Kengeleni ku Bafalise na kuli Bakafundisya bamafunde
1 Elo Yesu aeba amabumba na basambi bakwe ukuti, 2 "Abafalise na bakafundisya bamafunde bekala mukipuna kyakwa Mose. 3 Eikyo muleumfwila nokukonka fyonse fintu balemyeba, lelo mwilakita fintu bakita, pantu bena tabakita fintu basimikila. 4 Bakaka ifipe ifyafinisya, babika pafipeya fyabantu, ifyo bena tabekatako nomunwe wabo pakwimya. 5 Ifintu fyonse fintu bakita, bakitila ukubamona kubantu. Bakaka utupande utwamalembo bafwala pampumi na kumaboko utwalepa. Elo namasenkebele yansalu syabo balayalefya! 6 Batemwa inkende syamukinsi pamalila elo nefipuna ifyakindamisyapo mu masinagogi, 7 kabili batemwa ukulabaposya nomukinsi pafisankano, nokubeta ukuti ‘Bakafundisya’.