1 Kikoo ki fiee fi tɛ tiiti kii fi nuuŋ le, tɛ kɛmi ŋwaani kikoo ki bɛte muntofi-i kimu nuuŋ wi wu shee lɛ kibɛnɛ ki kigɔŋɛ ki kabara wu Nyɔ yi Bunɔŋa liboo. 2 Wɛ nuuŋ wi wu nindi fɛ Nyɔ nuuŋ fe-e, nindɔɔ fɛ kibo ki nuuŋ ki chɛɛŋ nuuŋ kigɔɔnɛ ki Nyɔ-ɔ, nuuŋ yɛ ki bɛniiŋ fɛ kɛ. Ɛ yih yi Taa Nyɔ yi fɛ kigɔɔnɛ kilu. 3 Kikoo ki bɛte muntofi kichu nuuŋ ki Nyɔ ti bɛɛ yi tsaa yi gɛɛ le ki ni ki nyɛɛ nyá ki tuu ki feti muntofi li Nyɔ-ɔ. Nɛɛ lɛ, fi se fiɛɛ bujɔŋ li wɛɛ te muntofi le ni kɛmi tɛ fiee fi nuuŋ nyɛ li Nyɔ-ɔ. 4 Bee le ni nuuŋ laaŋkwiiŋ, wu nuuŋ yɛ te muntofi kɛ, kifɛ bɛte muntofi baa lu bɛ nyɛɛ nyá biki si nchi wu Mɔɔsɛ wɛki. 5 Nimɛ chi be nindi laaŋkwiiŋ nuuŋ nɛɛ mbosɛ mɔɔ kinjiinjii ki kibo ki Nyɔ-ɔ liboo. Fiɛɛ fiee fi tɛ̀ nuuŋ mfi wu Mɔɔsɛ tɛ̀ nuuŋ le fɛ kigɔɔnɛ ki Nyɔ-ɔ laaŋkwiiŋ, Nyɔ tifi wu yi tee le,

"Ŋɛŋgɛ le ɔ fɛɔ fiee fichu fi nuuŋ nɛɛ yɛɛŋ

si fi ntɛ̀ ndoonchɛ wɛ li ŋkumɛ-ɛ."

6 Se nuuŋ le Jiso wɛ ɛ bɛ nyɛ nimɛ li wuu chi ko chi yaa chi bɛte muntofi bɛ ŋkosi baa, nɛɛ si leh wu lemi limfwe li wuu kintikinti ki Nyɔ bee wiwoŋ ko wu yaa tɛ wu fichi. Wu yaa kifɛ wuni biki nuuŋ bɛŋkaachɛ bɛ yɛki bɛ ŋkosi. 7 Ɛ nchininɛ wu ŋkosi tɛ̀ gii kɛmi yɛ chɔ kɛ, kɛ bee bɛ bichi yɛ nchininɛ wumu kɛ. 8 Nyɔ tɛ̀ ŋɛŋ le bɛniiŋ baa bɛ chɔ́, tee le,

"Mi wu Taa ntiitɔɔ le jobɛ bɛɛ chɛɛ

chi ŋgii nji leh wu fwɛŋ

tɛɛ yih yi Isɛlɛɛ mɔɔ yi Juda.

9 Se leh wuni nuuŋ yɛ si wu ntɛ̀ nji

tɛɛ bɛte tee bɛ bee

jobɛ chi ntɛ̀ ŋkɛmɛ be li kibɛnɛ,

ndzɔ be mbo bɛ be li kwɛɛŋ wu Ijip kɛ.

Leh wuni nuuŋ wu be ti mɛɛŋ ki ba kɛ le be ni be lemi li wuu kɛ.

Bɛdɛɛni, nse mbaa dzaa li bee. Ɛ mi Taa wu tiiti fini.

10 Mi wu Taa ntuuɔ ntiiti le, mfi gii bɛ kɔchɛ,

ntuu nji leh wumu bɛ yih yi Isɛlɛɛ.

Wu gii wu nuuŋ le ŋgii ŋgɛɛ bɛnchi beŋ

li bɛmbeechɛ bɛ bee,

ntsɛɛ nuuŋ li shéŋ yi bee.

Ŋgii ni nuuŋ Nyɔ yibe, be ni be nuuŋ bɛniiŋ beŋ.

11 Wi mɛɛŋ yɛ tuu ni tiifi wi we wu kwɛɛŋ wumu

mɔɔ nuuŋ ŋwaani le kɛɛ Taa Nyɔ kɛ,

kifɛ wi kwikwi gii ni kii mi

mbɛɛchɛ fɛ wi wu ŋkwɛ-ɛŋ ŋgɛnu mbochu fɛ wi wu nyɔŋa-a.

12 Ŋgii ŋkɔɔ nshiiŋ li bee,

mfeeki biee bi bee bibifi.

Mmɛɛŋ yɛ ntuu ni ŋkiimi bibifi bi bee kɛ."

13 Si Nyɔ tɛ̀ tee le leh wu fwɛŋ gii naa nuuŋ, kɛ wu fɛɔ le wu ŋkosi wɛ to nuuŋ fiee fi fichi. Ɛ fiee to fi fichi kɛ fi doŋ fiɛɛ kituŋ, kɛ shɛɔ niiŋ fi la lɛ bɛniiŋ lii.