1 ፋራሳዊልና ሶዶቃውል የሱሳ ቶስ ጋባላመንጉረን ጫፍን ዶተንጉሬን፥ "ዋኮ ማላታ ኖን ቱስ" አመን ሆሳተን።✝16፡1 ማቶ. 12፡8፤ ሉቃ. 11፡16።

2 ኡሱና አባበረ፥ "ሄመን ‘ዳሩር ሄላ ጎሌቶ ጫምናራ’ አማታን። 3 ባባርንሳ ‘ዳሩር ጋምባላ ሌተ እስላተታ፥ ሃንሱን ኢዳሞ ኡባይናራ’ አማታን፥ ታዳሩረ ምዲ ማላቢን ዳንዳታን፥ አየሱን ጎአመን ጌስኮክ ማላታ አዴስን ላኮዳንዳታን።*16፡3ኮኮ ታጋልባ ጹፍል ቶቶ 2ና 3 ካግሮ ካየሱሳ አየስ ላኮአዳራን። 4 ታሜላና ታሻርሙጣታ አላታን ማላታ ዶታታ፥ አየሱን ጎአመን ካዮናሳ ማላታ ኳሬ ካካለ ማላታ ላኮስሳማሮ" ኤሰኮ የሱሳ እሶ ኢሰ ሴተ።✝16፡4 ማቶ. 12፡39፤ ሉቃ. 11፡29።

5 የሱሳኮ ኦአጋልሳታረን በከኮ ጋማ ካኮናቃሬን ጎራታ ባቦ አባታኖ ኢሎተሬን። 6 የሱሳና፥ "እስኦራዬን" "ታፋራሳውልና ታሶዶቃውልኮት ሜላነኮ እስኦትስን ኦራዬን" አመ።✝16፡6 ሉቃ. 12፡1።

7 እሶና እስእስኦሮ፥ "ኖ ባቦ ሀአባኖኒ ማንኮግኖ ማራን ሌራ" አመን።

8 የሱሳና ቆፋትሶ አዴሰረ፥ "እስን አማኖ ኦኮንሀንቃተራ! እስን እስእስኦሮ ባቦ አባታናዋት ሙን አዬሳታን? 9 ባቦ ብጠ ከኖ ኩማ ከን እባዶን ሌጉረ ዱጉድ ምያ ፋላይተ ካኬሰታን ላኮሻዳታንያ?✝16፡9 ማቶ. 14፡17-21። 10 ኡሱማለና ባቦ ብጠ ቶዶባ ኩማ አፋር እባዶን ሌጉረ ካፋላየሮ ዱጉድ ምያ ሆረኮ ኬሰታን ዎዳናይ ላኮአባተታን አማኖያ?✝16፡10 ማቶ. 15፡34-38። 11 ሀያ አን እስኑን ካሰጌራ ጋራ ካባቦ ላናዋት ምሲ ሻዳናዋታን? ግዳና ታፋራሳውልኮና ታሶዶቃውል መላነኮ እስኦራዬን።" 12 ኡሱ እሶነ እስኦራዬን ካኮንአመራ ካሚ ታክባማቶ ኢርሾ አንሌኖን ግራን፤ ፋራሳውልኮክና ሶዶቃውልኮክ አጋልስስኮ እስኦራዬን ካአማሮ ላኖ እሶን አዴሳመ።

13 የሱሳ ኡል ካፍልጲስዮሳ ቅሳርያ ካአማማሮ ኡል ካኮግያረ ጎራታ ኡሱኮ ኦአጋልሳታረነ፥ "እባዶ ኤረ ካእባዶ አዮያ አማራን?" አመ ሆሳተ።

14 እሶና፥ "ኮኮ ካጣማቃሮ ያንሳያ፥ ካካለ አደ ኤላሳያ፥ ኩክና አደ ኤርማሳያ፥ ጎርቱን ካሄገሮልኮ ኮያ" አማራን አመን።✝16፡14 ማቶ. 14፡1-2፤ ማር. 6፡14-15፤ ሉቃ. 9፡7-8።

