1 Pailɛt se dzɔ Jiso nyɛ le bɛ lichɛ wu. 2 Bɛniiŋ bɛ nchi-i lo kifɔ ki bumfɔŋ ki nuuŋ biaŋ biaŋ be beeŋ wu lifa, be dzɔ ndu yi bumfɔŋ yi gaa, be chuumɛ wu li bwiŋ. 3 Be se bɛɛ fɛ wuu, be bundi wu, be tiiti le, "Buri! Mfɔŋ wu Bɛjuu!" Si be feti lɛ be maami wu bɛ bibɛnu. 4 Pailɛt se tuu bo lɛkuuŋ tee li bee le, "Bichɛ yɛɛŋ, ŋgii mbuu wi wuni nyɛ li be-eŋ, nɛ se kɛɛ le mmɛɛŋɔ ki ŋɛŋ fiee fi wu chɔ kɛ." 5 Jiso se bo bɛɛ bɛ kifɔ ki bíaŋ lifa mɔɔ ndu yi bumfɔŋ yɛ li wu-u bwiŋ. Pailɛt se tee li bee le, "Bichɛ yɛɛŋ nɛ ŋɛŋ wuuŋ wi wulu!" 6 Bɛte muntofi bɛ nɔŋa bɛ nɔŋa bɛ bɛniiŋ bɛ tɛ̀ kiichi yih yi muntofi ŋɛŋ wu lɛ, be se wɛndi le, "Ta wu li kintaaŋ li, ta wu li kintaaŋ li!" Pailɛt tee li bee le, "Dzɔɔ yɛɛŋ wu bɛ tsaŋ yinɛ nɛ taaŋ wu li kintaaŋ li, kifɛ mɛɛŋɔ ki ŋɛŋ chɔ ye kɛ." 7 Bɛjuu bɛlu tuu li wuu le, "Tɛ kɛmi baa nchi wusɛŋ, ɛ nchi wulu wu doonchi le kɛmi le kwi, kifɛ wu fɛɔ yi yee le, ɛ wu Ŋwanɛ Nyɔ." 8 Le Pailɛt woo n’yɔru wuni lɛ, se tuu kɛmɛ chɛnɛ ŋge. 9 Bee Jiso tuu be to lɛjiŋ lɛ ntɔ, bii li Jiso laa, "Ɔ dza fɛŋ?" Se nuuŋ le Jiso ti mɛɛŋ ki tuu kɛ fiee kɛ. 10 Pailɛt bii li Jiso-o laa, "Ɔ nuuŋ tɛ yɔ li mi kɛ ni? Ɔ kii yɛ le ŋkɛmi buŋga bu chiiŋgɛ li wɛ-ɛ, ntuu ŋkɛmi buŋga bu tefɛ le bɛ taaŋ wɛ li kintaaŋ li ni?" 11 Jiso tuu li wuu le, "Nuuŋ ɔ tɛ kɛmɛ buŋga lɛ mi lɛwe, fuki fɛ bɛ nyɛ buŋga bulu li wɛ-ɛ liboo nsiŋ kɛ. Se nuuŋ le kii fini, wi wu nyɛ mi li tsaŋ ya ɛ wi wu kɛmi bubiɛɛ bu kuu bu yɛki bwo."

12 Le Pailɛt woo n’yɔru wuni ni, se bɛchi wɛki dze le chinɛ li wuu. Se nuuŋ le Bɛjuu tɛ̀ waŋ lɛwe ŋge le, "Ɔɔ mɔŋ ɔ chinɛ li wi wuni, kɛ ɔ nuuŋ yɛ nsaŋ yi Kaisa wu Mfɔŋ wu nyɔŋa wu Lom kɛ. Wi kwi wu yɛkisi yi yee le mwɛ nuuŋ mfɔŋ kɛ mwɛ wɛ wi wu mbani wu Kaisa." 13 Le Pailɛt tuu woo ŋwani wuni n’yɔru, se bo bee Jiso, shee li kintindɛ ki nsa-a fɛ be tɛ̀ teenyi le, Kintsii ki bɛ gwaŋ bɛ Ta, ki bɛ teenyi lɛ jɛ́ yi Hiburu le Gabata. 14 Tɛ̀ nuuŋ Jobɛ chi Nachɛ kii Tsɔnɔ chi N’yafuwee, ɛ mfi tɛ̀ nuuŋ si jobɛ bikaa yoofi ntsɔ bifɛɛtu. Pailɛt tee li Bɛjuu li le, "Bichɛ yɛɛŋ nɛ ŋɛŋ, wuuŋ Mfɔŋ wunɛ!" 15 Bɛjuu bɛlu bɛchi be dzɛŋgi le, "Gɛnɛ bɛ wu, gɛnɛ bɛ wu, ta wu li kintaaŋ li!" Pailɛt bii li bee laa, "Ntaaŋ Mfɔŋ wunɛ li kintaaŋ li ni?" Bɛte muntofi bɛ nɔŋa bɛ nɔŋa baa tuu li wuu le, "Tɛ kɛmi yɛ Mfɔŋ wumu kɛ fuki Kaisa nsiŋ." 16 Pailɛt se nyɛ Jiso li bee le be gɛɛŋ be taaŋ wu li kintaaŋ li.

