1 አን ጳዉሎሳ፥ እስን ሆረ ግራንቲ ዱሳክ አማመረ፤ እስንኮ ፋክ ካኮአምሮ ጎራታ አደ እስን ጉት ጃቡ ካቱሳታሮ አማመ፤ ታክርስቶሳ አሽከናቲና ኢዳነይ አን እስን ኤባታራ። 2 አን እስንኮ ካኤባታሮ እስን ቶስ ካኮኤሜየ ጎራታ ጃቡይ ጎጎአዬስሮ ጎጎየሎንኮያ፤ ሶኮክ ሀልቻ ካሰሴታኖ ኣን የለረ ኖ ካሄዳሮ እባዶ ኮኮ ሆረ አደ ጃቡይ አዬስን አን ዶታራ። 3 ማምሲ አላም ኦሮ ጎግርነና ካሻፋይናና ጀሬን ካአላም ላኮዮ። 4 ሁ ካጀሬነክሶክ ቂቀ ዲጊን ካዳንደይስሮ ካዳሩረ ሁና ኦአባንያን ኳሬ አላምኮክ ሁ ካጀረነ ላኮዮ። 5 ዋ አዴሳኖ ጉት ሀንዱዱፎ ሌረን ኦክያራን ዶጋማኖና ባራር አዬሳኖክሶ ባስናና፤ ቆፋ ታእባዶ ዱባ ቦጅነነ ክርስቶሳን ጎጎአጃጃምሮን የላና። 6 አጃጃማኖክስን ካአዴሳመ ጎሌ ካአጃጃሞን ማምስክና ሙርስን ኦኤካኔ ልናና።

7 እስን ካደያታን ሳሬ ካሙታሮ አየስ ካላልያ፤ ማዮና አን ካክርስቶሳያ አም እስጎአብዳተ ካላም ሀቆፌ፤ ኖና ኡሱ ኣን ኦክርስቶሳ ላኖ ሀአዴሰ። 8 ጎታ ኖየን ካስሰሮ ኦዶናትኮክ ጋራይ አን ኣሎ ጎዳየና ላኮሙልሮ፤ ሂክ ኦዶናት ኖን ካኮስሳመራ እስን ጣቢስንያ ኳሬ ዳርኢን ላኮዮ። 9 ሀንዳልኬይ እስን ካአብስሳሮ ኣን አሮሌኖ። 10 ዎዳሳ፥ ኮኮ እባዶ፥ "ካፓዉሎሳ ሀንዳል ካአቲና ካእስልያ፤ ኡሱ መተኬሳይ ኖኡነ ዎታ ጎግሮ አደ ላፋክያ፤ አዬስኬሳና ካቱፋመያ" ካአምራን ሌራ። 11 ሂካ ካአማራ እባዶ ኖ ኤባ ግራን ሀንዳካን ካኮንጻፍነና ኤነ እስኔ ዎታ ሌነኔ ታኮፈላኖ ኖ ኦሮ ኮና አሳብንጀ ግራናዋት ሀአዴሰን።

12 ሀሌዎ ኳሬ እስኦትሶ ካጋላታታሮ እባዶነ ዎታ እስኦታን ለዳዪን ጎርቱን ኤካ የላዪን ላኮጃባኖ፥ እሶ አደን እስኦትሶ እስኦትሶነ ዎታ ሄረግሳኖይና እስኦትሶና እስኦትሶ ዎታ ለላምሳታኖይ ዎዳናመ ላኮያን። 13 ኖ አንዴ እስን ቶንሳ ታ ጌኖን ዋ ኦስሰሮ ፈሎ ኦሮ ዳታና ኳሬ ጅልባኮ ሮርነ ኦዳታኖ ላኮኖ። 14 እስና ካኮግታን ፈሎኦታንኮክ ሜሳ ኦሮ ማንኮሌ ማራን ካክርስቶሳ ዎንጋላ አጋልስስን እስን ቶስ ካኮኤመነኔ ጎራታ ኡሱ ሜሳኮ ላኮሮርነኖ። 15 ሃንሱን ዋ ኖን ካኤካሰሮ ሜሳኮ ሮርነ ፈሎ ኦካለቲ አላኮ ሮርነ ላኮዳታኖ፤ ሀሱኮ አማኖካን ጎጎጂናሮና ፈሎኦታንና ዋ ኖን ካኤካሰሮ ሜሳ እስን ኦሮ ኣሎ ጎጎባልአሮ አብድ የላታና። 16 ጎርታ ካካለ እባዶኮኒዕ ፈሎ ኦሮ ታብነ ጣየ ኦፈላሜራን ፈሎይ አንዳኖን ግራን እስንኮ ቶላነ ካግሮ ኡሊ ዎንጋላ ላላብን ዳንዳና።

17 አየሱን ጎአመን፥ "ካዳታራ ጎታይ ሀዳቶ።" 18 እባዶ ጋላታምን ካኮዳንዳራ ጎታ ጎጋላትሮ ኳሬ እስኦቴሳ እሲ ጎጋላታሮ ላኮዮ።