Mateus 8

Yesu da Louma Dadi Gagui Ea Hawa: Hamosu Dunu Uhinisi Dagoi

5 Yesu da Gabena:ia:me moilaiga doaga:loba, Louma Gamane dadi gagui hina dunu da Ema doaga:le, amane sia:i, 6 "Hina! Na hawa: hamosu dunu da se bagade nabawane amola da:i gadoi diala."

7 Yesu E bu adole i, "Na da e uhimusa: masunu!"

8 Be dadi gagui hina da Yesuma bu adole i, "Na hou da wadela:iba:le, Di da na diasuga misunu na da defele hame galebe. Di udigili guiguda: sia:ga fawane uhima.

9 Na amola da hina dunu eno esala. Na dadi gagui dunu amola, ilia da na sia: naba. Dunu afadafa ema na da ‘Masa!’ sia:beba:le, e da ahoa. Enoma na da ‘Misa!’ sia:beba:le, e da maha. Na da na hawa: hamosu dunuma ‘Agoane hamoma!’ sia:sea, e da agoane hamosa."

10 Amo sia: nababeba:le, Yesu E fofogadigili, Ea fa:no bobogesu dunuma amane sia:i, "Na da dafawane sia:sa! Na da Isala:ili fi ganodini, dafawaneyale dawa:su hou bagade agoia hame ba:i. 11 *8:11 Luge 13:29Na da dilima dafawane sia:sa! Dunu bagohame ilia gusudili amola guma:dili misini, ilia amola A:ibalaha:me, Aisage amola Ya:igobe gilisili, Gode Ea Hinadafa Hou lolo Nasu bagade amo ganodini fimu. 12 *8:12 Ma:diu 22:13, 25:30; Luge 13:28Be Gode Ea fi dunu, Gode da gasiga gadili galadigimu. Ilia da bese ini dinanumu." 13 Amalalu, Yesu da dadi gagui hina ema amane sia:i, "Masa! Dia dafawaneyale dawa:su defele ba:ma!" Amo sia:beba:le, ea hawa: hamosu dunu da uhini dagoi ba:i.