 Ŋwanɛ Nshɔɔŋ wulu tuu gɛɛŋ fi kiŋwaati kɛɛ lɛ kibɛnɛ ki kigɔŋɛ ki wi wu tɛ shee li kabara wɛ-ɛ. 8 Si tɛ̀ fi kiŋwaati kilu lɛ, biee bi yoŋ bi binɛɛ biɛɛ mɔɔ bɛkaaŋ bɛ mbaamfiɛɛ ntsɔ bɛnɛɛ baa biee be we fɛkwiiŋ li Ŋwanɛ Nshɔɔŋ wulu-u limfwe. Wi mumkpaŋ mumkpaŋ li bee tɛ̀ kɛmi kɔmi bɛ ke wu bɛ fɛ bɛ kikwa ki yɛchi, ɛ kidzoma yisɛ le. Kidzoma kini nuuŋ nlɛkɛ li Nyɔ-ɔ wu bɛniiŋ bɛ nuuŋ bɛ Nyɔ-ɔ. 9 Biee biɛɛ bɛ bɛkaaŋ baa se yuuti jumi chimu chi fɛŋ chi tiiti le,

"Ɛ wɛ wu kɔchɛ le ɔ fi kiŋwaati kilu,

ɔ gwiyɛ ŋwɛɛŋ mɛlu,

kifɛ be tɛ̀ sɛɛ wɛ ŋgɔŋ mo ya bɛniiŋ,

li tsaŋ yi bibifi-i bɛ nyɛ li Nyɔ-ɔ.

Bɛniiŋ bani bo li bini bichu, bɛ li jɛ́ chichi-i,

bɛniiŋ chichi mɔɔ bitoŋ bichu.

10 Ɔ nyɛ be bumfɔŋ ɔ se fɛ be to bɛte muntofi

bɛ Nyɔ yisɛ-ɛŋ.

Be gii be ni be sɛki li nshɛ-ɛ."

11 Le ntuu ni mbichi, ndza ŋ’woo jɛ́ yi bɛnchindaa bɛ Nyɔ-ɔ be nuuŋ li bɛnchuki-i li bɛnchuki-i bɛ li bɛmara-a li bɛmara-a. Be tɛ̀ lemɛ be kɛnɛ kabara bɛ biee bi yoŋ biɛɛ mɔɔ bɛkaaŋ baa. 12 Be tɛ̀ yuuti lɛwe ŋge be tiiti le,

"Ŋwanɛ Nshɔɔŋ wu bɛ tɛ̀ sɛɛ,

ɛ wu wu kɔchɛ le kɛmɛ buŋga bɛ bulofu mɔɔ bufii bu nɔŋa

mɔɔ bukooŋ bu nɔŋa mɔɔ ŋguŋu mɔɔ bunɔŋa mɔɔ n’yɔɔnchɛ."

13 Nse ndza ŋ’woo biee bichu bi Nyɔ tɛ̀ tɔŋ bi nuuŋ liboo mɔɔ li nshɛ-ɛ mɔɔ lɛkwiiŋ mɔɔ li dzɔ́ɔ yi nyɔŋa-a, bɛ biee bichu bi nuuŋ li bintsii bini-i, bi yuuti le,

"N’yɔɔnchɛ bɛ ŋguŋu mɔɔ bunɔŋa mɔɔ buŋga

giiŋgi nuuŋ fɛ wu wu tɛ̀ shee li kabara-a

bɛ Ŋwanɛ Nshɔɔŋ wuni mfi kwi ma nsiŋ!"

14 Si bi yuuti lɛ, biee bi yoŋ bi binɛɛ biɛɛ beenchi le, "Fi nuuŋ lɛ!" Se bɛkaaŋ baa gɛɛŋ be we fɛkwiiŋ be nyɛɛ n’yɔɔnchɛ wu nyɔŋa.