1 Wi wu kintutu ki Bɛfarasii wumu tɛ̀ nuuŋ lu bɛ teenyi wu le Nikodɛmu, ɛ tɛ̀ nuuŋ wi wu kintutu ki bikoo bi kwɛɛŋ wu Bɛjuu lɛ. 2 Wi wuni dza bɛ lɛ Jiso butuu teeŋ wu le, "Labai, tɛ kii le ɔ nuuŋ Wi wu Ntiifɛ wu dza fɛ Nyɔ-ɔ, kifɛ wi nuuŋ yɛ lu wu nuuŋ ni feti ŋwaani bini biee bi doonchi bunɔŋa bu Nyɔ-ɔ bi ɔ feti bini fuki le Nyɔ yɛ bɛ wu nsiŋ kɛ." 3 Jiso tuu li wuu le, "Ntiitɔɔ wɛ chɛɛŋ chɛɛŋ le, ɛ bɛ mɛɛŋ ki biɛ kɛ wi li biɛrɔ chi fɛŋ kɛ, mwɛ tɛ̀ naa ŋɛŋ bumfɔŋ bu Nyɔ-ɔ kɛ." 4 Nikodɛmu bii li Jiso laa, "Bɛ nuuŋ bɛ geeŋ bɛ se tuu bɛ kaari bɛ biɛ wi wu ta kituŋ le? Mwɛ nuuŋ tuu kaari to lɛ ni shéŋ le tuu ka biɛ wu ni?" 5 Jiso tuu li wuu le, "Ntiitɔɔ wɛ chɛɛŋ chɛɛŋ le, ɛ wi mɛɛŋ ki kɛmɛ kɛ biɛrɔ chi dzɔɔ lɛ mɔɔ chi Fiana kɛ, kɛ nuuŋ tɛ lɛ lɛ bumfɔŋ bu Nyɔ-ɔ kɛ. 6 Wiwoŋ ti bii wiwoŋ, Fiana bii fiana. 7 Kiiŋ wa ni tɛ wɛ le mi nteeɔ li wɛ-ɛ le bɛ kɛmi le bɛ kaari bɛ biɛ bɛniiŋ bɛchu li biɛrɔ chi fɛŋ kɛ. 8 Mfiee ti kɛti si yi kɔŋgisi, ɔɔ wuki si yi kɛti, se nuuŋ le, ɔ nuuŋ tɛ tee laa yi buti fɛŋ, kɛ laa yi giiŋgi fɛŋ le kɛ. Ɛ lɛ si fi fiɛɛ bɛ wi wu kɛmɛ biɛrɔ chi fiana yi waaŋ lɛ."

9 Nikodɛmu se ta maa laa, "Fini nuuŋ fi ka niŋ le?" 10 Jiso tuu li wuu le, "Ɔ nuuŋ wi wu tiifi bɛniiŋ bɛ Isɛlɛɛ, ɔ se tɛ kɛɛ fini ni? 11 Ntiitɔɔ li wɛ chɛɛŋ chɛɛŋ le, tɛ tiiti nuuŋ fiee fi tɛ kii, tɛ lemi lɛ nsa lɛjiŋ nuuŋ li fiee fi tɛ ŋɛŋ, se nuuŋ le nɛ se beenchi yɛ li fiee fi tɛ tiiti kɛ. 12 Ɛ ntiiti biee li be-eŋ bi li nshɛ yini nɛ tɛ beŋ kɛ, nɛ se naa nɛ geeŋ nɛ se beŋ fɛ mi ntee nuuŋ bi li kwɛɛŋ wu Nyɔ-ɔ? 13 Wi nuuŋ yɛ lu wu tɛ̀ saa wu yɛɛ liboo kɛ. Ɛ nɛɛ wi wu tɛ̀ bo lu wu bɛ laaŋkwiiŋ, wu nuuŋ Ŋwanɛwi. 14 Si Mɔɔsɛ tɛ̀ shiŋɛ yɔ yi bɛ tɛ̀ fɛ bɛ kikwa li kiti libuka, ɛ lɛ si bɛ kɛmi le bɛ shiŋɛ Ŋwanɛwi lɛ, 15 le ke mɔɔ nuuŋ noo wu gɛɛ shéŋ li wuu le, mwɛ gii naa kɛmɛ ntsɛ wu kimakɛ.

16 Nyɔ tɛ̀ gbɛɛŋ yi kɔɔŋgi nshɛ yini ŋge, yi se toŋ Ŋwani wu mumkpaŋ, le ke mɔɔ nuuŋ noo wu gɛɛ shéŋ li wuu le, mwɛ tɛ la kɛ, mwɛ kɛmɛ nuuŋ ntsɛ wu kimakɛ. 17 Nyɔ ti mɛɛŋ ki toŋ kɛ Ŋwani li nshɛ yini le bɛ saa bɛniiŋ le be we nsa kɛ. Tɛ̀ toŋ wu nuuŋ le, bɛ buu be bu busu.

