1 አቢላልቴ፥ ግዳ አዴነ ጋራ ካአያናኮክ እላቦል ጎጎአዴሳኑን ዶታራ። 2 አማኖ ካልኒዕ ሌተን ታኮግቴን ሀሴራና ህታራና ዎዳማ ህኢ ካዱደ ካአዬሶን ቶልቻል አን ጎጎአታንቴታን ካሶዋ። 3 ሃንሱን ማዮና አያና ካዋይ ካአዬሳራ፥ "የሱሳ ካቃንጋመያ" ካአማራ ላኮግሮ፤ ኡሱማለና አያና ቁሉክ ጎሌኖን ማዮና "የሱሳ ጎታያ" ካአማራ ግራናዋት አን ሰጋራ።

4 እላቦል ካለካለክ ጎሌሮ፥ አያና ጎአመን ኮያ፥ 5 ሀንዳኖና ካለካለክ ካሌሮ ጎታ ጎአመን ኮያ፤ 6 ፈሎና ካለካለኒዕ ጎሌን፥ ዱባና ዱባይ ካፈላራ አደ ኡሱ ኮ ዋያ። 7 አየሱን ጎአመን አያና ቁሉክኮት ሙተን መተመቴ ካኮንስሳማራ ራቶት ላኦንያ። 8 አያና ቁሉክ ኮዉን ቃሩማ አዬሳኖ ስሳራ፤ ካካለቱን ሀሱ አያና ማላብ አዬሳኖ ስሳራ። 9 ኮዉን ሀሱ አያናዋ አማኖ ስስናራ፥ ካካለዉን አደ ኤሰነዋ ካፋይሳሮ አያናኮክ እላቦጆል ስስናራ። 10 ኮዉን ባሳ ፈላኖ፥ ካካለቱን ሄገሮ አዬሳኖ፥ ካካለቱን አደ አያናጆል አሳባኖ፥ ኮዉን ካለካለት ታኡሱብት ሄኢ አዬሳኖ፥ ካካለቱን አደ ካለካለት ታኡሱብት ሄኢ ካአዬሳመሮ ፉራኖኮክ እላቦ ስሳራ። 11 ሂኒዕ ዱባ ሀሱ አያና ኮ ኮኒዕ እላቦጆል ጎሌራን፥ መተመቴ እባዶን ኡሱ እሲ ጎጎፈኤ ስሳራ።

12 ማሪ ምክታ ካሞጋን ጎግረና ማር ኮያ፤ አየሱን ጎአመን ምክታጆል ካሞጋን ጎሌና ማር ኮያ። ክርስቶሳና ኡሱማሌዋያ። 13 አይሁድ ጎርቱን ካግርክ እባዶ ጎሌነ፥ ድይ ጎርቱን ባልቻክ እባዶ ጎሌነ፥ ኖ ዱባ ማር ኮ ጎጎሌኖ አያና ኮይ ጣማቃምነና፥ ኖ ዱባና አያና ኮኮ ጎጎጣምኖ ስሳመራ።

14 ማር ኮ ካኮመጣመራ ምክታ ካሞጋንኮ ኳሬ ምክታ ኮኮ ላኮዮ። 15 ሉክ "አን ገነ ማንኮሌኖን ማራን ካማሬ ምክታ ላኮዮ" አየሱን ጎአመን ሂካ አማኖይ ካማሬ ምክታ ላኖ ሄሳራ? 16 ነበና፥ "አን ኢል ማንኮሌኖ ማራን ካማሬ ምክታ ላኮዮ" ጎአንተ ሃ አማኖይ ካማሬ ምክታ ላኖ ሄሳራ? 17 ማር ዱባ ኢል ሊ ግረዋ፥ ማላኖ ሀየኮ ሄላምናረ? ማር ዱባ ነበ ሊ ግረዋ፥ ኡርሳታኖ ሀየኮ ሄላምናረ? 18 አየሱን ጎአመን ዋ ጎጎጌላታሮ መተመተይ ባንኤ ዱባ ካየራ። 19 ምክታ ዱባና ኮ ሊ ግረዋ ማር ሀየኮ ሄላምናረ? 20 ጎርታ ምክታል ካሞጋንያ፥ ማር ጎአመን ኮያ።

21 እል ገነኔ፥ "አት እን ላኮዶትሳቶ" አሚና ላኮዳንዳቶ፥ መተና ሉክነ፥ "አት ኢን ላኮዶትሳቶ" አምን ላኮዳንዳሮ። 22 ዱዶዋ ላፋክ ኣን ካላራ ካሞጋን ካማሬ ምክታጆል ኣሎ ኦዶትሳራንያን። 23 ካቱፋመ ኣን ካላሮ ምክታሉን ኣሎ ካባጃ ስሳና፥ አንደና ኦኮንሙላኖ ምክታል ኣሎ ኮኮባታና፤ 24 ካኮንሙሊኖን ምክታልካን አደ ሂክ ላኮዶትሳሮ። ዋ ጎአመን ካማሬ ምክታል ራቶ ኢንሰ ኤሰልሰ ካባጃ ኦኮንሀንቃተቶ ታሮርተ ካባጃ ስሰራ። 25 ሂካና ካኮንየለራ ካማሬ ምክታል ኦሮኮ ካለካለ ላኖ አግኖን፥ እስእስ ኦሮ ኮኮዉን ጎጎሻድናዉንያ። 26 ምክታ ኮ ጎአቦሳምሮ ምክታጆል ዱባ ራቶ አቦሳማራ፥ ምክታ ኮ ጎካባጃምሮ ካካለ ምክታልና ራቶ ገጌላታራ።

27 ጎርታ እስና ካክርስቶሳ ማርታን፥ መተመተክስኒ ማርኬሳክ ምክታልታን። 28 ሃንሱን ዋ መተመቴ እባዶን ምን ካኤብ ኦሮ ካለካለክ ሀንዳ ጎጎግሮ የለራ፥ ሂካ ጋራይ ሆራርጀ ኦፋራመራን፥ ካላም ኦሄገሮል፥ ካሴድ ኦአጋልስሳራን ሹመራ። ደቤና ባሳ ኦፈላራን፥ ደቤና አዳ. አዳክ ፋይሳኖኮክ እላቦ ኦአባን፥ እባዶ ጋርጋራኖኮክ እላቦ ኦአባን፥ ኦዶናቲ ካባሪሳሮና ካለካለት ሄኢ ካአዬሳሮ እባዶ ካየራ። 29 ዱባና ኦፋራሜራንያን? ዱባና አደን ኦሄገሮያን? ዱባና አደን ኦአጋልስሳራንያን? ዱባና አደን ባሳ ፈላራን? 30 ዱባና አደን ካኮፋይሳራን እላቦል አባኔ? ዱባና አደን ካለካለት ሄኢ አዬሳራን? ዱባና አደን ፉራናን? 31 አየሱን ጎአመን ዱባኮ ካሮራሮ እላቦ አታኒ ዶታዬን።

ግዳ አድ ዱባኮ ካሮራሮ ራ አን እስኑን ቱስናራ።