10 Goortta kagootta kaɂatii hunnaa ataayeen. 11 Odurrisa felo omiiggee neebaayin goggodanddeetawun kawaa huu kajereene dubba sarssayeene. 12 No jereen kanneshafayinanna ibaaddone wota anlleennon giraan hikka kamugudi geesii ofelaraan mootijjolnnee, odonnati oɂabaannena hikka alamikokki hunnajjoolnne goorttun hikka amano daruurii ogiraan battiikki ayyaanajjolnne wotaya. 13 Haanssun tameellan arri hunna kadiina awodayiin goggodanddeetanunna kaɂameen dubbana gudisiddeene ataayi aallin goggodanddeetanun kawaa huu kajereene dubba abayeen.

14 Goortta rummi zinnaara aani mooɂootisin mowayeeddeene, k’ullumma laala aani sarssayenddeene,✝ 15 kanogoddaa wongala keferro aani luk’k’aɂoottisinii tabssayeenddeen ekkaasayen aallaa.✝ 16 Hikka dubbakkona eleen aani baldabalda taɂamatto tadurrisa dukutto dubba baasin kakkodaanddetaan ammano wontte aani k’eenffayeen. 17 Fayyinna tamete gulle aani metekisinii kaayen; usumaleenna Ayyaana K’ulluukikko kahelamaro shiifa usuna haafura kawaa abayeen.✝