João 13

Yesuusa usukko oɂagaalssatareen luk’k’aa aalise

1 Gooratana kafaasikkaa baalakko horenne gire, Yesuusana hikka alami iisere Odo tos kakkoseeyinara goorata giyaano addeesere, alami ogireen ootteessa olleeraan geelatera, taagachcho geeronna geelate.

2 Kita kahemeene horee roore giraan, Yesuusa roorisi goggosisiroon daabloosa ere kasimoona kaɂask’orotu Yihuuda wodana kekkeese gire. 3 Yesuusana, Odo ayees dubba odonnatikkeesa hegelii goggoyeleroo, Waakko faramanona Waa tos abbaabatanokkeessa addeesere, 4 Kita kahemeenekko kee, sarssi kayegure mooɂinna hoc’c’o mowaate. 5 Esekkona kakkoɂaalisaran huuyi beke kibere usukko oɂagaalssatareenkonɂi luk’k’a aalisaa tamuwaatero hoc’c’oo shakaarano haggaɂabe. 6 Simoona P’et’iroosa tos emeete, P’et’iroosana, «Goottakki, ati lok’ak’k’oɂootte aalisinatta?» ame. 7 Yesuusana abbaabere, «Ani kafelaro ati gidda laakkasso, haarre adi shaaddowa» ame. 8 P’et’iroosana, «Laa ati lok’k’aɂootte inkko suure lakkoɂaalisso ame. Yesuusana ani ku goɂaalisanawaaye ati inne wota esella lakkoɂabtto» ame. 9 Simoona P’et’iroosana, «Goottakki» goorttanun «Lok’ak’k’oɂootte oolaal anlleenon giraan genetteenna metekkeenna aalisina ame.» 10 Yesuusana, «Maar kaɂaalero ibaaddotiin kadootisara lok’ak’k’o oolaal aalanoya; kahesera maar ade kamuc’c’imeya. Dubbana gollaanawaatteenna isin omuc’intteenttan» ame. 11 Isin dubbana omuc’intteen lakkottan usu kakkonɂamera usu roorisi kasisinara ayyoyo mankkokaso maraanye.

12 Lok’ak’oɂoottisoo aalise abbaabatere, huu sarssate abbaabatere banɂee hamas’s’eere, haanna ame, «Ani isinuun kafelero shaadattaan✝13:12 Luk'. 22:27.?» 13 «Isin, in ‹Kaɂagaalssisarona› ‹Gootta› amattaan, garaya, goggoɂamattaani usumaleewwaya. 14 Goortta ani Goottakkisinna kaɂagaalssisaro lee giraan lok’ak’k’oɂoottisin goɂaalise, isinna hikkamalee isiɂisirroo lok’ak’k’oɂoottisin aalssayiin dootisara. 15 Ani goggofelerokki malee isinna hikkamaleewa goggofelttaanun masuussaa segeera. 16 Ani rumminaa rumminaa amara, kahandaara goottakko, kafaramerana kafarerokko lakkorooraro.✝13:16 Mat. 10:24; Luk'. 6:40; Yan. 15:20. 17 Goortta hikka ayees addeesiddeene felooyi gohayisseen osommaasantteenttan.