36 Yesu aile na basambi bakwe kunkende yaleitwa Getisemane, aebele abasambi bakwe ukuti, "Ikaleni pano, nebo naya kulya mukupepa." 37 Yesu apiitilepo Petelo na bamwana Zebedee babili Yakobo na Yohani aya nabo. Elo asakamikwa kabili aba uwabulanda. 38 Elo abeba ukuti, "Umutima wandi waisulamo ubulanda nicingafye imfwe. Ikaleni pano mulelola nanebo."

39 Aendelekofye ikyalinga awa pansi ubunkupeme alapepa ukuti, "Mwe Tata, nga nakyanguka lekeni ulu lukombo lumpite, lelo tekufwaya kwandi kano ukufwaya kwenu."

40 Elo abwelulwike asangile abasambi bakwe balimutulo, eikyo aebele Petelo ukuti, "Busye tekuti mulole nanebo pankoloko imo? 41 Loleni no kupepa pakuti mwiwila mumatunko. Umupasi ulefwaya lelo umubili naunaka."

42 Nakabili Yesu aile mukupepa ukuti, "Mwe Tata, ngakyakwebati ulu lukombo teti lufumepo mpaka ndunwe, ubufwayo bwenu nabukitwe." 43 Nakabili abweluluka asanga nabalala. Amenso yabo yali nayafina kutulo.

44 Abasile nakabili ayapepa ilya butatu, apepele ipepo limoline. 45 Abwelulukile ku basambi bakwe no kubeba ukuti, "Busye mukili namulala muletusya? Moneni! Insita naifika iya Mwana Wamuntu ukuposwa mumaboko ya babembu. 46 Imeni tuleya. Uulemfutuka uyo aleisa!"