1 पर हे बिश्वासी भाईयो, इसकी कोए जरूरत कोनी, के हम यीशु के दोबारा आण के बखत अर काल्‍लां कै बारै म्ह थारे धोरै कुछ लिखां। 2 क्यूँके थम जाणो सों, के परमेसवर के आण का दिन, उस चोर की तरियां होगा, जो रात नै चोरी करण आवै सै, अर थमनै बेरा भी कोनी लाग्गैगा के चोर कद आवैगा। 3 जिब माणस कहन्दे होंगे, "राज्जी-खुशी सां, अर किमे डर कोनी," तो उनपै चाणचक विनाश आण पड़ैगा, जिस ढाळ गर्भवती बच्‍चा जनन के दुख तै बच न्ही सकदी, उस्से तरियां वो भी बच न्ही पावैंगें। 4 पर हे बिश्वासी भाईयो, थम तो अन्धकार के काम्मां तै अनजाण न्ही सो, के प्रभु के आण का दिन थारे पै चोर की ढाळ आ पड़ै। 5 क्यूँके थम सारे चाँदणे की औलाद अर दिन की औलाद सो; हम ना रात के सां, ना अन्धकार के सां।