18 Wi wu gɛɛ shéŋ li wuu nuuŋ tɛ we nsa kɛ. Se nuuŋ le wi wu mɛɛŋ ki gɛɛ kɛ shéŋ li wuu kɛ, kɛ mwɛ weɔ nsa kituŋ, kifɛ mɛɛŋɔ gɛɛ kɛ shéŋ li bukooŋ bu Ŋwanɛ Nyɔ-ɔ wu nuuŋ wu kwaa kɛ. 19 Bɛ gii bɛ sondɛ nsa lɛ yini dze, kifɛ kiŋ’wofu bɛ kɛɛ li nshɛ, bɛniiŋ se tuu be kɔɔŋgi fi bee nuuŋ kijibɛ yɛki kiŋ’wofu. Be kɔŋgisi lɛ kifɛ biŋge bi bee nuuŋ bibifi. 20 Wi kwikwi wu feti kiŋge ki bifi ti baanini kiŋ’wofu, tɛ bo fɛ kiŋ’wofu nuuŋ kɛ, le kiiŋ kiŋge kee tuu ki yenɛ fɛ waaŋ kɛ. 21 Se nuuŋ le wi wu feti biee bi chɛɛŋ ti bɛɛ li kiŋ’wofu, le kiŋge kee ni ki yeŋgi si ki wi wu nuuŋ bɛ Nyɔ."

22 Lɛjiŋ lɛlu, Jiso bee bɔɔŋ bee bɛ kintutu-u dza be gɛɛŋ kimbɛ kimu ki Judiya. Bee be se gɛɛŋ be nuuŋ fe, lisi bɛniiŋ li dzɔɔ. 23 Jɔɔŋ tɛ̀ lisi tɛ bɛniiŋ li dzɔɔ li kitoŋ ki Ɛnɔŋ li Saliŋ lichiŋ kifɛ dzɔɔ tɛ nuuŋ fe ŋge. Bɛniiŋ tɛ̀ bɛɛ lisi be li dzɔɔ. 24 Fini tɛ̀ nuuŋ bɛ mɛɛŋ saa wu li yih yi ncha-a ki lii kɛ.

25 Bɔɔŋ bɛ Jɔɔŋ lɛ bɛ kintutu-u bamu bɛ wi wu Juu wumu tɛ̀ dza be bɛchi bitɛchinɛ kii yi yibe tsootsi le be ni be wuuti lɛ Nyɔ lii. 26 Bɔɔŋ bɛ kintutu-u bɛ Jɔɔŋ lɛ dza be gɛɛŋ fɛ Jɔɔŋ li, be tee li wuu le, "Labai, wi wu nɛɛ wu nɛ tuu nɛ nuuŋ li Dzɔɔ yi Joodaaŋ luwiŋ lɔɔ, wɔɔ tɛ̀ tiiti ŋge kii wu wɛ, wi wulu lisɔɔ tɛ bɛniiŋ li dzɔɔ, bɛniiŋ bɛchu se giiŋgi baa nuuŋ fɛ wuu." 27 Jɔɔŋ tuu li bee le, "Wi nuuŋ tɛ nuuŋ fiee fimu fuki fɛ Nyɔ fɛ le ni nuuŋ fi nsiŋ kɛ. 28 Beŋ kibɛɛ nɛ nuuŋ nɛ leŋ lɛ nsa wɛŋ lɛjiŋ le ntɛ̀ ntee le ɛ mi wu nuuŋ Kinsofu ki Nyɔ tɛ̀ kaachɛ kɛ. Se nuuŋ le, bɛ tɛ̀ toŋ mi le nsaa ntoo mbaaŋ li ki-i. 29 Nyuŋ wutso nuuŋ wi wu kɛmi kwɛɛtso. Nsaŋ yi nyuŋ wutso yi lemi li nyuŋ wutso wulu lichiŋ yi wuki jɛ yi nyuŋ wutso, ti wuki bujɔŋ si yi wuki jɛ ye lɛ. Ɛ lɛ si mi ŋ’wɛ tɛ dɛɛni ɛ mi n’yisɛ bɛ kinɛɛtinɛ. 30 Ŋkɛmi nɛɛ le ni ŋkuu ŋgiiŋgi nuuŋ limfwe, nse ntuu lɛjiŋ."

31 Wi wu dza liboo kuu yɛki bɛniiŋ bɛchu. Wi wu li nshɛ yini-i, nuuŋ wi wu li nshɛ yini-i tiiti kii biee bi li nshɛ yini-i. Wi wu dza li kwɛɛŋ wu liboo li yɛki wi kwi, 32 mwɛ lemi lɛ nsa wu biee bi wu ŋɛŋ bɛ bi wu woo lɛjiŋ. Se nuuŋ le wi nuuŋ yɛ lu wu beenchi fiee fi tiiti kɛ. 33 Wi kwi wu beenchi fiee fi tiiti nuuŋ wi wu doonchi le teendɔɔ fiee filu le Nyɔ tiiti yɛ chɛɛŋ. 34 Wi wu Nyɔ toŋ ti yeti nuuŋ jɛ yi Nyɔ, kifɛ Nyɔ nyɛ yɛ wu Fiana, yi bɛ nyɛ tɛ fichɛ kɛ. 35 Te Ŋwaŋ kɔɔŋgɔɔ Ŋwaŋ, wu se nyɛ biee bichu li tsaŋ yee li. 36 Wi wu gɛɛ shéŋ li Ŋwaŋ, kɛ mwɛ kɛmɔɔ ntsɛ wu kimakɛ. Wi wu mɛɛŋ ki woo kɛ li wuu kɛ, nuuŋ tɛ kɛmɛ ntsɛ kɛ. Wɛɛ wi, sheŋ fuuti yɛɛ Nyɔ bɛ wu kituŋ.