Mateus 21

Yesu aingila mu Yesrusalemu nomukinsi

1 Kabili lintu Yesu na basambi bakwe bapalamine ku Yerusalemu, baisile ku Betifage pa lupili lwa Miolife. Yesu atumine abasambi babili, 2 nokubeba ukuti, "Kabiyeni mumusi uli kuntansi, kabili mwalaya sanga impunda naikakilwa pamo nakana, mukakule mundetele. 3 Ngakyakuti umo amipusya, mumwebe ukuti, ‘Imfumu ilefifwaya’ Nao alemileka mupiite impunda."

4 Ifi fyakitike mukufikilisya fintu kasesema alandile ukuti,

5 "Eba umwana umwanakasi Ziyoni ukuti,

‘Mona Imfumu yobe ileisa kuli webo!

Naifuka kabili ininine pali punda. Napa kana ka punda.’"

6 Abasambi baile nokuyakita fintu Yesu abebele ukukita. 7 Baletele impunda nakana, bayansikepo insalu panuma ya mpunda, elo Yesu apilukilapo. 8 Ibumba lyabantu abengi lyaambile ukwansika insalu syabo mumusebo, bambi nabo baleteta imisambo yafimuti baleyansika mumusebo. 9 Ibumba ilyali kuntansi yakwa Yesu nelyali kunuma lyayambile ukubilisya ukuti, "Lumbanyeni Mwana Davidi! Alipalwa uwisila mwisina lya Mfumu!"

10 Lintu Yesu aingile mu Yerusalemu, mu musumba monse mwakabile nasee! Ku fyongo kabili baleipusyafye ukuti, "Nani uyu?"

11 Abantu mwibumba bayaswike ukuti, "Ni Yesu kasesema uwafuma ku Nazareti mu Galili."