2 Coríntios 13

ካጉድስ ጎርሳና ኖጎዳ

1 ጎርታ አን እስን ቶስ አሮኤሜየኮ ሂክ እዬን ካሴድያ፥ "ማጎሬና አየስ ዱባ ካኮአዴሳማራ አቶ ላማይ ጎርቱን አቶ ሴድያ።" 2 ካላም ደያኖኬይ እስኔ ዎታ ታኮግረ ሴርሳኖይ አዬሰረ፤ ግዳና አደ ኤባ ግራን ሂታኮ ሆረነ ጩቦ ኦፈለራና ካካለና ሴርሳ አዬስናራ፤ ግዳ እስን ቶስ አባባየ ካኮኤሜታሮ ጎራታ ማዮና ላኮነኔኤይሳይናሮ፤ 3 እስን እዬ ኦሮ ባሬጉረ ካአዬሳራ ክርስቶሳ ላኖ አዴስን ዶታታን፤ እስን ዶሌ ካሙታራ ካኬሳ ሁናያ ኳሬ ሀራኖኬሳ ላኮዮ። 4 ኡሱ ማስቃሊ ጉት ሱዋመራ ካጎየራ ሀራኖ ጎሌና ግዳ ሁና ካዋይ ኔፎነ ግርናራ፤ ኖና ኡሱነ ዎታ ላፋኒዕ ሌነና፤ እስኔ ዎታ ታአብኖ ኤሴላ አንዴ ኡሱነ ዎታ ሁና ካዋይ ግርናና።

5 አማኖክስኒ ኦአታቴታን ላኖ አዴስን እስኦትስን ቆቆራዬን፤ እስኦትስን ጫፋዬን የሱሳ ክርስቶሳ እስን ኦሮ ግራኖ ላኮአዴሰታንያ? ጎርቱን ጫፍቲ ኢቴታን አማኖያ። 6 ኖ ጫፍቲ ኢያናዋትካን ካአዴስናታን አብድ የላታና። 7 አየስ ካሜላን እስን ጎጎፈሎንኮ ኖ ዋ ቶስ ኤባይናና፤ ካኮንኤባይናና ማምሲና ኖ አንዴ ኦአዴሳምነ ሊ ሀሙቶን ጎሄንሰ እስን አርጌቶ ካእዳንክ ካሌሮ አየስ ጎጎፈልታኑንያ ኳሬ አታንካን ቱሳይን ላኮዮ። 8 ኖ ሩም ማራን ፈላና ኳሬ ሩምኮ ካለካለ አየስ ኮና ላኮፈልናኖ። 9 ኖ ላፋኒዕ ሌነ ግራን እስን አዴን ኦአቲ ጎሌታን ኖ ገጌላታና፤ ኤብካካን እስን ልክኒዕ ጎጎሌታኑንያ። 10 ሂካ ሀንዳ አን እስንኮ ፋክመ ግራን አን እስኑን ካኮንጻፈራ ህታ ኣላንቲያ፤ ሂካማሌ አን እስን ቶስ ካኮኤሜታሮ ጎራታ ጎታና ኢን ካስሰሮ ኦዶናቲ አን እስን ላኮያድስናሮ፤ ጎታ ኦዶናት ኢን ካኮንስሰራ እስን ብስንያ ኳሬ እስን ዳርኢን ላኮዮ።

ታጋቾ ኖጎዳ

11 ጎርታ አቢላልቴ ኖጎዳ ግራ! ግርክስን ኤካሳየን፤ ጎርሳኬይ ግራ፤ እስእስኦሮ እስአታ፤ ኖጎድዳ ግራ፤ ካጌላንጄና ካኖጎዳ ሄዶ እስን ዎታ ሊናራ።

12 ቁሉክ እስአንጋታኖይ እስእስ አንጋታ ኖጎዳ አታ።

13 ዋ ካአማናራ እባዶ ዱባ ኖጎዳ እስኑን ፋራማራ።

14 ታጎታ ታየሱሳ ክርስቶሳ ስኖ፥ ጌላንጀ ታዋ፥ አያና ቁሉኮክ ራቶናት እስን ዱባነ ዎታ ሀሌዎ።