17 Be se dzɔ Jiso, be bo bɛ wu. Too kintaaŋ kee giiŋgi fɛ kintsii ki bɛ teenyi le Kiŋgefi, bɛ teenyi lɛ jɛ́ yi Hiburu li le Gɔɔgɔɔta. 18 Be se gɛɛŋ be ta wu fe li kintaaŋ li, be ta tɛ bɛniiŋ bamu bɛfɛ li bintaaŋ li wumu lɛ kigɔŋɛ, wumu lɛ kimɛsɛ, Jiso nuuŋ kintikinti. 19 Pailɛt tsɛɛ fiee fimu bɛ ta li kintaaŋ ki Jiso-o. Fiee fi tɛ̀ tsɛɛ filu tɛ̀ nuuŋ le, "Jiso wu Nasarɛ, Mfɔŋ wu Bɛjuu." 20 Bɛjuu ŋge tɛ̀ teeŋ fiee fi tɛ̀ tsɛɛ filu, kifɛ fɛ be tɛ̀ ta Jiso li kintaaŋ li tɛ̀ nuuŋ tsɛkɛtsɛkɛ li kitoŋ kilu lichiŋ, tɛ̀ tsɛɛ fiee fini lɛ jɛ́ yi Hiburu bɛ yi Latin mɔɔ yi Grik. 21 Bɛte muntofi bɛ nɔŋa bɛ nɔŋa bɛ Bɛjuu gɛɛŋ be tee li Pailɛt le, "Kiiŋ ɔ ni tsɛɛ le, ‘Mfɔŋ wu Bɛjuu kɛ.’ Tsɛɛ nuuŋ le, ‘Wi wuni kweŋgɔɔ le nuuŋ Mfɔŋ wu Bɛjuu.’" 22 Pailɛt tuu li bee le, "Fiee fi mi ntsɛɛ mi ntsɛɛɔ kituŋ."

23 Si bɛniiŋ bɛ nchi-i baa tɛ̀ ta Jiso li kintaaŋ li lɛ, be dzɔ ndú yee be gachɛ li yi yibe bintsii binɛɛ si be tɛ̀ nuuŋ. Be tuu be dzɔ mɔɔ kiŋkoŋ kee. Se nuuŋ le kiŋkoŋ kini bɛ tɛ̀ toŋ ki mbaru nsiŋ mbɛɛchɛ li kimi mbɔɔwu mbochu li bikaa li. 24 Bɛdɛɛni be se tee li yi yi bee le, "Kiiŋ tɛ ni gaamɛ kiŋkoŋ kini kɛ. Tɛɛbeŋ toŋ kaŋ, tɛ ŋɛŋ wi wu gii kɛmɛ ki." Fini tɛ kɛti le fi bɛ fi kɔchɛ si bɛ tɛ̀ tsɛɛ lɛ Kiŋwaati ki Nyɔ-ɔ le,

"Be tɛ̀ gachɛ ndú yɛŋ li yi yi bee,

be toŋ kaŋ*19:24 Kaŋ wuni tɛ nuuŋ ta yi bɛ tɛ dzɔ bɛ lendi fɛkwiiŋ le bɛ ŋɛŋ laa ɛ noo wu ji le. bɛ kiŋkoŋ ŋkeŋ."

Se nuuŋ le bɛniiŋ bɛ nchi bɛlu tɛ̀ fɛ nɛɛ fini fiee.

25 Bukɛɛŋ bamu tɛ̀ gii be lemi fe, li kintaaŋ ki Jiso-o lichiŋ. Bukɛɛŋ bani tɛ̀ nuuŋ ni Jiso bɛ bɛŋwaani ni Jiso wu kwɛɛŋ mɔɔ Maariya wu kwɛɛ Klofas mɔɔ Maariya Madaliŋ 26 Le Jiso dza ŋɛŋ ni mɔɔ ŋwani wu kintutu wu tɛ̀ kɔŋgisi wɛ si be lemi li wuu lichiŋ, tee li ni-i le, "Kwɛɛŋ, bichɛ ɔ ŋɛŋ, wuni to wɛ ŋwana." 27 Si tɛ̀ tee lɛ, kaari tee tɛ li ŋwani wu kintutu wɛɛ le, "Bichɛ ɔ ŋɛŋ, wuni to wɛ na." Mbɛɛchɛ li mfi wɛ ŋwani wu kintutu wɛ se dzɔ ni Jiso gɛɛŋ tsiiŋ nuuŋ li wu-u yih.

28 Lɛjiŋ lɛlu, Jiso tɛ̀ kɛɛ kituŋ le fiee fichu ma fiɛɛ, le fɛ fi bɛ fi kɔchɛ si bɛ tɛ̀ tsɛɛ lɛ Kiŋwaati ki Nyɔ-ɔ, se dza tee le,

"Ndɔɔŋ wondinɔɔ mi."

