1 "ማዮና ምን ካዋይ ሆረሃየ ካባሪሳሮ ሊ ጎዶታተ፥ ፈሎ ኦኢዳን ሀልቻራ" ካአማራ ሃፉራ ካአብዳመያ። 2 ጎርታ ምን ካዋዉን ሆረሃየ ካፈላራ ካቱፋሞን፥ ኦር ቶኮክ ኤንተር፥ ኤካክ፥ እስካአባታሮ፥ ሴራይ ካባራሮ፥ ማርት ካቆጳታሮ፥ አጋልስስን ካዳንዴሮ፥ 3 ካሴትኖን፥ ካኢንሰኢንጋሞን ዱሳክ ካሌ፥ ካዶጋሞን፥ ማራጋደ ካጌላኖን ሊን ዶትሳራ። 4 ይስኬሳ ካሀንዳሮና ካካባጅሮ የል ጂናሳኖይ ካምነ እባዶካከሳ ማራጌ ካባሪሳታሮ ሊን ዶትሳራ። 5 እባዶት ኮ ምንካኬሳ ማላባይ ካባሪሳኖን ጎሌ፥ ምን ካዋ ምሲ ባሪስን ዳንዳራ? 6 ኮራይ አማጋምረ ዱርሳ ካኮኢየሮ ፍርዳ ጎጎኢኖንኮ ኤነ ዋ ካአማኔሮ አሮሌኖ። 7 አደና መገኬሳ ጎጎቱፋሞንኮና ዱርሳኮት ሜል ኦሮ ታብረ ጎጎኢኖንኮ፥ ሳሬ ኦግራን ዶሌ ካእዳን አቶ ካአቦ ሊን ዶትሳራ።

8 ዳቆኒልና ኡሱማሌ ኦካባጃሜን፥ አየስ ኦኢግልሶን፥ ካሞጋን ጣሞ ካዎይኒ ኦሀልችኖን፥ ማራጋዴን ካጋጲጋጲኖን እባዶ ላኖ ዶትሳራ፤ 9 አማኖኮት ሆል ቁሉት ሳሙይ ኦራታኖ ዶትሳራ። 10 እሶና ጣይ ሀጫፋሜን፤ ኤሰኮና፥ ኮና ቱፍ ካልኒዕ ሊ ጎሙቴን ምን ካዋይ ዳቆን ሊ ሀሃንዳዬን። 11 ኡሱማለና ኦርጆልክሶ ካካባጃመ፥ ሀም ካላይኒዕ አየሱን ጎአመን ልክኪና ካአመን ዱባን ኦአብዳሜን ሊን ዶትሳራ። 12 ዳቆን ኦር ቶክ ኤንተር ሊን ዶትሳራ፤ አደና ይስክሶና ካምነ እባዶክሶ ማራጌ ኦባሪሳታራን ሊን ዶትሳራ። 13 ጎጎዶትሳሮ ሀንዳ መተክሶዉን ታንጂን ካባጃ፥ የሱሳ ክርስቶሳና ካአባን አማኖይ ታንጂን ጃቡ ሄላታራን።

14,15 ኤነ አን ኩ ቶስ ኤመይን አብድ የላየረ ሂካ አጃጃ ኩን ጻፋራ፤ ሂካ ኩን ካኮንጻፋራ ካአዳላየ ጎሌና እባዶ ምን ካዋይ ምሲ ግርን ዶትሳሮ ጎጎአዴሶንያ፤ ምና ካአርዶ ካዋኮክ ምን ካዋ ህክና ካሩም ልበና ኡኩምናያ። 16 ዋ ሄዶይሳታኖኮት ሆል ሄዳታኖ ካላይ ታአትታ፤ ኡሱ እባዶ ሌ ሙተ፤ አያናይ ባተ፤ ኤርግቻይ ሙተ፤ ጎሳ ዱባዉን ላላባመ፤ አላም ካግሮ እባዶ አብዳመ፤ ካባጃይ ዳሩር ቤ።