23 Amalalu, e da Hina Godema misini, amane sia:i, "Di da dafawane gilisili ida:iwane dunu amola wadela:i hamosu dunu ili fane legema:bela:? 24 Amabela:? Dunu ida:iwane 50 agoane amo moilai bai bagade ganodini esalabala? Amai galea, Di da amo dunu ilia hou dawa:beba:le, amo moilai bai bagade fadegale fasima:bela:? 25 Na da agoane dawa:. Di da dunu ida:iwane amola wadela:i hamosu dunu gilisili hou afadafa fawane hamomu da hamedei gala. Amo hou da Dima hame gala. Osobo bagade fifi asi gala ilima Fofada:su Dunudafa, E da hou moloidafa fawane hamoma:bela:? Na agoane dawa:. E da moloidafa hou fawane hamomu."

26 Hina Gode da bu amane sia:i, "Na da Sodame moilai bai bagade ganodini dunu ida:iwane gala 50 agoane ba:sea, Na da ilia hou dawa:beba:le, Sodame huluane hame gugunufinisimu."

27 Amalalu, A:ibalaha:me da bu sia:i, "Na da osobo amola nasubu, amo fawane. Be na da mae beda:iwane, Hina Godema sia:i dagoiba:le, na da bu sia:mu. 28 Di da Sodame moilai bai bagade ganodini, dunu ida:iwane 45 fawane ba:sea, Di da 50 defei amo ganodini wadela:i hamosu dunu biyale fawane ba:sea, moilai wadela:ma:bela:?"

E bu adole i, "Na da dunu ida:iwane 45 fawane ba:sea, moilai hame gugunufinisimu."

29 A:ibalaha:me da eno amane sia:i, "Be 40 fawane ba:sea, adi hamoma:bela:?"

E amane sia:i, "Amo 40 ilia hou dawa:beba:le, Na da moilai bai bagade hame wadela:mu."

30 Amalalu, A:ibalaha:me da amane sia:i, "Hina Gode! Nama mae ougima, be na da Dima bu sia:mu. Dunu 30 fawane ida:iwane esalea adi hamoma:bela:?"

E bu adole i, "Na da 30 ba:sea, moilai hame gugunufinisimu."

31 A:ibalaha:me da amane sia:i, "Defea! Na da wali mae beda:iwane Hina Gode Ema sia:i dagoi. Be 20 fawane ba:sea?"

E bu adole i, "Moloi dunu 20 ba:sea, Na da hame wadela:mu."

32 A:ibalaha:me da amane sia:i, "Hina Gode! Nama mae ougima, be na da afadafa fawane eno Dima sia:mu. Dunu 10 ida:iwane fawane ba:sea, adi hamoma:bela:?"

Hina Gode da bu adole i, "Dunu 10 ilia hou ida:iwane ba:sea, Na da amo moilai hame gugunufinisimu."

33 Hina Gode amola A:ibalaha:me, ela gilisili sia: dasu da dagoloba, Hina Gode da fisili asi amola A:ibalaha:me da hi diasuga buhagi.