15 የሱሳና፥ "እስን አዴን እን አዮያ አማታን?" አመ።

16 ስሞና ካአማማራ ጴጢሮሳና፥ "አት አርዶክ ኤረ ካዋ ክርስቶሳታ" አመ አባበ።

17 የሱሳና ሃ አመ "ኤረ ካዮና ስሞና! አት ካሶማሳንተታ፥ ሂካ ኩን ካቱሰራ ዳሩሪ ካግሮ ኣቦኬ ኳሬ እባዶ ላኮዮ። 18 አት ጰጢሮሳታ፥ ሂካ ኤኤሞ ጉት አማኒል ካኮኩኩአምሮ ምን አን ማዳርናራ፥ ታባኖን ኤሌንኮክ ሁናና ኡሱ ምን ላኮአዎድሮ። 19 ዎኖናት ካዳሩረ ካኮባናራን ቁልፍ አን ኩን ስስናራ፤ አት ኡል ካሺተ ዳሩሪ ካሽያመ ልናራ፤ አት ኡሊ ካፉርተና ዳሩሪ ካፉራመ ልናራ።"✝16፡19 ማቶ. 18፡18፤ ያን. 20፡23። 20 ኤሰኮ አባባተረ ኡሱ ክርስቶሳ ላኖኬሳ ማዮና ጎጎአዬሶንኮ ኡሱኮ ኦአጋልሳታሬኑን አታይሰ ሰገ።

21 የሱሳ ሀሱ ጎራታኮ ሀጋአበጉረ "ኢየሩሳለም ቶስ ሴይጉረ ኤሴና ገነ ታጃርሶለይ፥ ቱቃሞልኮክ ዎይቻልና ሴራ ካሙሴ ኦአጋልስሳራንኮት ገነይ ራኮ አታይረ ካጎይናሮና አሪ ታሴድ ጎይኮ ክያኖ" ካዶትሳሮ ላኖ ኡሱኮ ኦአጋልሳታሬኑን ሰጋኖ ሀጋአበ።

22 ጴጢሮሳና የሱሳ ካለ ኣተ ቤጉረ፤ "ጎታ! ሂካ ኣንክክ አየስ ኢጂ ኩ አሮጌኖ" አማ ሀዲሳኖ ሀጋአበ።

23 የሱሳና ጴጢሮሳ ቶስ ካምባል አመረ፥ "አት ጻላየ ሂታኮ ቡይ! ቆፋ ታእባዶ ኳሬ ቆፋ ታዋ አዴስን ማንኮዳንዴኖን ማራን አት ኢን ሀንዱዱፎ ላታ አመ።"

24 ኤሰኮና የሱሳ ኡሱኮ ኦአጋልሳታረነ፥ "እን ዴበ ሰሰዪን ካጌላታራ እስኦቴሳ ሀካካቶ፥ ራኮዉና ጎይን እስኦቴሳ ሮርሳይ ስሳይረ እን ዴበ ሀሰሴቶ አመ።✝16፡24 ማቶ. 10፡38፤ ሉቃ. 14፡27። 25 ኔፎቴሳ ሃሳይን ካዶታታራ ዱባ ባሳታራ፥ አየሱን ጎአመን ኔፎቴሳ እን ማራን ካባሳታራ ዱባ ሄላታራ።✝16፡25 ማቶ. 10፡39፤ ሉቃ. 17፡33፤ ያን. 12፡25። 26 እባዶ አላም ዱባኮ ዎረኤ ጎሄላተ፥ ኔፎ ጎአመን ጎዋተ መ ላኦ ሄላታራ? ጎርቱን ኔፎኮት ባንኤ መ ሙራ ሄላይናራ? 27 ኤረ ካእባዶ ኣቦኬሳኮት ካባጃይ ኤርግቻነ ዎታ ኤመይናራ፤ እባዶን መተመተይ ፈሎኦቴሳክ ማለ ሙራ ሙርናራ።✝16፡27 ማቶ. 25፡31፤ ማዛ. 62፡12፤ ሮመ 2፡6። 28 አን ሩምና አማራ፤ ህታኒ ካግሮ እባዶኮ ኤረ ካእባዶ ዎኖ ሌ ኤመታ ግራን ታ ዴሮን ካጎኖን እባዶ ግራ።" አመ።