1 «Hassu goorata wononnati kadaruure dab abateenguren mashaashe k’op’ayin obeeraan deeleeljja tomon aani laara.✝25:1 Luk'. 12:35. 2 Iso orrokko deeleeljja kenno gowwaa, deeleeljja kenno adeen k’arooleeyyen. 3 Gowoolee dab abateenguren lanbbaa minjja lakkoɂabateeren, 4 K’aroolee goɂameen dabkkisoonne wota lanbbaa minjja t’armmusiyi abateen gireen. 5 Kamashaashee kakkoɂadallaatere goorata dubbana hudduro kakkodutisatte goorata huddureen.

6 «Ul hemeen t’eɂe kakkolaare goorata ‹Kamaashaashee emeetara biyaa k’op’ayeen taɂamatta uumit maalssantte.›

7 «Hassu goorata deeleeljja dubba keengureen dabkkisoo hank’k’ayisaten ekkaasateen. 8 Gowoolee k’arooleenne ‹Dabkkaani bayinara laanbbaatisinkko noon sisa,› ameen.

9 «K’arooleenɂi deeleeljja goɂameen abbaabenguren no taɂabnna laanbbaa ‹Noyeenna isinuunna laanawaayin daanddaatta, seyeenddeene laanbbaa kadaddalatarokko ussun iminayeen› ameen.

10 «Laanbbaa iminayin kakkobiyaaren goorata kamashaashee emeete, ekkaasateen ogireen deeleeljjana kahaassinoo aamo takkoɂekkaatero banɂe usune wota tabeen, ufana c’ufame.

11 «Adallaaten oɂemeeteran okkalee deeleeljja, ‹Goottaa! Goottaa!› maganne ‹Noon ufa banina› ameen.

12 «Usu goɂameen, ‹Ani rumminaa amara ani isin laakkaso› ame isoon abbaabe.✝25:12 Luk'. 13:25.

13 «Goorttanu isin arri goorttun saatii mankkokasoon maraan isiɂekkaasayeen oora.

14 «Wononnati kadaruuree ibaaddoti koo usuun ohandaareen isi tos uumegure oɂabo urrawoɂoottessa hadara sisegure ul kakkalee seeyin kakkeero ibaaddoti aani laara.✝25:14 Luk'. 19:11-27. 15 Odo odoo feloɂoottisokki malee koowun t’agaraa ken, koowun lama, koowun ade t’agaraa too sisegure goorsewa ul kakkalee iise seete. 16 T’agaraa ken kaɂatatera ibaaddoti goorsewa daddalatano haggaɂabere takkalee t’agaraa ken worɂe helate. 17 Usumaleenna t’agaraa lama kaɂataterena t’agaraa lama worɂe helate. 18 T’agaraa too kaɂatatera goɂameen ul oshegure maragade kagoottaa k’amale.

19 «Ohandaaraankokki goottaa mankkoseeteroo tanjjiin adallaate emetere tasisero t’agaraa tootaayi din haggaɂabe. 20 T’agaraa ken kaɂatatere takkalee t’agaraa ken worɂe helate aate emeetegure, ‹goottaa!› Ati iin t’agaraa ken sissette, hikkima takkalee t’agaraa ken worɂe helera ame.

21 «Goottakkeessana ‹Goɂidan felttetta, ati kaɂidankki kaɂabddantte, kic’c’arkki ayeesii kaɂabddantte mankkolleete maraan kamooggan ayeesii ani ku shuuminara, goottakkaanɂi geggeloo tos tabi› ame.

22 «Usumaleenna t’agaraa lama kaɂatatera kahandaara emeetegure ‹goottaa!› ati iin t’agaraa lama sissette, hikkima t’agaraa lama daddalegure takkalee t’agaraa lama worɂe helera ame.

23 «Goottakkeessana ‹Goɂidan felttetta, ati kaɂidankkina kaɂabddantte kahandaatta kic’c’arkkiin kaɂabddantte mankkolleete maraan kamooggan ayees gutii ani ku shuuminara, goottakkaanɂi geggeloo tos tabi› ame.

