Lucas 19

Yesuusa kabaja taɂatiiti Iyyerusaalemi tabano

28 Yesuusa hikka ayeese abbaabatere Iyyerusaalemi tos bin horehaye sesseetaa gire. 29 Zayitii kabeyaara gaa takkoɂalataro wodamii ogiraan, Beetefaage tonssa kabittaaniya maaman tos kakkogabbalamare goorata, usukko oɂagaalssatareenkko lamanne haa ame fare. 30 «Isin horee kagiro maaman seeyeen, eserraanna tabaa giraan maayyona suure takkohamas’iinoon giro tademeeree darmmee shaantte tagitto helnnattaan, furaddeen hittarraa keena. 31 Maayyona ‹Muun furattaan?› Ami isin gohoosate ‹Goottawun dootisatta ama.› »

32 Ofarameerenna seeteerene usu goggosegeerekki malee lee heleen. 33 Kaminee ibaaddona darmmee tademeer isin furaa giranttii deengureen, isone «Darmmee muun furattaan?» ameen.

34 Isona «Goottawun dootisatta» ameen.

35 Esekkona darmmee tademeer Yesuusa tos keenen, sarssi kakkisoo gutii yayeengurene Yesuusana darmmeeyi gutii hamas’s’iiseen. 36 Ibaaddona usu kakkoseetaro raadii sarssikkisoo yaa gire.

37 Zayitii kabeyaara gaa takkoɂalataro wodamikko metegamatto kageesaro raa tos kakkogabbalamareen goorata tooto aaloo onjiin olleeren usukko oɂagaalssatareen kaddeeraan baasa dubbaa geggelaataa yaayetisoo t’ok’k’iseen haa amaa Waa galataano haggaɂabeen.

38 «Mege kagoottayi kaɂemeetara wono kasommaasameya!» «Nogodda Daruurii, kabaja guuntte Waawuun halleeto!»

39 Gosa orroo kagire kookkoo ibaaddo kafarasaawi Yesuusane, «Kaɂagaalssisatto, kukko oɂagaalssataran c’alɂi goggoɂaminaawun lakkohadisattoya?» ameen.

40 Yesuusana, «Ani isinne haa amara» «Iso c’alɂi goɂameen eɂemoolnna iyyirowa» ame.