Ukusikuka kwakwa Yesu
1 Nomba panuma yabusiku bwe Sabata, kumakya pamulungu, Mariya Magadalena na Mariya mubiye baile mukumona imanda. 2 Kwapitile makumba, pantu malaika wa Mfumu alikile ukufuma kumulu. Ailulwilepo ilibwe pa manda aikala napalya pene. 3 Imimonekele yakwe yali ngakalumba, nefyakufwala fyakwe fyali ifyabuta tuutu nge mfula yamabwe. 4 Abalelonda bayambile ukututuma kumwenso, bawile pansi ngabafwile.
5 Malaika aebele banamayo ukuti, "Mwitiina! Ningisiba mulimukufwaya Yesu untu batanike. 6 Talimo Lesa namubusya kubafwa ngafintu alandile. Iseni mumone pantu bamulalike. 7 Kabiyeni mukwangufyanya, muleya eba abasambi bakwe ukuti, ‘Nabuka kubafwa, apa alimukuya ku Galili natangilako, ekuntu mukayamonana!’ Efintu nakisa mukumyeba."
8 Eikyo banamayo bafumine kumanda mukwangufyanya, nabesulamo nensansa uku nomwensomo, balebutukila mukweba abasambi bakwe.