24 «T’agaraa too kaɂatatere kahandaarokkina emeetegure ‹gootta!› Ati kawut’annon gitto kamat’aratto, kadarɂinnon gitto kakukkuyisaatto bogikaɂatii ibaaddoti laano kasowa, 25 Haannuun abssayere, ‹T’agaraattaa erree k’amalera, hikkima maragadekka› ame.

26 «Goottakkeessana abbaabere, ‹Ati kameellankkina boozzakki kahandaatta, kawut’annon giro kamat’aratarona, kadarɂinnon giro kakukkuyisataro laanokkee kasso? 27 Hayya ani kakkoɂabbaabataro goorata t’agarattee worɂene wota goggoɂataroo odaddalatarawun sisano dootisare.

28 « ‹Goorittanuu t’agaraa aatagudden t’agaraa tomon kaɂaboon sisa, 29 kaɂaboon adamara, moggaatara, kallayiikkikko goɂameen hassu kagirawa atamara.✝25:29 Mat. 13:12; Mar. 4:25; Luk'. 8:18. 30 Hikka laɂo kallayiikki kahandaaro oottanna ilkko fooc’ano mankkogiro sarre kagiro t’illinggakki mugud tos beesa shafa› ame.✝25:30 Mat. 8:12; 22:13; Luk'. 13:28.

31 «Ere kaɂibaaddo erggichchalkkeessa dubbane wota kabajaa goɂemeete kakkabajaa korffinjjeeyi gutii hamas’iinnara.✝25:31 Mat. 16:27; 19:28. 32 Gosa dubba usuu horee kukkuminnara, usuna, kafoofee idaad oreenkko goggoɂassaabarooyi, gosa koo kakkaleekko assaabinara. 33 Idaad mina tamerggenne oreen mina tabetene aalliisinnara.

34 «Hassu goorata wono mina tamerggenne ogiraanne haa aminara, ‹Isin Aabbokki osommaasatera koyeen alami takkomet’amerokko haggaɂabere isinuun kaɂekkaatero wononnati eela. 35 Aalanttina ani uuɂee aamisseettan, sugubaaye t’amissettan, ani martti lee goɂemeeye k’op’atteettan, 36 Ani hawɂayi gollee sarssisseettan, ani hawɂaame deetettan, shaame gollee in tos emeetteen hoosattettaan.›

37 «K’ullooleenna abbaabeen haa ameen, ‹Gootta! Ati uuɂite deenne goree no ku aaminsse? Goorttun sugubaatte deenne goree no ku t’aminsse? 38 Martti leete deenne goree no ku k’op’anne? Goorttun hawɂayi leete deenne goree sarssinsse? 39 Usumaleenna hawɂaantte goorttun shaantte goree seenne no ku hoosanne?›

40 «Wonona abbaabere, ‹Ani rumminaa amara hinɂa huc’c’arri olleeraan abbilaaltteekko koowun kayeltteettan iin feltteettaan aaniya› ame abbaabe.

41 «Esekkona mina tabetene ogiraanne ade haa aminara, ‹Isin ok’angaanttettaan, durrisanna erggichchakeessawun taɂekkaattetto jiruu jiroomman eleen tos inkko kale biyaadden seeyeen. 42 Aalanttina ani uuɂee lakkoɂaamisseettan, ani sugubaaye lakkot’amissettaan, 43 Ani martti lee goɂemeeye lakkok’op’attettaan hawɂayi lee lakkosarssissettaan, ani hawɂaamena shaame gollee in tos emeetteen lakkohoosatteettan.›

44 «Isona abbaabereen, ‹Gootta! Ati uuɂite goorttun sugubaatte, ati martti leete goorttun hawɂayi leete, hawɂaantte goorttun shaantte deennenne goree gargaarana waanne?›

45 «Hassu goorata wono abbaabere, ‹Ani rumminaa amara hinɂa huc’c’arri olleeraankko koowun felana waattii iinna lakkofelttettaan› aminara.

46 «Hinɂa Jiruu jiroommatti murro tos, k’ulloolee adeen jiruu jiroommakki giri tos seeyinnaraan.»✝25:46 Dan. 12:2.