Efésios 5

22 Isin oorijool! Goottaa Yesuusaan goggoɂajajaamattaan malee entterjjoolkkisinunna ajajaama.✝5:22 K’ol. 3:18; 1 P’et. 3:1. 23 Kiristoosa min kawaa mete goggolleeroo entternna ooriwun meteya; adena Kiristoosan maar kakkoleeron min kawaakokki fayyinnaya. 24 Min kawaa Kiristoosan goggoɂajajaamaroo usumalee oorijool kaɂameen dubbaa entterjjolun haɂajajaame.

25 Isin entterjjolnna! Kiristoosa min kawaa goggogeelateronna isiɂoottessa roorisate goggosisateroo isinna oorijoolkisin geelayene.✝5:25 K’ol. 3:19; 1 P’et. 3:7. 26 Kiristoosa hikka kakkoonyelera min kawaa muc’c’isin dootereyya; kakkomuc’c’iserana gara kahaafurane bekeeyi aalisereya. 27 Hikka garaayi min kawaa t’ork’k’e goorttun hore meelilisano goorttun hikka aankkikki kakkalee kameellan ayees hamutooni k’ulluutti, koonna ayees kallayittina taɂidantti yelate isi tos gabbalatara. 28 Usumaleenna entterjjol isiɂoottisoo goggogeelatarankki malee oorijoolkisoo geelatano dootisara; ooritteessa kageelaatara isiɂoottessa geelaatara. 29 Maarkkeessa kadiidara maayona laagiro; duuddowa Kiristoosa min kawaatun goggoyelarokki malee isiɂoottessa aamisatara; karkkaraatara. 30 Noonna kakiristoosa maarkokki mikitajjoolnna. 31 Haanssun ibaaddo Aabbokkeessana Aayetteessana iisere, oorine wota k’urannaamaran; lama dubbana maar koo laaran.✝5:31 Met'. 2:24. 32 Hitti hool taɂatii hooltta; hikkana kaɂamara Kiristoosa maraanna min kaɂebi maraan masuussa yelereya. 33 Ayesuun goɂameen hikki ayees isinna fakkaatara; haanssun entter oori isiɂoottessa aani yelayire hageelaato; oorina entterkisee hakabajiito.