29 Tɛnɛ chimu tɛ̀ nuuŋ fe bɛ mbiiŋ mɛ mgbanyi le tɛɛ. Bɛniiŋ bɛ nchi-i baa tuu be lii kifiiŋ li mee be shiŋgɛ li kiti ki iso-ob be nɛɛki lɛ wuu wa.*19:29 Isob wuni nuuŋ bukooŋ bu kiti kimu li. 30 Le Jiso fi mbiiŋ mɛlu se tee le, "Fi ma fiɛɛ." Si tɛ̀ tee lɛ, bɛɛki kikoo kee, kwi.

31 Si boo yɛlu tɛ̀ nuuŋ Jobɛ chi Nachɛ le bɛ lɛ li jobɛ chi bɛshiinshi-i lɛ, Bɛjuu tɛ̀ wɛki le be fɛ le kiiŋ gooŋ yilu ba li bintaaŋ li jobɛ chi bɛshiinshi kɛ, (teege si jobɛ chi bɛshiinshi chilu tɛ̀ nuuŋ chi nɔŋa lɛ). Be se gɛɛŋ be ŋɛŋ Pailɛt be lɛkɛ wu be tee le be gɛɛŋ be bonyɛ bikaa bi bɛniiŋ bɛ tɛ̀ nuuŋ li bintaaŋ bilu-u, be se kwiyɛ tsɛkɛ bɛ shiiki bɛ tsaaki be. 32 Bɛdɛɛni bɛniiŋ bɛ nchi baa bonyɛ bikaa bi wi wu ŋkosi, be bonyɛ tɛ̀ bi wu biki. 33 Se nuuŋ le, le be bo fɛ Jiso, be ŋɛŋ ɛ wu kwi kituŋ, be ti mɛɛŋ ki bonyɛ kɛ bikaa biee kɛ. 34 Wumu wu li kintutu ki bɛniiŋ bɛ nchi-i baa beeŋ Jiso lɛfufu bɛ gɔŋɛ. Le beeŋ lɛ, mfwaa mumkpaŋ ŋgɔŋ mɔɔ dzɔɔ tasi fe. 35 Wi wu tɛ̀ ŋɛŋ biee bini tɛ̀ leŋ lɛjiŋ lɛ nsa wulu-u le, n’yɔru we nuuŋ chɛɛŋ, se kii tɛ le wuni n’yɔru tɛ̀ nuuŋ wu chɛɛŋ, wu nɛ nuuŋ nɛ beŋ. 36 Biee bini tɛ̀ kɛti ni le fiee fi bɛ tɛ̀ tsɛɛ lɛ Kiŋwaati ki Nyɔ-ɔ bɛ fi kɔchɛ si be tsɛɛ le, "Kiŋkomfɛ kee kimumkpaŋ nuuŋ tɛ̀ naa bondɛ kɛ." 37 Fi se tuu fi nuuŋ ɛ bɛ tsɛɛ lɛ kintsii kimu-u lɛ Kiŋwaati ki Nyɔ-ɔ le, "Bɛniiŋ gii be ni be bichi wi wu bɛ beeŋ wulu."

38 Lɛjiŋ lɛlu Jɔsɛ wu Arimatia dza gɛɛŋ ŋɛŋ Pailɛt lɛkɛ wu le beŋ gɛɛŋ tsaaki gwini chi Jiso-o. Jɔsɛ wuni tɛ̀ nuuŋ wi wu kintutu ki Jiso-o, se nuuŋ le tɛ̀ nuuŋ lijiŋ lijiŋ kifɛ tɛ̀ chɛndi Bɛjuu. Pailɛt beŋ, se gɛɛŋ shiiki gwini chilu. 39 Nikodɛmu wu tɛ̀ saa gɛɛŋ ŋɛŋ Jiso butuu bumu wɛ, tɛ̀ bɛ tɛ bɛ mɛɛŋ mamu mɛ sɛɛndi ni shuuŋŋ mɛ bɛ fiinsɛ bɛ mɛɛr mɔɔ alos, me luuti si bɛ kilo mbaanshɛɛ ntsɔ bɛtɛɛtu. 40 Bee wu se shiiki gwini chi Jiso-o be fiɛɛmɛ bɛ ndú be fwa bɛ mɛɛŋ maa be diyɛ wu li ntsɛ Bɛjuu. 41 Mbaŋ wu wɛ wumu tɛ nuuŋ fe fɛ chiŋ fɛ bɛ tɛ̀ ta Jiso li kintaaŋ li fɛɛ. Li wɛ wulu dziŋ yi fiɛŋ yimi tɛ̀ nuuŋ fe ɛ bɛ ti mɛɛŋ saa ki diyɛ kɛ wi le kɛ. 42 Se nuuŋ le si booyaa tɛ̀ nuuŋ Jobɛ chi Bɛjuu lɛ chi Nachɛ wu jobɛ chi Bɛshiinshi lɛ, ɛ dziŋ yilu tɛ̀ nuuŋ tɛ tsɛkɛtsɛkɛ, be se giiki Jiso le.*19:42 Be tɛ gɛɛ Jiso le bɛdɛɛni, le ke fɛ jobɛ chi bɛshiinshi ka, be se bɔsɛyi be diyɛ wu si ntsɛ wu be tɛ̀ shiiŋ nuuŋ.