João 21

የሱሳኮ ኦአጋልሳታረን ባሳ ኩኑኡብ አባታኖ

1 ኤሰኮና ዳንበኔ የሱሳ ታጢብራዶስ ላቡ አደና ኡሱኮ ኦአጋልሳታሬዉን ሙተ፥ ሂካማሌና አደ ሙተ። 2 ስሞና ካአማማረ ጴጢሮሳ፥ ዲዲሞሳ ካአማማረ ቶማሳ፥ ካቃና ዘጋሊላ ናትናኤል፥ ይስ ካዛብዶሳና የሱሳኮ ኦአጋልሳታረን ኦካለ ላማ ራቶ ግኔን። 3 ስሞና ካአማማረ ጴጢሮሳና፥ "ኩኑኡብ አባይን ዳጋኖያ" አመ።✝21፡3 ሉቃ. 5፡5።

እሶና፥ "ኖ ኩኔ ዎታ ዳግናና" አመን። ኤሜተነ ዎላቦ ኦርዴን ታቤን፥ ኤሰ ሄመን አደን ኮና ላኮአባተን። 4 ባሪኖ፥ የሱሳ ላቡ ግሪ አሌ ግረ፥ ኡሱኮ ኦአጋልሳታረን አደን የሱሳ ላኖ ላኮአዴሰን። 5 የሱሳና፥ "ይሶ፥ ኩኑኡብ አብታነ?" አመ።

እሶና፥ ኮና "ላኮአብኖ" አመን።

6 ኡሱና፥ "ማራብትስን ዎላቦኮ ምና ታመርገነ ሉጉዳዬን፥ ኩኑኡብ ሄላታንዋ" አመ። እሶና ካኮሉጉዳታሬን ጎራታ ኩኑኡብ ሞጋንኮ ካከይ ማራብ ናትን ዋተን።✝21፡6 ሉቃ. 5፡6።

7 ሀሱ ጎራታ የሱሳ ካጌላታረ ኡሱኮ ካአጋልሳታረ፥ ጴጢሮሳነ፥ "ጎታዮ!" አመ። ስሞና ጴጢሮሳና፥ "ጎታዮላ!" ካአማሮ ሃፉራ ካኮማላረ ጎራታ፥ ቤሳተ ካግረ ሳርስ ታብሳተረ ፍርመ በከሮ ታበ። 8 ኦካለ የሱሳኮ ኦአጋልሳታረን አደን ባጋኮ ባድ ቶስ ፋክካሜራን ህስል ላማ ቦሌ ካሌሮ ኳሬ ኣሎ ላኮፋክሜናን፥ ኩኑኡብ ታኮአማጋመረ ማራብ ናታ ባጋ ኤመተን። 9 ባጋና ካኮግያኔ ጎራታ፥ ቦላል ካኤሌኔ ጉት ካግሮ ኩንኡብና ባቦ ዴን። 10 የሱሳና፥ "ግዳ ካአብቴታን ኩኑኡብኮ አላ ኬና" አመ።

11 ሃንሱን ስሞና ካአማመረ ጴጢሮሳ ዎላቦ ታበረ ማራብ ባጋ ቶስ ናቴ፥ 153 ካጅንጂን ኩኑኡብ አማጋመ ግረ፥ ሂካ ግታክ ኩኑኡብ ጎአብተና ማራብ ላኮፊላንተቶ።